Rusët paralajmërojnë se tërheqja e trupave do të jetë e ngadaltë

Sekretari i Përgjithshëm i NATO-s, Jaap de Hoop Scheffer tha se ministrat kishin pranuar se Rusia duhet të respektonte armëpushimin e ndërmjetësuar nga presidenti Francez, Nicolas Sarkozy.

Zoti Scheffer shtoi se nuk mund të kishte marrëdhënie normale, pas veprimit ushtarak të Rusisë.

Ai shtoi se deri sa Rusia të tërheqë trupat marrëdhëniet mes Natos dhe Rusisë do të mbeteshin të tensionuara.

"Ne u pajtuam gjithashtu se nuk mund të ketë shkëmbime të zakonshme në marrëdhëniet tona me Federatën Ruse."

"Fakti që ne zhvilluan këtë takim, të jashtëzakonshëm të Këshillit Veri-Antlantik mendoj se është provë se nuk mund të ketë shkëmbime të zakonshme", tha Shefi i NATO-s.

Zoti de Hoop Scheffer tha se nuk mund të shihte se si mund të mblidhej në këtë kohë këshilli NATO-Rusi, por shtoi se linjat e komunikimit nuk duhet të braktiseshin.

Ai tha gjithashtu se vendet anëtare kanë pranuar të ngrejnë një komision NATO-Gjeorgji që ka si qëllim të forcojë lidhjet mes Aleancës dhe Tbilisit.

Por Sekretari i Përgjithshëm i NATO-s nuk tha asgjë lidhur me një afat për anëtarësimin e Gjeorgjisë.

Ministri i Jashtëm rus e akuzoi NATO-n për njëanëshmëri përsa i takon zhvillimeve në Gjeorgji, duke injoruar historinë dhe faktet.

Sergei Lavrov theksoi qëndrimin e Moskës se Gjeorgjia u përpoq të riintegronte me forcë rajonet separatiste dhe Rusia dërgoi trupat për të mbrojtur civilet dhe paqeruajtësit.

NATO, tha ai ishte duke e kthyer agresorin ne viktimë.

Tërheqja ruse

Përpara takimit ambasadori rus në NATO, Dmitry Rogozin, paralajmëroi se vendimi që do të merrte NATO për Gjeorgjinë mund të ndikojë marrëdhëniet në të ardhmen me Rusinë.

Ky mesazh u përforcua më vonë nga zëvendësi i tij, Ivan Soltanovsky, i cili tha gjatë një interviste për BBC-në se anëtaret e NATO-s duhet të qetësoheshin dhe të bënin një vlerësim objektiv të situatës.

Trupat ruse u panë të martën duke u larguar nga qyteti i Gorit.

Një numër tankesh dhe automjetesh të tjera ruse janë parë duke lëvizur përgjatë rrugës jashtë qytetit.

Organizata pë Sigurim dhe Bashkëpunim në Evropë (OSBE) thotë se Rusia ka pranuar dislokimin e 20 vëzhguesve ushtarakë përreth rajonit të Osetisë Jugore.

Megjithatë organizata thotë se dislokimi i planifikuar ende ka nevojë për aprovimin e qeverisë gjeorgjiane.

OSBE-ja ka deri tani nëntë vëzhgues të vendosur në Osetinë Jugore.

Një zëdhënës ushtarak rus nuk konfirmoi nëse forcat ruse kanë marrë kontrollin në qytetin port Poti.

Zëdhënës tha se një numër personash të armatosur dhe të veshur me uniforma gjeorgjiane ishin ndaluar.

Moska pretendon se teksa kishte filluar tërheqjen e trupave në linjë me armëpushimin, Gjeorgjia nuk e kishte bërë këtë.