Vende të reja pune për 900 veta

Administrata ndërkombëtare në Prishtinë dhe qeveria e Kosovës bënë të njohur të hënën një projekt për hapjen e vendeve të reja të punës për afro 900 veta.

Janë një milionë euro që shefi i ri i misionit të OKB-së në Kosovë, Soren Jesen Petersen premtoi të sigurojë për një projekt të ri të punësimit, fond i cili do të mund të rritet me një shumë simbolike të ofruar edhe nga qeveria e Kosovës.

Misioni i Kombeve të Bashkuara dhe qeveria e Kosovës thonë se fondi për punësim, i caktuar pas një takimi të kryeadministratorit dhe kryeministrit të Kosovës, pritet të realizohet nga Programi për Zhvillim i Kombeve të Bashkuara.

Kryeministri, Bajram Rexhepi tha se me këtë projekt të përbashkët synohet punësimi i një numri të caktuar të qytetarëve të Kosovës, qoftë në punë të përkohshme, qoftë afatgjatë.

"Ne kemi shpresë që më vonë, donatorë të ndryshëm të derdhin mjete të tjera në këtë fond duke krijuar më shumë mundësi për hapjen e vendeve të punës," tha zoti Rexhepi.

Projekti për punësim parashikon hapjen e vendeve të punës për afro 900 persona të moshave nga 18 deri në 30 vjeç, fillimisht në tri komuna, ndërsa më vonë planifikohet të zgjerohet edhe në komuna të tjera.

Rreth 30 për qind e numrit të përgjithshëm do të punësohen për një periudhë afatgjatë, ndërsa të tjerët do të angazhohen për një periudhë gjashtëmujore.

Sipas një hulumtimi të Ministrisë së Punës dhe Mirëqenies Sociale, vetëm gjatë vitit të kaluar janë regjistruar mbi 280 mijë njerëz që kërkojnë punë që në përqindje do të thotë rreth 43 për qind njerëz të papunë, ndonëse burime gjysmëzyrtare thonë se përqindja mund të jetë edhe më e lartë.

Kjo për arsye se një numër i madh i të papunëve nuk regjistrohet fare.

Aktualisht Kosova numërohet ndër vendet më të pazhvilluara të rajonit dhe, sipas të dhënave të Bankës Botërore, shkalla e varfërisë arrin rreth 52 për qind, ndërkohë që vlerësohet se 15 për qind e popullatës jeton në një varfëri të skajshme.