Hezbollahu ka larguar nga zona mbështetësit e qeverisë

Zhvillimi ndodhi në ditën e tretë të luftimeve mes mbështetësve të opozitës dhe qeverisë që mbështetet nga Perëndimi.

Në përleshjet gjatë natës, Hezbollahu mori zyrat e lëvizjes sunite pro-qeveritare që drejtohet nga Saad al-Harriri.

Tani ushtria libaneze ka ndërhyrë për të mbrojtur ndërtesat por nuk po konfrontohet me luftëtarët e Hezbollahut.

Ministri i shtetit për Çështje Parlamentare, Michel Faraoun, i tha BBC-së se Hezbollahu nuk po i lejonte forcat qeveritare që të bënin punën e tyre.

"Ajo që po ndodh është një lloj grushti shteti," tha ai.

"Hezbollahu sot po merr përgjegjësinë për të marrë nën kontroll rrugët e kryeqytetit.. Deri më sot, nuk e ka lejuar ende ushtrinë legjitime që të zëvendësojë elementë të caktuar në rrugë".

"Dobësim"

Një korrespondent i BBC-së në Bejrut i përshkroi zhvillimet e fundit si dobësim të ndjeshëm të fraksionit pro-qeveritar.

Përshkallëzimi i situatës filloi me grevën njëditore të sindikatave kundër disa vendimeve të qeverisë të.

Përfaqësues të opozitës thanë në fund të ditës se do t'i vazhdonin protestat deri në momentin kur qeveria të anulonte masat e marra së fundmi për të pakësuar ndikimin e lëvizjes Hezbollah.

Greva u shoqërua nga pëlleshje të armatosura mes grupeve pro-qeveritare dhe mbështetësve të opozitës.

Luftimet që kanë vazhduar që nga e enjtja kanë lënë të paktën dhjetë të vrarë.

Ende nuk ka asnjë sinjal për arritjen e ndonjë marrëveshjeje që do t'i jepte fund konfrontimeve.