Dokumentet e publikuara në faqet e Wikileaks, veçanërisht ato që dokumentojnë vlerësimet e emisarëve amerikanë për udhëheqësit botërorë, e kanë bërë Uashingtonin të skuqet. Kryeministri rus Vladimir Putin përshkruhet me tallje si "Qeni Alfa " ...

... ndërkohë që presidenti Dmitri Medvedev përshkruhet se luan rolin e "Robin" përkundër zotit Putin që luan "Batman." Një zëdhënës i presidenit u tha gazetarëve: "personazhet fiktive të Hollywood-it nuk kanë nevojë për koment."

Sipas një telegrami, Silvio Berluskoni "duket gjithnjë e më shumë si zëdhënës i Vladimir Putin" në Evropë.

Një telegram tjetër e përshkruan kryeministrin italian si "vanitoz dhe të paefektshëm si lider evropian modern." Një ambasador thotë se ai është "i dobët fizikisht dhe politikisht," dhe i lodhur nga mbrëmjet pa fund.

Fjala e përdorur për të përshkruar kancelaren gjermane Angela Merkel ishte "Teflon" - që do të thotë se ajo nuk përlyhet nga gjërat e këqija. Një diplomat thotë se ajo nuk rrezikon dhe "rrallëherë është krijuese."

Dokumentet e përshkruajnë Presidentin Nikolas Sarkozi si "te ndjeshëm". Ambasada e SHBA e quan atë "të ndjeshëm dhe autoritar," duke vënë në dukje qortimet ndaj ekipit të tij. Por, ndoshta përshkrimi më i pakëndshëm që i bëhet është "perandori lakuriq."

Një nga telegramet e dërguara nga Kabuli njofton se presidenti afgan, Hamid Karzai, është " njeri jashtëzakonisht i dobët që nuk u kushton vëmendje fakteve. "

Udhëheqësi libian, Muamar Gadafi, thuhet se shoqërohet kudo nga infermierja ukrahinase --"bjondja argëtuese".

Në një telegram të 2007-tës, një diplomat e përshkruan presidentin e Zimbabves, Robert Mugabe si "më të zgjuarin dhe më të pamëshirshmin se çdo politikan tjetër në Zimbabve." Ai e cilëson atë si një "strateg të shkëlqyer."