Piramida aktualisht është Qendër Ndërkombëtare e Kulturës

Kryeministri Sali Berisha thotë se ndërtesa, e njohur si 'Piramida', do të shembet dhe vendin e saj në 100-vjetorin e pavarësisë do ta zërë tempulli i demokracisë.

Opozita e kundërshton idenë e prishjes së vetë ndërtesës, por sugjeron përshtatjen e ndërtesës aktuale.

Disa mendime në mikrifonin e BBC-së

Ka mendime se prishja e Piramidës dhe ngritja e një ndërtese të re do të rëndojë buxhetin por kryeminstri Berisha tha se nuk mundet që në mes të Tiranës 'të nxijë piramida e ndërtuar për të përjetësuar kujtimin e diktatorit më të egër të Evropës së pasluftës'.

Zoti Berisha bëri thirrje që ndërtimi të realizohet para vitit 2012, kur do të festohet 100-vjetori i shpalljes së Pavarësisë së Shqipërisë.

Autoritetet kërkojnë të ngrejnë një komitet që do të ndjekë punën për këtë çështje që nga studiot që do bëjnë projektin, deri në zbatimin e tij si dhe të organizojnë një konkurs ndërkombëtar për parlamentin e ri.

Po ju çfarë mendoni për këtë çështje? A duhet ngritur ndërtesa e parlamentit të ri te Piramida? Si duhet vepruar me objektet e ndërtuara gjatë kohës së regjimit komunist?

Ky forum diskutimi i BBC-së mbyllet!

I falenderojmë të gjithë ata që kanë dërguar komentet e tyre të shumta për këtë temë kaq të debatueshme.

Megjithatë kjo temë do të vazhdojë të jetë e pranishme në faqet e BBC-së dhe ju do të keni mundësi të shprehni opinionin tuaj.

Komentet tuaja

Ju lutem me falni që se kuptoj dot këtë politikë që po zbatohet në vendin tonë. Por thjesht do të ngreja këto pyetje: Sa të pasur jemi ne që duam të prishim gjithçka që është ndërtuar me mund dhe djersë? Cili do të jetë beneficienti kryesor në ndërtimin e këtij parlamenti duke shembur një vlerë tjetër? Vallë Tirana nuk ka hapësira më të përshtatshme për ndërtimin e një parlamenti? Është e dhimbshme të dashur qytetarë të shohësh të tilla vendime që bazohen në ide staliniste me qëllimin e vetëm të prishin ç'ka do, vetëm të shënojnë emrin e tyre në faqet e të ashtu-quajturës histori e politikës shqiptare!
Luli Nuredinaj, Sofje, Bullgari

Është tepër e vështirë që të bëhemi europjanë duke patur kaq shumë nostalgjikë të Enverit. Le të shkojnë të gjithë ithtarët e Enverit e të marrin nga një copë piramide e t'a ruajnë si kujtim. Të dalësh hapur në mbrojtje të muzeut të Enverit është më shumë se guxim; është ENVEROMANI!
Nikoll Dakaj, Nju Jork, SHBA

E para e punës nuk e kuptoj se pse me vendndodhjen e parlamentit të ri duhet të merren parlamentarët dhe jo një komision urbanistësh që të përgjigjen për plan-urbanistikën e Tiranës. E dyta nuk e kuptoj se pse çdo ndërtesë duhet ndërtuar anash bulevardit kryesor. Pse nuk mendohet që Tirana, ashtu si shumë qytete europiane, të ketë më shumë se një qendër. Mendoj se ndërtimi i një parlamenti me lulishte e hapësira në një zonë tjetër, le të themi te Shqiperia Sot, do ti jepte më shumë frymëmarrje Tiranës dhe do të lironte edhe qarkullimin nga makinat zyrtare në bulevardin e mbingarkuar. Nuk ma ha mendja se Shqipëria është aq e pasur sa të ndërtojë duke shkatërruar ndërtesa të tilla me vlera arkitektonike si Piramida. Sa për ngarkesën ideologjike që i vishet pastaj ndërtesës, nuk dua të merrem. Se pastaj i bie të prishet edhe Komiteti Qendror si komunist, UT si nazist (Zyrat e Gestapos) dhe vetë bulevardi i qe mban akoma formën e sëpatës së Liktorit, si fashist kurse Pallati i Kulturës si revizionist. Harrova ndonjë ndërtesë tjetër ideologjike?
Spiro Ilo, Toronto, Kanada

