Presidenti tha se do vazhdojë punën për pavarësinë e Kosovës

Këtë e ka bërë të ditur vetë presidenti Rugova, në një fjalim drejtuar popullit të Kosovës, që është transmetuar në televizion.

"Mjekët kanë gjetur se vuaj nga kanceri i lokalizuar në mushkëri, prandaj më kanë caktuar një terapi intensive shëruese.

Mjekët gjithashtu kanë konstatuar se gjendja ime shëndetësore është duke u përmirësuar dhe janë optimistë për shërimin tim të shpejt," tha ai.

Z. Rugova kërkoi përkrahjen e popullit të Kosovës.

"Qytetarë të dashur të vendit tim, jam i bindur se me ndihmën e Zotit do ta kapërcej edhe këtë betejë dhe do të vazhdojmë të punojmë së bashku më fuqishëm, për njohjen e pavarësisë se vendit tonë, Kosovës sa më parë".

Presidenti Ibrahim Rugova u dërgua në bazën ushtarake amerikane Landstuhl në Gjermani për analiza më të thella, pas përkeqësimit të gjendjes së tij shëndetësore.

Zyrtarisht, gjendja e tij u karakterizua si një ftohje e rëndë, ndonëse burime diplomatike perëndimore u thanë mediave në Kosovë se ai vuan nga një sëmundje më e rëndë.

Përfaqësues ndërkombëtarë dhe ata vendorë në Kosovë, si dhe udhëheqës të partive politike i kanë uruar presidentit Rugova shërim më të shpejtë.

Për gjendjen e tij shëndetësore kanë folur edhe ministrat e jashtëm të BE-së të cilët kanë shfaqur shpresën për shërim të shpejtë.