Lejimi i importit të mbetjeve për përpunim, ka ngjallur debat

Një numër vendimesh të qeverisë i kanë hapur rrugën importimit pa vështirësi të mbetjeve nga vendet e BE-së e me gjerë.

Qeveria thotë se këto vendime janë në përputhje me normat europiane.

Por, veprimtarë të mbrojtjes së mjedisit e shohin me shqetësim këtë zhvillim.

Ata dyshojnë se bashkë me mbetjet e lejuara mund të vërshojnë edhe mbetje toksike apo substanca të tjera të rrezikshme.

BBC-ja pyeti për këtë edhe Ministrin e Mjedisit, Fatmir Mediu.

Dëgjoni diskutimin e drejtuar nga Ilir Kadia i BBC-së.

Po ju çfarë mendoni për këtë çështje?

Sa bazë ka shqetësimi i ambjentalistëve se në Shqipëri mund të hynë edhe substanca të rrezikshme?

Ju mund të bëni komentet tuaja duke plotësuar formularin në të djathtë.

Disa nga komentet tuaja

Tema mjaft interesante. Ajo që mua më shqetëson është fakti se në Shqipëri ka aq shumë mbeturina të prodhura nga vetë shqiptarët dhe nuk ka pse të vijnë të tjera nga Evropa. Ah, po. Qeveritë e mëparshme dhe kjo e tanishmja kanë një zgjidhje. I thonë Europës: "Na i hap dyert, na hiq vizat dhe na prano në BE, pasi plehrat tuaja i mbajmë ne". Që të përfitosh duhet edhe të japësh. Kompromisi del fare hapur si drita e diellit. "Pranoj mbeturinat e tua që të më pranosh në shtëpinë tënde BE". Sa keq për Shqipërinë tonë të bukur që do të kthehet në kosh plehrash nga disa persona që janë vetë plehra.
Myrtezai, Pekin

Qeveria thënka se importi i plehrave në atdhe qenka në përputhje me normat Evropiane? Këto norma pse nuk sqarohen? Si,qysh,sa, kanë marë plera shtetet e jere te BE? ka o s'ka perpjestim me siperfaqen kjo pune? Me mundesitë teknologjike të neutralizimit të tyre, të kontrollit të tyre kanë ose jo radioaktivitet, viruse, bakterie. Edhe SHBA përpunon plehrat e saj, por ka superteknologji që i neutralizon, katër lloj makinash vijnë tek dera familjare për ndarjen e plehrave që në trasportim. Buldozierë gjigandë hapin gropat në vende të studiuara dhe i mbulojnë duke mbjellë sipër bar, që s'të shkon mendja se nën të dekompozohen plehrat ndër vite. I ka Tirana këto lloj këllqesh për plehrat që askush se di sa do vijnë, si e qysh. Nga që jemi fukarenj dhe na gënjejnë me ca para, që s'mbulojnë kurrë dëmet e më vonëshme të plehrave. Ne s'komandojmë dot plehrat që kemi, si merren të tjerat?
Ligor Luarasi, Filadelfia, SHBA

Nuk mendojnë për popullin, por mendojnë për xhepin e tyre gjithë kohën. Dashkan ta bëjnë Shqipërinë Afrikë...!
Andino Binaj, Londër, UK

Ky është skandali i radhës dhe është mjelgullnajë për të fshehur problemet e thella socjale. Është shumë ironike hapja e këtij debati do të thoja. Ky debat filloi me qeverinë Nano rreth vitit 2000 dhe Kryeministri Berisha (atë kohë në opozitë) ishte kundërshtari më i flaktë: E mbaj mend dilte ç'do ditë me megafon nëpër rrugë dhe bërtiste për plehrat e klaneve mafjoze etj. Në atë kohë pati reagime të ashpra dhe nga shoqëria civile dhe OJQ-të si Mjaft. Jam pak i zhgënjyer nga reagimi i vakët i shoqërisë civile Shqiptare. Rreziku i këtij projekti është : E para - se ne nuk kemi mekanizmat e duhura të kontrollojmë se ç'farë mbetjesh do hyjnë : E dyta - nuk kemi zgjidhur problemin e mbetjeve që kemi këtu dhe jo të importojmë ato të Evropës : E treta - kompanitë e mbetjeve urbane në Italinë e jugut të cilat kontrollohen nga Mafja po këkojnë mënyra të reja më të lira të azgjësimit të mbetjeve të rrezikshme si ato toksike dhe bërthamore dhe Shqipëria është vendi ideal për tu abuzuar. Shqipëria ka nevojë për një strategji mbarkombëtare të studjuar mirë për manaxhimin e mbetjeve urbane që kemi, të cilat janë bërë problem jetik, dhe jo të fillojmë dhe importojmë. Duhet gjithashtu forcuar dhe kultura qytetare e cila fillohet që nga shkolla, për mbajtjen e një ambjenti të pastër.
Adi, Suedi

E thënë shqiptarçe, turp dhe faqa e zezë. Shqipëria ka shumë kohë që ka qenë vrima e zezë e Europës, tani duan ta bëjnë edhe kosh plehrash.
A. Gjika, Gloucester, Britani

Në asnjë mënyrë të mos importohen mbetjet. Mjaft kemi vuajtur nga mbetjet e çfarëdolloji... Ju lutem, mosni për hir të fëmijëve tanë, ju lutemi...
Luan Bregu, Malishevë