UNMIK emëroi anëtarë e KQZ

Organi përgjegjës për organizimin dhe administrimin e zgjedhjeve parlamentare të 23 tetorit përbëhet nga 12 anëtarë, prej të cilëve 3 janë ndërkombëtarë, ndërkaq të tjerët përfaqësues vendorë të të gjitha komuniteteve.

Në ceremoninë e themelimit, mungoi vetëm anëtari i partisë më të madhe parlamentare, ai i Lidhjes Demokratike të Kosovës (LDK).

Kryesues I Komisionit Qëndror të Zgjedhjeve është caktuar shefi i misionit të OSBE-së, ambasadori Pascal Fieschi.

“Mendoj se ne ende kemi një punë mjaft të madhe për të kryer deri në zgjedhjet e ardhshme, do të nxirren rregullat elekorale dhe do të bëhet menaxhimi i përgjithshëm i procesit zgjedhor gjatë muajve të ardhshëm”, tha ambasadori Fieschi.

“Jam i bindur se të gjithë së bashku do të jemi shumë të suksesshëm dhe do t’i bëjmë këto zgjedhje të lira dhe demokratike në Kosovë”, shtoi ai.

Ndërkaq kreu i UNMIK-ut, Charles Brayshow uroi anëtarët e Këshillit Qëndror të Zgjedhjeve, për siç tha “punën e rëndësishme që do të bëjnë ata gjatë muajve të ardhshëm për të siguruar një garë të drejtë dhe të lirë politike”.

“Ne presim nga Komisioni Qëndor i Zgjedhjeve të luajë rolin kryesor në shoqëri për të siguruar se po përmbushen premtimet e bashkësisë ndërkombëtare për demokraci në Kosovë që është diçka krejtësisht e re, sepse ne e dimë që vetëm me mandatin që vie nga populli, i shprehur në mënyrë të lirë dhe demokratike, mund të besojmë në paqë dhe qetësi për të ardhmën”, tha z.Brayshow.

Zgjedhjet parlamentare të 23 tetorit janë të katërtat me radhë që mbahen pas luftës në Kosovë nën organizimin e misionit të OSBE-së.

E vetmja risi e zgjedhjeve të sivjetme, është se përgjegjësia e punës së Sekretariatit të Këshillit Qëndor të Zgjedhjeve u është lënë vendorëve, mirëpo ky i fundit është një organ teknik dhe jo vendimmarrës.