Termocentrali i ri shkakton protesta

Ndërtimi i nje termocentrali të ri në Kosovë për të cilin thuhet se do te jetë njëri prej prodhuesve më të mëdhenj të energjisë në Ballkan, e për të cilin do të shpenzohen milarda dollarë, ka nxjerrë në protesta banorët e Obiliqit, ku është menduar të ndërtohet termocentrali.

Ata pretendojnë, se pas ndërtimit të këtij termocentrali, do të bëhet e pamundur jetesa ne qytetin e tyre, i cili edhe ashtu i përket njërës prej zonave më të ndotura në Kosovë, kjo për shkak të blloqeve të termocentraleve aktuale.

Qytetaret e Obiliqit, që në protestën e tyre mbështeteshin edhe nga qytetarë të Prishtinës dhe aktivistë të levizjes “Çohu”, kanë hedhur qese të mbushura me pluhur nga mbetjet e termocentraleve në oborrin e Parlamentit të Kosovës.

Në këtë protestë të qytetarëve të Obiliqit, ndodheshin edhe aktivistë të lëvizjes “Çohu”, një organizatë kjo joqeveritare, e cila gjatë disa muajve të fundit, aktivitet kryesor të sajin ka pasur luftën kundër korrupsionit.

Lideri i kësaj Lëvizjeje është Avni Zogiani:

“Kuvendi i Kosovës ka nxjerrë një strategji në bazë të të cilës do të duhej të ndërtoheshin kapacitetet e reja energjetike deri në 1000 më orë, por qeveria e Kosovës e ka konfirmuar në disa raste se do të përgatisë një projekt që do të përfshijë 2000 MW, që do të jetë trefish më e madhe se sa është nevoja energjetike e Kosovës”.

Edhe qytetarë të Prishtinës e kanë përshëndetur këtë nismë të banorëve të njërës prej zonave, që cilësohet më e ndotura e që paraqet rrezik serioz për shëndetin.

Ministria e Energjetikës dhe Minierave e cila ka përgatitur projektin për ndërtimin e termocentralit Kosova C me fuqi 2.100MW orë, është përkrahur nga pothuaj të gjitha strukturat e pushtetit dhe projekti tashmë e ka edhe mbështetjen e Bankës Botërore dhe Agjencisë Evropiane për Rindërtim.

Në Ministrinë e Energjetikës thonë se nuk qëndrojnë vërejtjet e qytetarëvë as për shkallën e lartë të ndotjes që do të shkaktonte termocentrali i ri, e as për përfitimet e paligjshme të donatorëve.

Zv/kryeministri i Kosovës Ramë Manaj thotë për BBC-në se nuk do të shkohet në kapacitetet që e rrezikojnë ambientin ku jetojnë qytetarët.

"Mbrojtja e interesit të qytetarëve, e ambientit jetësor të tyre, e shëndetit të tyre, është e pashmangshme dhe paralel ne kemi nevojë dhe dhe do të realizojmë projekte që gjenerojnë energji elektrike nga termocentralet por natyrisht edhe nga burime të tjera alternative”.

Sipas disa pretendimeve të organizatave ambientaliste, Kosova C do të mund të kontaminonte rreth 15 përqind të territorit të Kosovës duke dëmtuar rëndë bujqësinë dhe ujërat.

Sipas ekspertëve Kosova e ka koeficientin më të lartë të sëmundjeve azmatike dhe kardiake për shkak të ndotjes nga termocentralet që aktualisht prodhojnë energji, e që janë shumë pranë vendeve të banuara.

Ata thonë se ndërtimi i këtij termocentrali nuk do të lë hapësirë për t’i arritur standardet mjedisore, sidomos ato ndërkombëtare.

Kosova aktualisht prodhon rreth 1000 MW orë eneregji elektrike, por kjo ka qenë e pamjafteshme.

Në vitet e fundit, ajo është përballur me krizën më të madhe energjetike.

Besohet se me ndërtimin e këtij termocentrali, i cili do të duhej të përfundonte, brenda dhjetëvjecarit të ardhshëm, Kosova përfundimisht do ta zgjidhte problemin e energjisë elektrike.