Fotografi e Karaxhiqit me flokë të bardhë dhe mjekërr të gjatë

Ata thanë se zoti Karaxhiq u arrestua ditën e hënë pasi ishte fshehur për afro trembëdhjetë vjet.

Prokurorët thanë se ish-udhëheqësi serb i Bosnjës kishte përdorur dokumente të rreme dhe kishte punuar në kryeqytet si ushtrues i mjekësisë alternative.

Në një fotografi që iu tregua gazetarëve, ai kishte flokë të bardhë dhe mjekërr të gjatë.

Prokurori Vlladimir Vukçeviq tha se ndalimi i zotit Karaxhiq tregonte se qeveria ne Beograd ishte e përkushtuar që të arrestonte personat e akuzuar për krime lufte.

Gjykata Ndërkombëtare për Krimet në ish-Jugosllavi ka kërkuar arrestimin e tij që në vitin 1995 së bashku me ish-komandantin e tij ushtarak Ratko Mladiq, i cili është ende në arrati.

Në njoftim nga kabineti i presidentit të Serbisë thuhet se pas arrestimit zoti Karaxhiq është nxjerrë përpara gjyqëtarit hetues për krime të luftës në Gjykatën e Qarkut në Beograd në harmoni me ligjin mbi bashkëpunimin me gjykatën e Hagës.

Sipas avokatit të zotit Karaxhiq, Sveta Vujaçiq, ai është arrestuar ditën e premte rreth orës 9:30 të mëngjesit në një autobus publik.

"Asnjë nuk e di kush e arrestoi, kush urdhëroi dhe kush e ka mbajtur për tre ditë pasi u soll këtu (në gjykatë) sot," tha zoti Vujaçiq.

"Radovan Karaxhiqi vetë nuk e di, ai thjesht thotë se këta pesona i treguan atij një tesër policie dhe u dërgua diku dhe u mbajt në një dhomë me sy të mbuluar," tha avokati i tij.

Kryeprokurori i gjykatës së Hagës Serge Brammertz e mirëpriti arrestimin dhe tha se zoti Karaxhiq do të transferohej në Hagë në kohën e duhur.

Një javë më parë paqeruajtësit e Bashkimit Evropian bastisën shtëpinë e gruas së zotit Karaxhiq në Bosnje. Atëhere, ata thanë se operacioni ishte bërë për të parë se çfarë lidhjesh kishte familja me të.

Akuzat

Karaxhiq akuzohet nga Gjykata e Hagës me 15 raste gjenocidi, krime lufte e krime kundër njerëzimit, si dhe krime të tjera të kryera në vitet 1992-96.

Kundër tij u ngrit akt-padi për herë të parë në vitin 1995 së bashku me komandantin e tij Mladiq për vrasjen e civilëve gjatë rrethimit të Sarajevës.

Katër muaj më vonë kundër tij u ngrit akt-padi për gjenocid për organizimin e vrasjeve të rreth tetë mijë burrave dhe të rinjve myslimanë në Srebrenicë.

Akt-padia thotë se Karaxhiq planifikoi sulme ndaj civilëve, arrestimin e grave, fëmijëve e pleqve për shkak të identitetit të tyre kombëtar e fetar, dhe shkatërrimin e vendeve të shenjta në Bosnje.

Mirëpritet arrestimi

Komisioneri i BE-së për zgjerimin, Olli Rehn, e ka mirëpritur arrestimin e tij si një hap të rëndësishëm nga Serbia në rrugën drejt anëtarësisë në BE.

Sekretari i Jashtëm britanik, David Miliband, thotë se arrestimi do të hapë rrugën për një të ardhme më të ndritur evropiane për Serbinë.

Arrestimi i zotit Karaxhiq ka qenë një nga kushtet kryesore për futjen e Serbisë në BE.

Ai vjen në prag të një takimi të ministrave të jashtëm të BE-së që pritet të diskutojë për marrëdhënie më të ngushta me Serbinë pas formimit të një qeverie pro-perëndimore nën presidentin Tadiq.

Ndërkohë, ish-ndihmës sekretari amerikan i shtetit, Richard Holbrooke, i cili negocioi marrëveshjen e paqes që në fakt i dha fund luftës në Bosnje, e përshkoi zotin Karaxhiq si një arkitekt të vërtetë të vrasjeve masive.