Shumë birmanezë janë në pritje të ndihmave

Ai i bëri këto komente gjatë një sesioni të Asamblesë së Përgjithshme të OKB-së.

Më herët, ambasadori i Birmanisë e kishte akuzuar Francën se kishte dërguar një luftanije në rajon.

Franca thotë se luftanija është e ngarkuar me 1500 tonë ushqime dhe ilaçe për qindra mijë persona që mbijetuan nga cikloni në Deltën Irrawaddy.

Një anije amerikane pret, gjithashtu, lejen që të shkarkojë ndihmat, përfshirë ujë të pijshëm, por autoritetet ushtarake të Birmanisë nuk po lejojnë ndihmat që vijnë nga deti.

Përfaqësuesi i OKB-së, Diedrick Deflaysha, thotë se prioritet duhet të jetë ndihma për fermerët që, në kushte normale, mbulojnë dy të tretat e nevojave të Birmanisë me oriz.

"Fshatarët duhet ta mbjellin orizin brenda qershorit, pra kemi më pak se 45 ditë në dispozicion, përndryshe nuk do të kemi fare prodhim gjatë sezonit të shirave", tha zoti Deflaysha.

Gati dy javë pasi Delta në provincën Irrawadi në Birmani u godit nga një ciklon, numri zyrtar i personave që kanë humbur jetën e ka kaluar shifrën 43 mijë.

Një korrespondent i BBC-së që ka shkuar në zonë ka parë kufoma dhe rrënoja të bëra pirg prej përmbytjeje, por jo operacione ndihme.

Një zyrtar i lartë i Kombeve të Bashkuara për Çështjet Humanitare, John Holmes, që shkoi në Birmani i tregoi BBC-së se ishte i zemëruar me ritmet e ngadalta.

"Zemërimi ynë nuk ka të bëjë me mbërritjen e ndihmave, sepse ato po mbërrijnë, megjithëse shumë më ngadalë sesa do të donim, por me faktin që ne nuk kemi mundur të çojmë një pjesë të personelit tonë të specializuar dhe ekspertë ndërkombëtarë në zonat më të prekura që të ndihmojnë personelin vendas," tha zoti Holmes.

Zyrtari i OKB-së tha se nga qeveria birmaneze kërkohej që të bënte më shumë për të qënë më e hapur ndaj ofertës që ka marrë nga shumë drejtime.