Kryeministri i Kosovës tha se vota do të ishte për të ardhmen e Kosovës

Serbët e Kosovës akoma nuk kanë dhënë përgjigje, nëse do të marrin pjesë në këto zgjedhje. Ata thonë se janë në pritje të një vendimi të qeverisë në Beograd, rreth kësaj çështjeje.

Shtypi i Beogradit, duke cituar burime serbe në Kosovë, shkruan se qeveria e Beogradit mund të marrë një qëndrim pozitiv rreth pjesëmarrjes së serbëve në zgjedhje, mirëpo për momentin zërat për këtë çështje janë të ndara.

Kryeministri i Kosovës, Bajram Rexhepi i ka drejtuar një thirrje publike të gjithë qytetarëve të Kosovës, në veçanti serbëve që të marrin pjesë në këto zgjedhje. Ai në thirrjen e tij ndër të tjera shkruan:

“Si kryeministër i Kosovës, në përpjekje për të dhënë ndihmesën maksimale në mbajtjen e zgjedhjeve sa më gjithëpërfshirëse, i ftoj të gjithë qytetarët e Kosovës dhe në veçanti komunitetin serb që të marrin pjesë në zgjedhjet e përgjithshme parlamentare e të shfrytëzojnë të drejtën e tyre të ligjshme për të votuar, si mundësi kryesore institucionale për të bërë ndryshime thelbësore në jetën e tyre ekonomike, politike, sociale dhe të tjera, " tha kryeministri Rexhepi.

Siç njofton korrespondenti i BBC-së, mbajtja e zgjedhjeve të qeta, të lira dhe të ndershme është një ndër standardet kryesore që duhet përmbushur.

Angazhimi i të gjitha komuniteteve dhe përmbushja e detyrimeve qytetare në këtë drejtim janë më se të domosdoshme.