Aktori komik Sër Norman Wisdom ka vdekur në moshën 95 vjeç. Familja e tij tha se ai vdiq në një shtëpi për të moshuar në Isle of Man, te hënën në mbrëmje, pasi pësoi disa hemoragji cerebrale gjatë gjashtë muajve të fundit.

Në vitin 1976, Sër Norman ishte një nga interpretuesit në një program të veçantë të BBC-së, "Një Jubile Muzike"- që u organizua për të festuar jubileun e argjentë të Mbretëreshës një vit më vonë. Ai këndoi këngën e tij të njohur Don't Laugh At Me ('Cause I'm a Fool).

Sër Norman u bë një figurë kulti në Shqipëri, ku filmat e tij ishin ndër filmat e paktë nga perëndimi që lejoheshin të çfaqeshin në vend.

Sër Norman, të cilit ju dha titulli i kalorësit (Sër) në vitin 2000, ishte i njohur për një sërë rolesh komike. Charlie Chaplin e përshkroi atë si kllounin e tij të preferuar.

Ylli i lindur në Londër e filloi karrierën e tij kinematografike në vitin 1948. Me veshjet e tij karakteristike, kapelen dhe kostumin që nuk i përshtatej përmasave të trupit të tij, ai luajti në më shumë se 20 filma përfshirë këtu "Trouble in Store" të vitit 1953 .

Ai fitoi çmimin Bafta për një shfaqje të rrallë si një pacient i sëmurë nga kanceri në dramën e vitit 1978, Going Gently.

Dhe në vitin 1998, ai përsëri e la komedinë mënjanë për një rol në serialin e gjatë televiziv, Casualty.

Puna e tij më vonë përfshin rolin e përsëritur të Billy Ingleton, në një serial të gjatë për BBC-në, "Last of the Summer Wine".

Vitet e fundit të jetës i kaloi në Isle of Man. Por ai vazhdoi të luajë edhe pse në moshë të thyer, duke u cituar si burim ndikimi dhe frymëzimi në formimin e tij nga një tjetër komedian britanik trup-vogël, Lee Evans.