Kam vërejtur me kujdes diskutimet mbi piramidën! Po të ishte nevoja ta mbroja Berishën, e mbroj vetë si Tropojan që jam, por të gjithë duhet të kenë parasysh një gjë. Edhe Hitleri ka muze që i ka kushtuar Evropës 50 milionë të vrarë. Ky është shkatërrim që i bëhet Shqipërisë dhe vetë popullit shqiptar. Shkatërrimet kanë filluar që nga viti 90 kur u prenë gjitha vreshtat, pyjet ullishtet dhe lëndët frutore, u boshatisën dhe u shkatërruan qytetet, u gjunjëzuan dhe u shkatërruan familjet shqiptare ku dhe u shitën për pjesë dhe për prositucion jashtë vendit mbase dhe varrezat u shkatërruan dhe po shkatërrohen akoma, u vra popullsia dhe ja tani hedhin valle nëpër Tiranë dhe duan të shkulin çdo gjë. Mbase edhe hidrocentralet ,apo gjërave të tjera do tu vijë rradha ...
Besi Tropoja, Kanada

Jam një 40 vjeçar nga Tirana. Jam nga ai brez që u rrit tek''piramida''dhe tek bordurat. Kaluam moshën më të bukur në shkallët e asaj piramide. Dhe ja të gjithë kujtimeve tona u vënë fshesën. I'm born in Tirana, qyteti më i bukur në botë që këta 20 vjetët e fundit e përçudnuan e shfytyruan me lyerje ngjyra ngjyra, njeri me ndërtesa që në bri të tyre kanë dhjetra shitës misrash, me zhdukjen e gjithçkaje të bukur dhe të vlefshme.
Po ne që u rritëm në këto rrugë na pyetën a duam që me paratë tona të flakin tej djersën e prindërve tanë? Për çfarë? Që tu ndërtojmë politikanëve trushkulur shqiptarë një sallë moderne me kolltukë të rehatshëm? Po të kishin një gram llogjike kur një popull ska ujë të lahet nuk i duhen kolltuqet e ''baballarëve''të kombit por një punë, një çezëm që të lahen pas punë dhe një jetë më komode si europianë. Por ja që ''jabanxhinjtë''siç thotë humoristi te portokalli erdhën të na vrasin kujtimet rininë tonë kaluar në këto bordura. Duke u shembur kjo vepër me vlera të veçanta arkitekturore mbulohen dhe fondet ''e harxhuara''o popull tiranas, zgjohuni mos lini te çmendurit t'ju shfytyrojnë qytetin!
Klinton Shabani, Greqi

Për prishjen e piramidës të bëhet referendum, ta thotë fjalën populli, po ose jo. Së dyti të ndërtohet parlamenti i ri, së treti ta thonë specialistët.
Meleq Zerani

Sipas mendimit tim, është jo e drejtë njerëzore ta rrënosh këtë piramidë. Ta rrënosh këtë piramidë do të thotë ta rrënosh të kaluarën e popullit shqiptar, qoftë mirë apo keq, sepse kjo piramidë do te jetë si monument i së kaluarës së hidhur të popullit shqiptar. Kjo piramidë duhet të mirëmbahet mirë dhe të bahet e vizitushme për të gjithë vizitorët që vijnë në Shqiperi, sepse kjo është nji dëshmi e së kaluarës i bëj lutje apo apel zotit Sali Berisha, ... që të mos e rrënoni piramidën ...
Islam Meha, Vejle, Denimarkë

Nuk e kuptoj pse duhet të shembin atë, kur parlamenti s'ka pak që u inaugurua, apo s'ka shirita që të presë kryeministri. Le të shembë pallatet e deputetëve të tij që janë në anë të rrugës. Ata që janë pro prishjes së piramidës besoj se e dinë shumë mirë se me çfarë lekësh. Janë tonat, të taksapaguesve shqiptarë. Ata lekë shumë mirë mund të investohen për furnizimin me ujë të pijshëm të njerëzve, se është turp që në 2010-n kemi njerëz që nuk kanë ujë.
Arta Noli, Tiranë

Prishja e piramidës do të ishte një gabim i madh pasi do të kushtonte shumë nga ana financiare. Sali Berisha çdo gjë e justifikon duke fajësuar komunizmin. Një gjë që më vjen çudi është se Sali Berisha është si mbreti i shqiptarëve. Çdo gjë duhet të marrë lejen nga ai. Për mendimin tim është Ministria e Kulturës që duhet të merret me këtë çështje dhe jo Saliu. Por çfarë të thuash dhe kujt t'ia thuash? A ka institucion në Shqipëri që është i pavarur?
Altin Lapaj, Leeds, Britani e Madhe

