Botuar: E hënë , 30 gusht 2004 - 15:52 CET

Arrestohen ata që protestojnë për të zhdukurit

Shënimi i ditës ndërkombëtare të personave të zhdukur në Prishtinë është shoqëruar me arrestimin e disa personave që u liruan pas 3 orësh.

Që në orën tetë të ditës së hënë, më shumë se 100 veta, kanë bllokuar njërën prej rrugëve kryesore të Prishtinës, me qëllim që çështjen e të zhdukurve në Kosovë, ta nxjerrin përsëri në krye të rendit të ditës.

Policia ka kërkuar që protestuesit të largohen nga rruga, mirëpo këta të fundit kanë refuzuar kërkesën e policise.

Më pas ajo ka ndërhyrë me forcë, ka arrestuar disa protestues dhe ka liruar rrugën.

Policia e UNMIK-ut thotë se organizatorët e kësaj proteste kanë kërkuar dhe kanë marrë lejen për organizimin e një proteste njëditëshe, e cila do të shënonte ditën ndërkombëtare të të zhdukurve, mirëpo nuk kanë marrë leje për të bllokuar rrugë.

Malkolm Ashbey, zëdhënës i policisë për rajonin e Prishtinës, ka thënë se protestuesit kanë qenë ata që e kanë shkelur marrëveshjen.

"Ne kemi biseduar me organizatorët e kësaj proteste disa ditë më parë dhe u kemi thënë se ata mund të protestojnë përpara Teatrit Kombëtar dhe ata kanë thënë se kështu edhe do te veprojnë dhe nuk do t'i bllokojnë rrugët, por ka ndodhur e kundërta. Ata i kanë bllokuar rrugët, prandaj ne kemi qenë të detyruar t'i arrestojmë disa individë".

Ibrahim Makolli, Sekretar i Këshillit të Prishtinës për të Drejtat e Njeriut, i ka cilësuar të dhunshme sjelljet e policisë.

" Ajo që është parë sot në Prishtinë, në ditën ndërkombëtare për persona të zhdukur, nuk do koment. Njerëzit që nuk dijnë asgjë për fatin e më të dashurve të tyre tash e pesë vjet dhe që e përjetojnë një dhunë të tillë nga ana e policisë, kjo është pa koment.

Forma kaq e qetë e protestës dhe ndërhyrja kaq vulgare e policisë së UNMIK-ut, është një diçka që nuk është parë në këto pesë vjetët e fundit.

Madje unë kujtoj se në disa raste, një formë e tillë e dhunës nuk ka ekzistuar edhe para vitit 1999", tha ai.

Burime të organizatave që merren me të drejtat e njeriut në Kosovë dhe me të zhdukurit, thonë se Kosova aktualisht, ka rreth 3 mijë persona që konsiderohen të zhdukur, ose të pagjetur, siç cilësohen.

Ata kryesisht janë persona që kanë humbur pa gjurmë gjatë luftës së fundit.

Çështja e personave të zhdukur në Kosovë ka qenë njëra prej çështjeve më të komplikuara, jo vetëm për shkak të numrave që nuk janë përputhur asnjëherë, por edhe për shkak të hezitimit të autoriteteve të Beogradit për të bashkëpunuar më ngushtë me përfaqësues të Kosovës.