Muharrem Nitaj BBC, Prishtinë

Rugova kërkoi që të bëhet e pamundura për gjetjen e fajtorëve

Presidenti Ibrahim Rugova e shpalli ditë zie të dielën, ditën kur do të varroset Enver Haradinaj.

Presidenti Rugova kërkoi që organet e Rendit të bëjnë të pamundurën për zbardhjen e vrasjes.

Ndërsa kryeministri Bajram Kosumi e vizitoi familjen Haradinaj menjëherë pas vrasjes dhe i shprehu ngushëllimet e tij dhe të qeverisë që ai drejton.

Zyrtarët ndërkombëtarë edhe ata vendorë të Kosovës me ngushëllimet për famiiljen Haradinaj e kanë siguruar, këtë të fundit, se organet e Rendit dhe të Drejtësisë do të bëjnë ç'është e mundur për të gjetur fajtorët e vrasjes.

Keqardhje të thellë për këtë vrasje kanë shprehur edhe përfaqësuesit e zyrave diplomatike të akredituara në Prishtinë.

Shefi i Zyrës Britanike, Mark Dickinson e ka cilësuar këtë vrasje si makabre dhe ka thënë se ajo mund të ketë pasoja negative për situatën.

Enver Haradinaj, në të njëzetat, është një prej shtatë vëllezërve të ish kryeministrit të Kosovës, Rramush Haradinaj.

Ai ka qënë pjesëtar ish UÇK-së dhe invalid i luftës. Deri në vitin 2003 ai ka qënë pjesëtar aktiv i Trupave Mbrojtëse të Kosovës.

Familja Haradinaj ndërkaq është njëra ndër familjet më të njohura në Kosovë në periudhën e luftës.

Dy vëllezër të Ramush Haradinajt janë vrarë gjatë luftës në Kosovë në vitin 1998, dhe vrasja e fundit shënon viktimën e tretë për këtë familje.

Një vëlla tjetër i zotiti Haradinaj është dënuar me pesë vjet burg nga një gjykatë në Prishtinë për, siç thuhet, krime të kryera gjatë periudhës së konfliktit të armatosur.

Ndërsa vetë Ramush Haradinaj një muaj më parë i është dorëzuar Gjykatës Ndërkombëtare për Krime Lufte në Hagë.