Koshtunica thotë se serbët kanë të drejtë të mos votojnë

Kryeministri serb thotë se me mosdaljen në zgjedhje, serbët kanë dërguar mesazhin unanim që del nga jeta e tyre e padurueshme: "Është e nevojshme që njerëzit të gëzojnë të drejtën elementare për të jetuar në mënyrë që të votojnë për përfaqësuesit e vet," thotë ndër të tjera në deklaratë, kryeministri serb, Vojisllav Koshtunica.

Një qëndrim të tillë e konfirmon edhe zëdhënësi i partisë së zotit Koshtunica, Andrija Maldenoviq:

"Kjo vërtet është shenjë se serbët nga Kosova i kanë drejtuar një mesazh të qartë UNMIK-ut, dhe bashkësisë ndërkombëtare se ata, në kushte të tilla, nuk mund të dalin në zgjedhje dhe prandaj pozita e tyre duhet të ndryshojë rrënjësisht. Çështjet kryesore për të cilat flasin serbët që prej katër vjetësh dhe që natyrisht, tani po mundohet edhe qeveria serbe t'i shkrijë në një zgjidhje zyrtare përmes planit për Kosovë e Metohi, janë siguria, liria e qarkullimit, kthimi dhe gjithë ato që bëjnë pjesë në korpusin e të drejtave themelore të njeriut."