Petersen së shpejti shkon në Beograd për bisedime

Decentralizimi i pushtetit në Kosovë dhe riaktivizimi i dialogut Prishtinë-Beograd janë çështjet kryesore për të cilat shefi i Misionit të Kombeve të Bashkuara në Kosovë, Soren Jessen Petersen do të bisedojë më 17 janar në Beograd për të tretën herë me kryeministrin serb, Vojisllav Koshtunica.

Zoti Petersen për këtë takim ka njoftuar edhe kryeministrin e Kosovës, Ramush Haradinaj.

Kreu i UNMIK-ut pohoi se autoritetet në Kosovë tani kanë filluar punën rreth zhvillimin të projekteve pilot për reformën e pushtetit lokal.

“Tani është me rëndësi që serbët e Kosovës të marrin pjesë në grupet punuese për të zhvilluar pilot projektet. Tanimë nuk është çështja nëse Beogradi do të ketë këshillarë apo jo. Nëse Beogradi ka këshilla të përdorshme, jam i sigurt se grupi punues do i mirëpresi ato. Nuk ka gjasa të jetë ndryshe. Decentralizimi është projekt i udhëhequr nga autoritetet e Kosovës me përfshirjen e serbëve dhe ne jemi të hapur dhe e inkurajojmë Beogradin të marrë pjesë në këtë mënyrë”, tha zoti Jessen Petersen.

Edhe kryeministri Ramush Haradinaj u angazhua për pjesëmarrjen e serbëve në grupet punuese për decentralizimin.

“Kemi në plan të zhvillojmë biseda dhe të prezantojmë të arriturat që kanë ndodhur rreth planit të decentralizimit dhe angazhimet që i merr qeveria e Kosovës dhe këtë përmes grupit punues ku serbët e Kosovës janë të ftuar të marrin pjesë, por do t’i njoftojmë ata (serbët) edhe përmes linjave tjera”, tha zoti Haradinaj.

Ndërkohë, kryeadministratori i Kosovës si aspekt të veçantë të bisedimeve me Beogradin tha se do të ketë çështjen e personave të zhdukur.

Në këtë kuadër do të bëhen përpjekje për riaktivizimin e dialogut Prishtinë-Beograd, i filluar në tetor të vitit 2003, por i pezulluar pas trazirave të marsit të vitit të shkuar.

“Unë kam kërkuar disa herë nga kryeministri serb Koshtunica që Beogradi të bashkëpunojë në rivendosjen e dialogut ndërmjet Prishtinës dhe Beogradit në çështjen e personave të zhdukur si dhe të bëhet gjithçka që është e mundur nga ana e autoriteteve serbe për të bërë përparime për zbardhjen e fatit të personave të zhdukur. Jam optimist se zoti Koshtunica do të ketë dicka të veçantë për të më thënë në këtë aspekt”, u shpreh numri një i UNMIK-ut, Petersen.