Serbët e Kosovës reagojnë pas shpalljes së pavarësisë

Ai u tha qytetarëve serbë se Serbia do të vazhdojë të ruajë kontrollin në ato pjesë të Kosovës ku jeton pakica serbe dhe ka shtuar se pas ditës së dielë në Kosovë po vendosen dy pushtete.

Ai ka thënë se serbët e Kosovës dhe Serbia do të bashkëpunojnë vetëm me administratën ndërkombëtare, UNMIK, në Kosovë.

Ç'ka po planifikojmë? Me siguri largimin. Ku të shkojmë? Mbase në Serbi.   Serbe në Graçanicë

"Të bashkëpunohet me UNMIK-un, me të vetmin autoritetet të bashkësisë ndërkombëtare të cilin Serbia e pranon në Kosovë," tha zoti Samarxhiq.

"Serbia nuk do të pranojë Institucionet e Kosovës, ato shqiptare dhe nuk do ta pranojë as misionin e BE-së, sepse edhe njëra edhe tjetra janë joligjore dhe jolegjitime dhe për shkakun se janë të pranishme përmes një shkelje të paprecent të së drejtës ndërkombëtare," tha ai.

"Kjo është porosia e Serbisë për gjithë botën, porosia për të gjithë në Kosovë dhe Metohi dhe posaçërisht një porosi për serbët që të qëndrojnë këtu dhe se shteti i Serbisë do të jetë me ta, duke llogaritur këtu se ata do të jenë në shtetin e tyre," ka thënë zoti Samarxhiq.

Zyrtari i lartë serb tha se shteti serb do të funksionojë atje ku mundet.

Reagime të serbëve

Unë do të qëndroj që të jetoj në Kosovë, të vazhdojë punën, është gabim i madh nëse qytetarët ikin.   Qytetarare serbe në Graçanicë

Po çfarë thonë disa nga qytetarët serbë në Kosovë pas zhvillimeve të fundit kur parlamenti i Kosovës miratoi deklaratën e pavarësisë.

Disa prej tyre thonë se do të qëndrojnë në Kosovë, disa të tjerë janë të frikësuar dhe kanë pasiguri dhe nuk besojnë se e ardhmja e tyre është në Kosovën e pavarur.

BBC pyeti disa prej tyre në rajonin me shumicë serbe të Graçanicës. Cili është reagimi i tyre pas shpalljes së pavarësisë së Kosovës.

"Ç'ka po planifikojmë? Me siguri largimin. Ku të shkojmë? Mbase në Serbi, jashtë kufijve administrativë të Kosovës dhe atëherë le të kujdesen për mua," thotë kjo serbe në Graçanicë.

Një serbe tjetër thotë se do të qëndrojë në Kosovë dhe do të vazhdojë jetën normalisht.

"Unë do të vazdoj që të jetoj në Kosovë, të vazhdojë punën, është gabim i madh nëse qytetarët ikin. Nëse ikin do të humbin çdo gjë. Dhe kjo me shpalljen e pavarësisë, është një budallallëk. Këtë mund ta bëjë çdo kush," thotë kjo serbe.

"Ky është vendi ynë, ky është djepi ynë. Këtu kemi lindur dhe do të vdesim. Këtu i kemi patur stërgjyshërit. Mbesim këtu, ku tjetër të shkojmë," thotë një e re serbe.

"Do ta njihnim automatikisht Kosovën e pavarur sikur ta njihnim edhe pushtetin e tyre. Kurrë s'do ta njohim pavarësinë e tyre. Çka më ka ofruar pushteti shqiptar mua që unë ta njoh. Nëse ma kanë marr lirinë si t'i dua unë ata ose ti respektojë. Pres më te keqen," thotë një serbe tjetër.

"Tani do të provojnë që me të gjitha mënyrat të na ndjekin. Do të na thonë se çdo gjë është e mirë dhe se po kujdesen për ne, por do të ketë aso provokime, që nuk do të jenë të dukshme."