Vdekja e presidenit Rugova dhe zgjedhja e presidentit të ri, fillimi i procesit të zgjidhjes së statusit të Kosovës dhe angazhimi në përmbushjen e standardeve, në decentralizim dhe në integrimin e pakicave.

Zoti Petersen ka lavdëruar institucionet dhe popullin e Kosovës për menaxhimin e situatës pas vdekjes së presidenit Ibrahim Rugova dhe zgjedhjen e shpejtë të kryetarit të ri, Fatmir Sejdiu.

Ai tha se institucionet e Kosovës po përgatiten për takimin e Vjenës ndërmjet Prishtinës dhe Beogradit që mbahet më 20 janar. Kreu i UNMIK-ut, Petersen kërkoi përshpejtimin e procesit të zgjidhjes së statusit.

“Ashtu si e ka thënë edhe në të kaluarën Këshilli i Sigurimit, status qouja në Kosovë nuk është e pranueshme procesi i statusit nuk duhet të jetë vazhdimësi e vendnumërimit.

Përshpejtimi i procesit të statusit është kontributi më i mirë që mund të bëhet tash për të siguruar stabilitetin politik në Kosovë dhe në rajonin e gjerë”, tha ai.

Shefi i UNMIK-ut, Soren Jessen Petersen rikujtoi se krahas zgjidhjes së ! statusit duhet të vazhdohet me përmbushjen e standardeve, sidomos në ato që kanë të bëjnë me të drejtat e pakicave.

Në këtë kuadër ai tha se në fund të vitit të kaluar ka pasur një ngecje në përmbushjen e standardeve, por siç tha ai, nga mesi i muajit janar është vërejtur një angazhim më i madh i institucioneve të Kosovës për standardet.

Zoti Petersen theksoi se decentralizimi mbetet procesi kryesor përmes të cilit shumica shqiptare në Kosovë mund të garantojë realizimin e të drejatave të pakicave, në veçanti të asaj serbe.

Ai tha se gjatë muajve të ardhshëm shumica shqiptare duhet t’ia shtrijë dorën pakicës serbe, ndërsa porositi përfaqësuesit serbë që të marrin pjesë në institucionet e Kosovës dhe të kontribuojnë në krijimin e një shoqërie shumëetnike.

Në këtë rrafsh ai i bëri thirrje Beogradit që të mbështesë bashkëpunimin e serbëve me shumicën shqiptare në Kosovë.

“Shumica në Kosovë që kanë pësuar kaq shumë si pakicë vetë në të kaluarën ka të drejtë që të presë se aspiratat e tyre do të arrihen atëherë kur të zgjidhet statusi i Kosovës, kurse pakicat të cilat janë përballur me hakmarrje dhe izolim, poashtu kanë të drejtë që të presin që brengat dhe shqetësimet e tyre do të dëgjohen me kujdes dhe do të trajtohen”, tha Soren Jessen Petersen.

Nga ana tjetër, presidenti i Serbisë, Boris Tadiq ka bërë përpjekje që të minimizojë rezultatet e arritura në Kosovë në përmbushjen e standardeve.

Ai tha se standardet janë shumë larg përmbushjes, e sidomos! ai për kthimin e të zhvendosurve serbë në pronat e tyre.

Presidenti serb theksoi se serbët në Kosovë janë të diskriminuar nga autoritetet shqiptare. Duke folur për zgjidhjen e statusit të Kosovës, presidenti serb, Boris Tadiq kundërshtoi edhe një herë pavarësinë si opcion.

“Pavarësia e Kosovës do të shpiente do të shpiente deri te një ndryshim unilateral i organeve ose kufinjëve të njohur ndërkombëtarisht në Ballkan dhe kjo do ta destabilizonte politikisht rajonin dhe do të krijonte mundësinë për konflikte të reja. Vetëm Shqipëria e mbështetë kërkesën e shqiptarëve të Kosovës për t’u ndarë nga Serbia”, u shpreh presidenti Tadiq.

Ai kërkoi që zgjidhja e statusit të Kosovës të bëhet sipas parimeve universale në botë.

Presidenti Tadiq tha se nëse Kosova trajtohet si rast unik, kjo do të shërbente si precedent për shtetet tjera. Kreu i shtetit serb tha se Serbia angazhohet për mosndryshimin e kufinjëve ekzistues të Kosovës dhe për një autonomi më të zgjeruar për shqiptarët.

“Shqiptarët e Kosovës politikisht do të ketë një autonomi shumë të gjerë, do të kenë vetëqeverisje të plotë në raport me Beogradin me kusht që ata ta pranojnë autonominë e njejtë për entitetin serb në Kosovë”, theksoi Boris Tadiq.

Mbledhja e Këshillit të Sigurimit ka vazhduar punimet me fjalimin e ambasadorëve të disa shteteve. Për herë të parë në seancën e Këshillit të Sigurimit ka marrë pjesë edhe kryeministri i Kosovës, Bajram Kosumi i cili nuk ka pasur të drejtë fjale.