Jon Devitt Korrespondent politik i BBC-së

Lordi Butler kritikon procedurat e vlerësimit të të dhënave

Por raporti i Lordit Butler ka arritur në përfundimin se nuk kishte prova për shtrembërim të qëllimshëm apo neglizhencë të dënueshme dhe në mënyrë specifike ka bërë thirrje që kryekoordinatori i shërbimeve të zbulimit, John Scarlett, të mos japë dorëheqje.

Pesë muaj hetimesh të hollësishme kanë nxjerrë përmbledhjen më të mirë deri tani mbi mënyrën se si Britania ka arritur në përfundimin se Iraku, nën sundimin e Sadam Huseinit, përbënte kërcënim serioz dhe aktual.

Raporti pranon se janë bërë gabime ndërsa qeveria po e ashpërsonte politikën e saj.

Në veçanti, ka patur pak të dhëna të siguruara nga agjentë dhe raporti thotë se cilësia e disa prej tyre ishte vënë në dyshim.

Lordi Butler kritikon procedurat e vlerësimit që janë përdorur mëpastaj.

Kritika ka edhe për mënyrën se si i janë paraqitur publikut ato të dhëna.

Dobësi serioze përbën fakti se paralajmëret mbi kufizimet e të dhënave nuk janë bërë të qarta, tha Lordi Butler.

Por në përgjithësi, raporti thekson se agjencitë e zbulimit nuk kanë qenë fajtore për shtrembërim të qëllimshëm ao neglizhencë të dënueshme.

Ai madje shkon aq larg sa thotë se personi përgjegjës për bashkërenditjen e informatave, John Scarlett, duhet t'i rezistojë thirrjeve për dorëheqjen e tij.

Raporti përmban kritika edhe për stilin e qeverisjes së zotit Blair. Ka ankesa edhe për mënyrën e marrjes së vendimeve. Shumë dokumente të shkëlqyeshme, thuhet në raport, nuk u diskutuan në mënyrë kolektive nga ministrat e lartë, duke i vështirësuar kujtdo që nuk bënte pjesë në një rreth të vogël, që të shprehte gjykimin politik mbi vendime të mëdha.

Kryeministri Tony Blair tha se ai i pranonte konkluzionet dhe mori përsipër përgjegjësinë personale për mënyrën se si ishin paraqitur të dhënat e shërbimeve të zbulimit, por ai tha se të gjitha dyshimet lidhur me vullnetin e mirë të qeverisë së tij duheshin lënë mënjanë.

Në përgjigje ndaj raportit të Butler-it, ish-kryeinspektori i armëve i OKB-së Hans Blix tha se ai i kishte thënë direkt zotit Blair se nuk ishin gjetur prova për armë të shkatërrimit në masë.

Zoti Blix i tha BBC-së se Lordi Butler kishte të drejtë kur përfundonte se të dhënat e shërbimeve të zbulimit është dashur të rivlerësoheshin me punën e inspektorëve të OKB-së.