Rezoluta hedh poshtë planin e Ahtisaarit

Kuvendi ka ngarkuar gjithashtu ekipin negociator serb për të marrë pjesë në negociatat mbi statusin e Kosovës, më 21 janar në Vjenë.

Rezoluta u miratua me 225 vota pro dhe me 15 vota kundër të deputetëve të koalicionit të Partisë Liberal Demokratike të Çedomir Jovanoviqit, kurse tre deputetë të hungarezëve të Vojvodinës nuk kanë votuar, duke thyee unitetin e mëparshem i parlamentit serb kur është fjala për Kosovën.

Duke iu drejtuar deputetëve, në fund të debatit gjashtë orësh, kryeministri Vojisllav Koshtunica tha se rezoluta është vepër e përbashkët e strukturave politike dhe përfaqësuesve të partive parlamentare.

Sipas tij debati do të jetë plotësim i dobishëm dhe kornizë për verpimin e Ekipit Negociator serb, i cili do t'i përfaqësojë qëndrimet nga rezoluta e mëparshme mbi Kosovën, e miratuar në nëntor të vitit 2005, por edhe të rezolutës së sotme me të cilën konfrimohet politika e mbrojtjes së sovranitetit dhe e tërësisë tokësore të Serbisë.

Ai e vlerësoi si të rëndësishme që në rezolutë dhe në debatin në kuvend u vërtetua se mandati i Marti Ahtisarit nuk ka qenë të merret me statusin e Serbisë, por të Kosovës brenda Serbisë.

Koshtunica pati deklaruar më herët se plani i Ahtisaarit është propozim për coptimin e Serbisë dhe u bëri thirrje deputetëve që të refuzojnë të jenë pjesëmarrës në tërheqjen e drejtësisë para dhunës dhe shtoi se për Kosovën nuk ekziston kompensim.

Deputetëve më herët u është drejtuar edhe presidenti Boris Tadiq i cili tha se plani i Ahtisaarit hap rrugën për pavarësinë së Kosovës, dhe pranimi i këtij propozimi do të kishte karakter kundërkushtetues, por edhe përkundër kësaj Serbia duhet të marrë pjesë në negociatat e Vjenës më 21 shkurt.

Në Rezolutë theksohet se me propozimin e Ahtisarit "në mënyrë kundërligjore hidhen themelet për krijimin e shtetit të ri të pavarur në territorin e Serbisë, me shkeljen e parimeve themelore të së drejtës ndërkombëtare, sepse nuk janë respektuar tërësia tokësore dhe sovraniteti shtetëror i Serbisë në raport me Kosovën.

Me propozimin e Ahtisaarit, sikurse theksohet në rezolutë, gjithashtu vjen në pikëpyetje mundësia e arritjes së zgjidhjes kompromis e me marrëveshje, si objektiv kryesor i negociatave mbi statusin e ardhshëm të Kosovës.

Tonin kritik ndaj Ahtisaarit e kishin gati të gjithë diskutuesit të cilët e mbështetën në tërësi rezolutën, përveç deputetëve të Partisë Liberal Demokratike të Çedomir Jovanoviqit dhe deputetit të koalicionit të shqiptarëve të Luginës së Preshevës, Riza Halimi.

Jovanoviq tha se rezoluta është shprehje e vazhdimësisë së politikës e cila e ka shkatërruar Serbinë dha prapa saj fshihet qeveria e paaftë.

Ai vuri në dukje se duhet biseduar mbi Kosovën dhe se plani i Ahtisaarit është hap në drejtim të mirë, sepse e respekton realitetin politik - se Kosova praktikisht është e pavarur qëprej shtatë vjetësh.

Riza Halimi tha se për parlamentin është degradues fakti që po debatohet për rezolutën e Qeverisë, në vend të orvatjeve që eventualisht të përmirësohen dispozitat e planit të Ahtisaarit i cili mbështetet mbi arritjet më përparimtare të së drejtës dhe të demokracisë ndërkombëtare.