Të shkatërrosh pas dy dekadash më duket jo normale. Të ndërtosh një godinë të re me rastin e 100 vjetorit të shpalljes së pavarësisë është mrekulli. Zoti Berisha nuk duhet të harrojë se, edhe po të shembet piramida, ata që kanë përjetuar 45 vite të tmerrshme nuk kanë për t'i harruar për shumë dekada të tjera! Sikurse edhe vitin 1997.
Qerim Osmani, Toronto, Kanada

Shikoj disa komentues që mbrojnë idenë që piramida të shërbejë si muze për të kujtuar të shkuarën. Jam krejtësisht kundër kësaj dhe mendoj që piramida të prishet sa më parë që të jetë e mundur. Sa për muze, kemi plot bunkerë për të kujtuar atë periudhë, për këdo që është nostalgjik. Për nostalgjikë të tillë do të rekomandoja selinë e PS-së si simbol i gjallë i periudhës komuniste.
Fatmir Ramaj, Fort Worth, Teksas, SHBA

Partitë politike në Shqipëri i japin konotacion politik kësaj çështjeje. Aeroportet, portet dhe ndërtesat e institucioneve shtetërore janë fytyra e një shteti kudo në botë. E veçanta e Uashingtonit janë Capitoll Hill(Parlamenti a Kuvendi), Shtëpia e Bardhë dhe ndërtesa të tjera shtetërore. Vetëm në Shqipëri nostaligjikët mburren ende me ndërtimet e diktatorit Hoxha që ndërtoi kultin e tij me këto ndërtesa.
Beqir Sina, Nju Jork, SHBA

Jo, në asnjë mënyrë nuk duhet të prishet piramida me atë pretekst. E nëse ka arsye të tjera kryeministri, ajo është tjetër pune. Më humane do ishte që qeveria shqiptare me ato mjete të ndërtojë shkollat e spitalet anekënd atdheut (jo në Tiranë) që janë për faqe të zezë, ndoshta të ndërtuara prej kohës së mbretit. Veç asaj, a do të ndodhë e njëjta edhe me kryeministrinë, po e pyes Berishën? Sepse Enver Hoxha me partinë atë kryeministri kanë patur... "Kush harron të kaluarën, rrezikon të ardhmen".
Mersini, Strugë

Piramida është pjesë e historisë së Shqipërisë. Planet për prishjen apo rinovimin e kësaj ndërtese nuk mund të jenë rëndom pjesë e luftës politike të çastit. Ky vend ka arkitektë dhe specialistë të aftë që mund të ndihmonin politikën në vendimmarrje. Mënyra arbitrare e të bërit politikë, si ajo e kryeministrit tonë, nuk i shërben gjetjes së një vendimi të drejtë për këtë problem.
Ilirjan Troplini, Siegen, Gjermani

Shqipëria vuajti kaq dekada nën një sistem shumë të egër diktatorial. Besoj se për edukimin e brezave të ardhshëm do ishte me shumë vlerë që të kemi një muze të krimeve të komunizmit. Piramida mund ta luajë këtë rol fare mirë. Përsa i përket parlamentit të ri, mendoj se vendi ka prioritete të tjera në këtë periudhë. Ngritja e një godine lluksoze, simbol të demokracisë, do jetë një shpenzim i pajustifikueshëm për momentin. Mendoj se ky shpenzim duhet shtyrë për një kohë më të vonë, kur ekonomia shqiptare dhe niveli i jetesës të ngrihet në atë shkallë sa të mos jetë i mundur kthimi mbrapa.
Përparim Demi, Tiranë

Le t'i japim gjërave vlerën dhe emrin e duhur. Nga pamja e jashtme, e ashtuquajtura piramidë nuk ka formën dhe bukurinë e një piramide, por më tepër pamjen e një puçrre apo çibani. Kjo ka qenë edhe nofka (ÇIBANI)që ka patur objekti në underground që para 1990-s. Për të kujtuar të kaluarën janë bunkerët e shëmtuar që ia tërheqin vëmendjen vizitorit të Shqipërisë që në ajë, pa e vënë akoma këmbën në tokë. Zoti Berisha, ju lutem, shkuleni atë çiban nga faqja e Tiranës. Le të ndërtohet përmbi të TEMPULLI i fjalës së lirë i popullit shqiptar. Mendoj se këtë e ka fituar TIRANA prej kohësh me djersën e me gjakun e saj.
Anonim, Gjermani

