Daniel Schweimler Korrespondent i BBC-së

	Gjyqi do të ndiqet me vëmendje nga mbarë shoqëria argjentinase

Shoqëria argjentinase ende nuk e ka marrë veten prej kësaj tragjedie.

Data 30 dhjetor 2004 është e ngulitur mirë në ndërgjegjen kombëtare të Argjentinës.

Atë mbrëmje në klubin e natës, Cromanon në Buenos Ajres më shumë se 190 të rinj vdiqën gjatë një zjarri, ndërsa 1500 të tjerë u plagosën.

Pamjet e trupave të djegur që nxirreshin nga klubi, të të mbijetuarve që u merrej fryma, janë ende të forta sot sikurse ishin edhe atëherë.

Në gjyq të akuzuarit për përgjegjësi lidhur me tragjedinë janë pronarët e klubit, anëtarët e grupit Callejeros, që po luanin atë natë, policët dhe zyrtarët lokalë, të cilët akuzohen se kanë marrë rryshfete për të anashkaluar masat e sigurisë.

Debati që rrethon këtë çështje rrëzoi një qeveri lokale në Buenos Ajres dhe çoi në forcimin e masave të sigurisë të vendosura në mbarë Argjentinën.

Gjyqi pritet të zgjasë shtatë muaj dhe gjatë tij do të dëgjohen më shumë se 300 dëshmitarë.

Prindërit e viktimave, sikurse edhe pjesa më e madhe e shoqërisë argjentinase , do t'i ndjekin seancat nga afër duke kërkuar përgjigje lidhur me atë se si mundi të ndodhte kjo tragjedi.