Gabriel Partosh Analist i BBC-së për çështje të Evropës Juglindore

Gjendje e tensionuar në Kosovë

Ka shumë sidomos në anën e shqiptarëve që ndoshta janë ekstremistë të cilët nuk duan të flasin me Beogradin derisa Kosova të fitojë pavarësinë, dhe vetëm pastaj ata mund ta flasin me Beogradin në pozitën e dy shteteve të pavarura.

Pra, mund të ketë ardhur prej atyre që janë kundër këtij procesi. Mund të jetë spekulim, por autorët e sulmit me granatë ndaj rezidencës së presidentit Rugova, mund të jenë prej atyre që janë kundër dialogut.

Një arsye tjetër është se periudha e tanishme në Kosovë për shkak të zhvillimeve është mjaft e tensionuar.

Në fund të këtij muaji kemi përvjetorin e fillimit të bombardimeve të NATO-s.

Është kjo një kohë e vështirë që shqiptarëve u kujton luftën, spastrimin etnik, vrasjet masive nga forcat serbe të sigurisë. Serbëve ndërkaq u kujton ngjarjet e pas luftës, vrasjet për hakmarrje dhe shpërnguljet.

Pra, që të dyja palët janë të ngarkuara dhe janë gati të shpërthejnë, siç ndodhi në Mitrovicë.

Një tjetër arsye mund të jenë edhe deklarimet e kryeministrit të ri të Serbisë, zotit Koshtunica, për kantonizimin e Kosovës.

OKB-ja është kundër kësaj ideje, politikanët shqiptarë janë kundër, ekstremistët janë shumë të revoltuar.

Ajo që është më e rëndësishmja është se këtë vit në Kosovë mbahen edhe zgjedhjet e përgjithshme. Fushata zgjedhore, jo zyrtarisht fillon para kohe, politikanët duan të komunikojnë në një nivel, ekstremistët duan të komunikojnë përmes dhunës.

Po, a mund të ishte bërë diçka më shumë me qëllim që të parandaloheshin përmasat e tilla të dhunës?

Në fakt, ajo që ndodhi në Kosovë, ndodhi si papritmas, pasi në dy-tre vitet e fundit ka qenë një situatë relativisht e qëndrueshme, ka pasur përmirësime të situatës së sigurisë.

Edhe në të kaluarën ka patur dhunë sporadike, por jo e përmasave si kjo, jo me një lëvizje të koordinuar në disa pjesë të Kosovës dhe me përfshirjen e një numri të madh njerëzish.

Forcave të sigurisë u duhet të përgatiten më mirë gjatë ditëve të ardhshme për të marrë në dorë situatën që duket se po del jashtë kontrollit.

Dhe, në këtë rrafsh, si shikohet e ardhmja e dialogut kosovaro-serb në një periudhë afatshkurtër?

Dhuna ka tendencën e një kthimi prapa, ngjarjet mund të kenë një ndikim shumë dëmtues.

Prandaj, ajo që mund të bëhet është angazhimi për t'i dhënë fund dhunës, që situata të kthehet në normalitet dhe që ndjenjat e forta të shuhen gradualisht.

Elementi i zhvillimeve pozitive do të jetë rivënia në binarë e procesit të zbatimit të standardeve.

Askush nuk mund të thotë se situata është në rregull. Të gjithë në Kosovë do të duhet të dyfishojnë përpjekjet e tyre për normalizimin e gjendjes.

Mendoj se bisedimet pas njëfare kohë do të rifillojnë, sepse ato kanë si qëllim t'u shërbejnë të dyja palëve për përmirësimin e standardit të jetesës, sidomos për përmirësimin e infrastrukturës energjitike e asaj rrugore, megjithëse e gjithë kjo do të zhvillohet në një mjedis më të rënduar politik.