Duke dhënë reagimin e tij pas vendimit, presidenti amerikan Bush ka shprehur keqardhje që nuk u arrit konsensus që Maqedonia të merrte ftesë për në NATO.

Ai tha se çështje e emrit duhet të zgjidhet shpejt.

Rriten numrat e vendeve anëtare

NATO tani do të rritet në numër nga një aleancë prej 26 vendesh në 28 pas ftesës bërë Shqipërisë dhe Kroacisë, thotë korrespondenti i BBC.

Megjithëse Maqedonisë nuk iu bë ftesë, udhëheqësit e aleancës e bënë të qartë se ajo mund të futet në Aleancë sapo të zgjidhet mosmarrëveshja me Greqinë.

Dhe ndërsa Ukraina dhe Gjeorgjia zyrtarisht nuk u ftuan në rrugën e anëtarësimit edhe pas presionit amerikan, u ra dakord që ata eventualisht do t'i bashkohen aleancës.

Maqedonia largohet para kohe

Maqedonia nuk mori ftesë për t'u anëtarësuar në NATO.
Pala greke qëndroi fort në qëndrimin e saj dhe çështja e emrit e la Maqedoninë pa u bashkuar me vendet e tjera të aleancës.

Sekretari i Përgjithshëm i NATO-s, Jaap De Hop Schefer megjithatë tha se Shkupi nëse tejkalon dallimin me Greqinë mund të bëhet shumë shpejt anëtar i aleancës.

Por delegacioni i Maqedonisë nuk mundi të mos fshehë zhgënjimin.

Ministri i jashtëm Antoni Milloshovski tha se ata po largohen më herët nga samiti, për të qenë me popullin e Maqedonisë, i cili priste realizimin e kësaj aspirate prej disa vjetësh.

"Është zhgënjyese për principet e demokracisë që përpjekja e Maqedonisë për t'u anëtarësuar në NATO u dënuan jo për atë që e kemi bërë, por për atë se kush jemi. Ne jemi maqedonas dhe shteti ynë është Republika e Maqedonisë", tha Ministri i Jashtëm i Maqedonisë.

Delegacioni maqedonas tani thotë se do të vendosin pas disa ditësh se si do të veprojnë sa i përket negociatave me Greqinë.

Por ata thonë Maqedonia do të sillet si një shtet i përgjegjshëm dhe do të vazhdojë bashkëpunimin me NATO-n.