Bullgaria dhe Rumania po vëzhgohen me vëmendje nga BE

Në një raport të Komisionit Evropian, arrihet në përfundimin se Bullgaria duhet të reformojë administratën dhe të luftojë zyrtarët e korruptuar që përfitojnë nga fondet e BE-së dhe bashkëpunojnë me kriminelë.

Raporti pritet të bëhet publik javën e ardhshme, por ai ka rënë dë duart e BBC-së.

Bullgaria dhe fqinji i saj, Rumania, po i nënshtrohen një procesi të posaçëm vëzhgimi nga blloku.

Shkak për këtë është se që në momentin e anëtarësimit vitin e shkuar, u arrit në përfundimin se të dyja vendet nuk i përmbushnin tërësisht standartet e BE-së.

Raport 'i ashpër'

Raporti i parë nga BBC është ndoshta më i ashpri i shkruar nga ekzekutivi i BE-së për një vend anëtar.

Korrespondentja e BBC-së në Bruksel, Oana Lungescu, thotë se në të
arrihet në përfundimin se Bullgaria duhet të spastrojë administratën nga të korruptuarit.

Vendi, thuhet në raport, duhet të sigurojë që mbështetja bujare që merr nga BE-ja të shkojë tek shtetasin e saj dhe jo tek zyrtarët e korruptuar që bashkëpunojnë me krimin e organizuar.

BE ka ngrirë tashmë qindra milionë dollarë ndihma për infrastrukturën rrugore dhe bujqësinë e Bullgarisë.

Tani po planifikon t'u heqë të drejtën për të lëvruar fonde të BE-së në vlerë 1 miliardë dollarë disa agjensive.

Paralajmërim

Miliarda të tjerë dollarë në financime për Bullgarinë janë në rrezik, njofton korrespondentja e BBC-së në Bruksel.

Ajo shton se e njëjta gjë mund të thuhet dhe për gjasat që Bullgaria t'i bashkohet zonës pa kufij të BE-së, që njihet dhe si Zona e Shengenit.

Komisioni Evropian po ashtu do të ngrejë shqetësimin se Sofja ka dështuar në përpjekjet për të zbardhur ndonjë nga 150 vrasjet mafioze që janë rregjistruar në Bullgari që nga rënia e komunizmit.

Zyrtarët e BE-së thonë se masat e planifikuara ndaj Bullgarisë, duhet të shërbejnë si paralajmërim për vendet e tjera, qofshin ato anëtare të BE-së apo vende që shpresojnë t'i bashkohen bllokut.