Udhëheqësit e BE-së mblidhen në Bruksel

Traktati - që duhet ratifikuar nga 27 vendet anëtare - synon ta bëjë vendimmarrjen më të lehtë dhe t'i japë BE-së një zë më të fortë në marrëdhëniet ndërkombëtare.

Kacelarja gjermane, Angela Merkel, theksoi nevojën që të gjitha vendet e BE-duhet ta miratojnë traktatin e Lisbonës dhe u shpreh kundër ecjes "me dy shpejtësi".

BE mirëpret angazhimin e Shqipërisë për të mbajtur zgjedhje të lira, të drejta e demokratike që duhet të zhvillohen në vitin 2009.   Projekt-deklaratë e samitit të BE-së

Duke folur në një konferencë shtypi në Bruksel, presidenti i Komisionit Evropian Jose Manuel Barosso tha se ai e kishte garantuar kryeministrin e Irlandës, Brian Cowen, se Irlandës do t'i jepet kohë për të zgjidhur problemet e shkaktuara nga kundërshtimi i traktatit

"Ne ishim të dy të një mëndjeje se takimi i ardhshëm i Këshillit Evropian në tetor do të ishte rasti i duhur për diskutime të mëtejshme për këtë çështje," tha zoti Barroso.

Por Barroso e bëri të qartë se do të jetë shumë e vështirë për ta ndryshsuar tekstin e traktatit për të qetësuar shqetësimet irlandeze.

Inkurajim Ballkanit

Megjithë ngecjen në miratimit e Traktit të Lisbonës, që vendos edhe rregullat për zgjerimin e mëtejshëm të organizatës, udhëheqësit e BE-së pritet ti japin sinjale inkurajuese vendeve aspirante të Ballkanit.

Një projekt-deklaratë e parë nga BBC-ja thotë se udhëheqësit e BE-së do të mirëpresin "angazhimin e Shqipërisë për të mbajtur zgjedhje të lira, të drejta e demokratike që duhet të zhvillohen në vitin 2009".

Ata do të kërkojnë më shumë përpjekje nga autoritetet shqiptare për forcimin e institucioneve, luftën kundër korrupsionit dhe krimit të organizuar dhe reformën e sistemit të drejtësisë.

Shqipërisë do t'i kërkohet gjithashtu "të japi prova bindëse për zbatimin e suksesshëm" të marrëveshjes së asociimit me BE-në.

Projekt-deklarata thotë se BE-ja dëshiron të hapë bisedimet e anëtarësimit me Maqedoninë nga fundi i këtij viti, por diplomatët paralajmërojnë se dhuna në zgjedhjet e fundit dhe çështja e emrit me Greqinë janë pengesë.

BE-ja do të shprehë dëshirën, gjithashtu, për një "qeveri të re në Beograd me një axhendë të qartë evropiane" që të ndërmarrë reformat e nevojshme.

Ata do t'i premtojnë Serbisë shpejtim "të përparimit drejt BE-së, përfshirë statusin e kandidatit, kur të jenë plotësuar kushtet e nevojshme".

BE-ja do të mirëpresë angazhimet e marra nga autoritetet e Kosovës lidhur me mbrojtjen e të drejtave të komuniteteve, decentralizimin dhe ruajtjen e trashëgimisë fetare dhe kulturore si dhe për rolin e ardhshëm të pranisë ndërkombëtare.

Këshilli Evropian shprehu mbështetjen për konferencën e donatorëve për Kosovën që do të mbahet së shpejti në Bruksel dhe kërkoi intensifikimin e përgatitjeve.