NATO dërgon përforcime trupash në Kosovë

Pjesa e parë e forcave shtesë e përbërë nga trupa amerikane në Bosnjë janë në rrugë e sipër dhe trupat e tjera do të dërgohen së shpejti.

Sipas agjencive te lajmeve, Britania do të dërgojë deri në 750 trupa shtesë në Kosovë. Ende nuk dihet numri i saktë i trupave dhe koha se kur do të mbërrijnë këto trupa në Kosovë.

Zëdhënës i zyrtar i kryeministrit britanik Toni Bler, sipas AFP-së, i ka thënë gazetarëve se vendimi për dërgimin e përforcimeve ishte "konfirmim i faktit se ne i përmbahemi përgjegjësive tona në Kosovë seriozisht".

Zëdhënësi i NATOs James Apatherai tha se aleanca ka tre kompani që janë në pritje për t'u dërguar në Kosovë.

"Një kompani nga SFOR po shkon në Kosovë për të qenë në dispozicion të komandantit të forcave atje ... dhe dy të tjerat janë në pritje," tha ai.

Zëdhënësi i NATO-s tha për BBC-në se në Kosovë ndodhen 17 mijë trupa të KFOR-it dhe "komandanti i forcave atje beson se forcat që janë atje janë të mjaftueshme për të vendosur rendin."

"Forcat që po dislokohen tani atje janë ekstra dhe do të ndihmojnë në një kthim të shpejtë të stabilitetit dhe ato janë tregues i dukshëm i vullnetit dhe aftësisë së NATO-s për ta bërë këtë," tha zëdhënësi Apatherai.

Nuk ka panik

Zëdhënësi i NATO-s tha se në radhët e aleancës "nuk ka panik".

"Rritja e dhunës, përleshjet dhe dhuna në Ballkan dhe në Kosovë veçanërisht është diçka që fatkeqësisht ndodh," tha ai.

"Kjo këtë radhë ka qenë një revoltë e madhe dhe KFOR po punon me autoritetet e OKB-së dhe autoritetet në terren për të vendosur rendin," tha zoti Apatherai.

Zyrtari i NATO-s pranoi se trazirat në Kosovë po zgjerohen, por shtoi se aleanca ka burimet e nevojshme në terren.