Botuar: E hënë , 25 tetor 2004 - 18:16 CET

UNMIK kërkon të respektohet rezultati

Shefi i Misionit të Kombeve të Bashkuara në Kosovë (UNMIK) Soren Jessen-Petersen u ka bërë thirrje të gjitha partive politike që garuan për zgjedhjet e përgjithshme të 23 tetorit, që të respektojnë rezultatin e tyre.

“Duhet të dëgjojmë zërat e atyre që votuan dhe ta respektojmë vendimin e tyre. Kanë fituar Kosova dhe banorët e saj dhe askush që dëshiron një të ardhme më të mirë për Kosovën, nuk duhet ta konsiderojë veten
humbës,” ka deklaruar zoti Petersen.

Shefi i UNMIK-ut apeloi gjithashtu për formimin sa më të shpejtë të qeverisë së re, menjëherë pas shpalljes së rezultateve përfundimtare të zgjedhjeve.

Ai tha se qeverisë së re të Kosovës do t’i besohen kompetenca të reja të rëndësishme dhe se përparësia kryesore e saj duhet të jetë zbatimi i standarteve dhe arritja e përparimit në krijimin e një shoqërie
multietnike në Kosovë.