Inistitucionet kosovare nuk pranuan planin austriak

“Ka dy elemente të planit që nuk përputhen me realitetin e krijuar në Kosovë”, thonë përfaqësuesit shqiptarë në institucionet kosovare, duke numëruar fillimisht çështjen e shtyerjes së bisedimeve për të ardhmen e saj dhe së dyti ofrimin e një autonomie më të madhe për pakicat në Kosovë.

Zyra e kryministrit të Kosovës, thotë zëdhënësja e zotit Rexhepi, Mimoza Kusari, e ka cilësuar “pjesërisht pozitiv” planin, në veçanti në pjesët ku flitet për fuqizimin e institucioneve vendore dhe zhvillimin ekonomik të Kosovës.

Por sipas saj, shtyrja e zgjidhjes së statusit përfundimtar të Kosovës, nuk është në përputhje me realitetin e krijuar.

“Për arsye se është vlerësuar se si një prej mangësive për pushtetin vendor, është mungesa e përgjegjësive të tyre ose përzierja e tyre me ato të UNMIK-ut. Sërish kryeministri qëndron prapa qëndrimit se mesi i vitti 2005 duhet të shënojë datën kur duhet të hapet për diskutim çështja e statusit përfundimtar për Kosovën”, tha znj. Kusari

Reagimi nga kuvendi

Por kundërshtimi më i fuqishëm ndaj planit austriak është bërë nga këshilltari politik i kryetarit të Kuvendit të Kosovës, Ramush Tahiri, i cili duke pohuar se plani në versioin e dhënë shkakton telashe. Sipas tij ka një numëruar arsye për refuzimin e këtij plani.

“Minoritetet në Kosovë nuk përbëjnë më shumë se 10 përqind të popullsisë së përgjithshme. Vendbanimi i tyre është i përzier dhe mbi këtë bazë ne nuk mund të krijojmë enklava të reja apo autonomi politiko-teritoriale të cilat do të lidheshin në nivelin kosovar, ashtu si e ka Belgjika apo Zvicra.
Kjo do të çonte në ndarje dhe do të shënonte një përiudhë kaluese që do ta bënte ndarjen e Kosovës faktike të cilën po synojmë të mos e bëjmë”, thotw z. Tahiri

Reagimi serb

Ndërkohë serbët e Kosovës kanë shfaqur siç thonë “habi” me garën për paraqitjen e njëkohësishme të një numri të planeve për Kosovën.

Gojko Saviq, anëtar i kryesisë së Kuvendit të Kosovës, nga rradhët e koalicionit serb Kthimi, thotë se plani paraqet një zgjidhje që do të kënaqte edhe njërën por edhe palën tjetër.

“Ky plan ofron një autonomi më të gjërë për serbët në enklavat ku jetojnë. Por, njëkohësisht i jep bashkësisë shqiptare pustet shumë më të madh ose i lë në duart e vetëqeverisjes lokale shumë gjëra.
Unë shpreh habinë jo vetëm për planin austriak, por ne kemi patur mundësi të shohim edhe plane individuale, të cilat ofrojnë zgjidhje të decentralzimit. Prej nga, kjo garë se plani i kujt do të jetë më i mirë? pyet Gojko Saviq.

Plani austriak, që përmban elemente të decentralizimit të pushtetit në Kosovë, shënon vetëm njërin nga planet në këtë rrafsh.

Pas planit të qeverisë së Serbisë janë ofruar edhe plane të tjera, në mesin e të cilëve edhe ai i kryesisë së Kuvendit të Kosovës, i quajtur edhe “plani i Dacit”.

Përfaqësuesit e serbëve të Kosovës ndërkaq kanë vazhduar të insistojnë në decentralizim, meqë kjo do të nënkuptonte më shumë përgjegjësi për komunat ku ata përbëjnë shumicën, kurse sipas planit të qeverisë së Serbisë kjo do të krijonte autonomi brenda territorit kosovar.

Ata madje kanë paralajmëruar se do të mund të bojkotonin zgjedhjet e tetorit në Kosovë në rast se nuk marrin garanca për fillimin e decentralizimit të pushtetit.