Lavrov tha se trupat do tërhiqeshin kur të merreshin masa shtesë

Një korrespondent i BBC-së që udhëtoi përgjatë kësaj rruge tha se kontrolli rus përfundonte në kilometrin 30 prej Tbilisit.

Ministri i Jashtëm rus, Sergei Lavrov, tha se trupat ruse do të tërhiqeshin kur të ndërmerreshin masa shtesë.

Presidenti Bush e cilësoi armëpushimin një hap shpresëdhënës, por e paralajmëroi Rusinë që të mos sillte pretendime për rajonet e shkëputura në Osetinë Jugore dhe Abkhazinë.

Ai shtoi se Osetia e Jugut dhe Abkhazia duhet të mbeten pjesë të Gjeorgjisë dhe tha se Rusia tani duhet të tërheqë trupat.

Gjeorgjia i ka akuzuar separatistët abkhazë se kishin marrë kontrollin e mbi 13 fshatrave gjeorgjiane dhe të një hidroçentrali, por këtë lajm nuk ka konfirmime nga burime të pavarura.

Presidenti rus, Dmitry Medvedev e nënshkroi të shtunën planin e armëpushimit të ndërmjetësuar nga presidenti francez, Nicolas Sarkozy, për t'i dhënë fund luftimeve në Gjeorgji.

Presidenti gjeorgjian, Mikhail Saakashvili e nënshkroi atë më herët në prani të Ssekretares amerikane të Shtetit, Condoleezza Rice.