Presidenti francez Nicolas Sarkozi është martuar me të dashurën e tij, këngëtaren Karla Bruni, në një ceremoni të organizuar në Pallatin Elysee në Paris.

Marrdhëniet e zonjës Bruni me zotin Sarkozi filluan pak kohë pasi presidenti u divorcua nga gruaja e tij e dytë Cecilia, në muajin tetor 2007.

Mendohet se zoti Sarkozi u njoh me zonjën Bruni gjatë një darke në Paris. Nga mesi i dhjetorit, mjetet franceze të informimit zienin prej thashethemeve se ata po bëheshin gati për tu martuar

Kjo lidhje u konfirmua zyrtarisht në kohën kur çifti shkoi për pushime në Lindjen e Mesme i shoqëruar nga një numër i madh gazetarësh dhe fotografësh.

Zonja Bruni ishte një nga foto-modelet më të paguara dhe është mësuar të jetë në qendër të vëmendjes. Nëna e saj ishte një pianiste ndërsa babai kompozitor dhe trashëgimtar i biznesit të gomave CEAT.

Lidhja e shpejtë e çiftit koinçidoi me një rënie në popullaritetin e zotit Sarkozi. Kritikët e akuzojnë presidentin për ekspozim në publik të jetës së tij private.

Çifti duke shëtitur në parkun e Versajës në afërsi të Parisit një ditë pas ceremonisë së martesës. Ata shoqërohen nga industrialisti italian Maurizio Remmert dhe bashkëshortja e tij.