BBCAlbanian.com
 
Botuar: E shtunë, 02 dhjetor 2006 - 15:52 CET
 
Dërgoja një miku Version i printueshëm
Dita e Shkollës që pothuaj nuk ndodhi
 
Nxënës të Mitrovicës me gazetarë të BBC-së
Nxënës të Mitrovicës me gazetarë të BBC-së

Albana Kasapi dhe Dejan Çalovski të BBC-së udhëtuan në nëntor për në qytetin e Mitrovicës në Kosovë për të lidhur shkollën e mesme shqiptare në jug me atë serbe në veri në kuadër të projektit të BBC-së, Dita e Shkollës.

Nxënësit e të dy shkollave folën me njëri-tjetrin, por nuk u takuan dot.

Biseda e tyre me telefon dhe në anglisht, në gjuhën e vetme përmes së cilës nxënësit mund ta kuptonin njëri-tjetrin, ishte dëshmi e ndasive që ekzistojnë mes grupe etnike në qytetin e ndarë të Kosovës, por dhe dëshirës së të rinjve për të komunikuar.

Nga Albana Kasapi

Ishte vizita ime e parë në Mitrovicë pas më shumë se katër vjetësh dhe kur po i afrohesha qytetit, më kapi ankthi. Mendova: Mos po kërkojmë të bëjmë një gjë të pamundur? Ndoshta nxënësit shqiptarë dhe serbë që duam t'i bëjmë bashkë nuk kanë për të shkuar fare me njëri-tjetrin. Tek e fundit, tetëmbëdhjetë vjeçarët vërtet teknikisht janë nga i njëjti qytet, por jetojnë në dy botë të ndryshme - të ndarë nga gjuha dhe nga ajo urë famëkeqe mbi lumin Ibër.

Shqiptarët në jug dhe serbët në veri gjatë këtyre shtatë vjetëve të fundit janë takuar shumë rrallë. Dhe kur janë takuar...ka plasur dhuna.

Nxënës shqiptarë të Mitrovicës
Nxënës shqiptarë të Mitrovicës
Megjithatë, mendova, kërshëria e adoleshentëve ka për të fituar. E dija që fëmijët donin të mësonin për jetën në anën tjetër dhe vetmevete arrita në përfundimin se ndoshta gjithshka do të shkonte mirë.

Unë dhe kolegët, shqiptarë dhe serbë të Shërbimit Botëror të BBC-së, i kishim vënë në vijë punët nga ana teknike me kohë. Apo të paktëm kështu mendonim. Dy shkollat kishin dhënë pëlqimin për aktivitetin. Kishim siguruar dhe eskortë nga policia ndërkombëtare e UNMIK-ut për të shoqëruar fëmijët serbë në mënyrë ata të ndjeheshin të sigurtë kur të kalonin urën.

Plani ishte ishte që fëmijët shqiptarë e serbë të mblidheshin bashkë në qendrën kulturore në jug të urës, që ndodhet në të ashtuquajturën "Zonë e Mirëbesimit" - e cila ruhet nga paqëruajtësit francezë. Vetë qendra ruhet 24 orë nga paqëruajtësit dhe një oficer francez na kishte siguruar se fëmijët do të ishin të sigurtë.

Megjithatë, vetëm një ditë para se të zhvillohej aktiviteti, autoritetet serbe në veri thanë se ishin të shqetësuar për sigurinë e fëmijëve dhe u tërhoqën. Arsyen e vërtetë pse ata ndryshuan mendjen për aktivitetin, ndoshta nuk kam për ta mësuar kurrë.

Ndoshta akti fizik i kapërcimit të urës për në jug nga fëmijët serbë, për udhëheqësit serbë vendas përbënte deri në një farë mase, një deklaratë politike.

Kur i takova më vonë gjatë asaj dite fëmijët serbë, pashë se ata nuk ishin aspak të habitur nga mënyra se si ishte përmbysur situata. E njëjta gjë ndodhi dhe me fëmijët shqiptarë. Por të dy grupet ishin të zhgënjyer. Unë dhe kolegu i BBC-së në gjuhën serbe, Dejan Calovski u ndjemë keq që në një farë mënyre nuk mundëm ta mbanim dot premtimin fillestar që u kishim bërë dhe hartuam një plan të ri.

Ne u kishim dhënë dy grupeve të adoleshentëve nga një kamerë për të xhiruar nga një dokumentar të shkurtër për një ditë nga jeta e tyre. Të paktën kështu, ata do të kishin një mundësi që ta shihnin njëri-tjetrin në video. Po a do të mjaftonin pamjet e dokumentarit për të filluar një bisedë përmes telefonit?

Ne bëmë përgatitjet e fundit dhe në mëngjes, u nisëm drejt shkollave 'tona' - Dejani në veri, unë në jug.

Nxënës serbë të Mitrovicës
Nxënës serbë të Mitrovicës
Ashtu si kishim rënë dakord, fëmijët u mblodhën në zyrat e drejtorëve të shkollave. Ne ndezëm televizorët, vumë videokasetat dhe mbajtëm frymën. Pashë se si 'nxënësit e mi' me gojë hapur, ngulën vështrimin në pamjet e qytetit të tyre që nuk i kishin parë dot për shtatë vjet, ndoshta dhe më shumë.

Nxënësit serbë kishin filmuar gjithshka: shkollën, kishën, rrugët e ngarkuara me trafik …. Madje dhe atmosferën e një koncerti rock ku kishin marrë pjesë disa prej tyre…. Dhe një pamje paksa të trishtuar të të vetmes librari në pjesën e tyre të qytetit.

Nxënësit shqiptarë, të drejtuar nga Aurora dhe Shpresa, kishin punuar më gjatë me videon e tyre. Mua mu duk se me të, ata donin të jepnin dhe një mesazh politik. Video fillonte me pamje të urës - simbol i gjithshkaje që i ndan shqiptarët dhe serbët - një moment pamja 'ngrin' në një parullë të madhe ku shkruhet "paqe". Video përfundon me një pamje të urës e parë nga një dritare me perde gjysëm të mbyllura.

Të dy prezantimet e videove ishin në gjuhën angleze-e vetmja gjuhë e përbashkët mes dy grupeve të nxënësve.

Po a do të mjaftonte dokumentari për të ndezur debatin? Vetëm për këtë nuk duhet të isha shqetësuar aspak. Adoleshentët si adoleshentë - kuptuan se kishin shumë gjëra të përbashkëta: shkollën, argëtimin, muzikën Rock. Ata nuk folën haptazi për politikë apo për tensionet ndëretnike në qytet, por ishte e qartë se ishin të pezmatuar nga fakti që nuk mund ta shihnin njëri-tjetrin.

'Çfarë mendoni se do të kishte qenë ndryshe nëse sot ne do të takoheshim në vend që të flisnim në telefon?" e pyeti Fjolla Ivanën në Veri. Dhe përgjigja nga ana tjetër e receptorit: ' Komunikimi sigurisht që është më i lehtë kur e sheh personin me të cilin flet. Por çdo mënyrë e tij është e mirë kur nuk ke zgjidhje tjetër".

Koha fluturoi shpejt dhe pas gjashtë orësh, ishte momenti për ta mbyllur bisedën. Adoleshentët kishin folur gjithë ditën. Unë megjithatë u zhgënjeva pak që ata nuk shkëmbyen as numra telefonash celularë, as adresa email-esh.

Por për një gjë isha e sigurt. Nxënësit shqiptarë dhe ata serbë duan të takohen me njëri-tjetrin. Dhe një takim mes tyre do të kishte rëndësi të jashtëzakonshme sepse një takim I tillë, do të ishte një hap përpara drejt një të ardhmeje më optimiste për qytetin e ndarë të Kosovës.

 
 
LOKALE
Brezi i Ardhshëm vjen në BBC
02 dhjetor 2006 | Faqja Kryesore
Brezi i ardhshëm - Dita e shkollës
02 dhjetor 2006 | Faqja Kryesore
Çfarë thanë nxënësit në Ditën e Shkollës
02 dhjetor 2006 | Faqja Kryesore
GJITHASHTU
 
 
Dërgoja një miku Version i printueshëm
 
 
 
BBC ©
 
^^ Kthehu në krye
 
  Arkiv
 
  BBC News >> | BBC Sport >> | BBC Weather >> | BBC World Service >> | BBC Languages >>