Unë personalisht mendoj se nuk do të ishte normale që kjo të prishet sepse mbetet si një muze edhe është diçka e mirë. Na rikujton diktaturën dhe të kaluarën sado e hidhur të ketë qenë ajo. Une për veten time nuk jam ndonjë përkrahës i regjimit po mendoj se kjo nuk do të ishte e mirë të prishet.
Visar Shehu, Hamburg, Gjermani

Eshtë mirë si koncept të ndërtosh dhe jo të prishësh. Për mendimin tim, ndërtesat janë objekte që nuk flasin dhe nuk mendojnë. Pra, në këtë pikë shoh një tregëti politike. Gjithashtu më vjen për të qeshur kur shoh Gramoz Rucin të mbrojë mosprishjen e ndërtesës sepse ajo ka emrin e Pjetër Arbnorit. Them me vete pse bien kaq poshtë politikanët. Personalisht, jam kundër vlerave që komunizmi pati në vendin tonë, për mua ai pruri vetëm regres e diskriminim, dhe për këtë nuk ka pse t'i ngrihet përmendore apo të kujtohet.Them edhe mbasi të prishet, Piramida përsëri njerëzit do të thonë se këtu na ishte një herë një piramidë. Përsëri unë mendoj që është më mirë të ndërtojmë dhe jo të prishim. Mjaft më me simbolin e kazmës. Të konsolidohet demokracia për të mirën e popullit shqiptar.
Astrit Caku, Rocky River, SHBA

Piramida nuk duhej të prishej. Le të shërbejë si muze, e gjenaratave të reja t'ju tregohen veprat kriminale të ish-dikatorit i cili ua nxiu jetën mijëra e mijëra familejeve shqiptare në kohën e regjimit komunist. Edhe sot ka të atillë që i përkrahin ato vepra çnjerëzore të kryera nga ai dhe ndihmësit e tij.
Idriz Haxhiu, Therandë, Kosovë

Nuk i kuptoj njerëzit që duan ta mbajnë Piramidën që të sjell kujtimet më të këqia që mund të ketë patur populli. Nëse doni Piramidën e keni të gjallë tek Partia Socialiste dhe krerët e saj. Shikoni ata në vend që të shikoni Piramidën.
Anonom, Hamilton, Kanada

Të prishet Piramida do të ishte një turp i madh. Edhe pse më pëlqen mënyra e qeverisjes së z. Berisha jam plotësisht kundër prishjes së kësaj ndërtese të mrekullueshme. Nese z. Berisha do që të zhdukë simbolet e komunizmit, le të zhdukë bunkerët që i japin një pamje të tmerrshme gjithë Shqiperisë. Parlamenti e ka truallin aty ku ka qenë me dekada të tëra.
Feti Kadriu, Kanada

Po,se ky vend duhet me pas nji pamje shumë ma të bukur, dhe në harmoni me bulevardin.
Luljeta Maloku, Prishtinë

Për mendimin tim, mjaft me prishje dhe shkatërime!! E. Hoxha, duam apo nuk duam ne, është pjesë e historisë së Shqipërisë të pas luftës së dytë botërore. Fakti që ai ishte një diktator gjakatar dhe mizor nuk mbulohet nga lënia e 'piramidës', përkunderazi mosprishja e piramidës dhe kthimi i saj në një muze të krimeve të komunizmit do të ishte më e llogjikshme. Në fund të fundit ajo ndërtesë ka vlera arkitektonike që nuk ka pse të prishet, janë djersa dhe mundi i popullit ato që e ngritën atë ndërtesë.
Haki Shpata, ST Louis, USA

Mua personalisht, si inxhinjer ndërtimi, piramida më ka pëlqyer gjithmonë si strukturë. Sidomos kur ka qenë e veshur me mermer sepse tani që e kanë zhveshur duket skandaloze. Nuk mendoj se duhen bërë këto harxhime të mëdha në këtë kohë krize ekonomike, por piramida duhet rinovuar e duhet shfrytëzuar për funksionet kulturore që ka pasur këto 20 vjet. Parlamenti ekzistues nuk është i keq dhe sapo është rinovuar, kështu që qeveria të jetë më pragmatiste e të mos harxhojë taksat tona pa karar.
Armir Taraj, Nju Jork, USA

Që Shqipëria të bëhet me një kompleks të ri parlamentar me rastin e 100 vjetorit të shtetit nuk ka asgjë të keqe. Që këtë inisiativë e merr Kryeministri apo dikush tjetër është prapë pa rëndësi. Ajo që duket shqetësuese është mënyra dhe miratimi i kësaj ideje. Përse nuk ishte menduar më parë për ngritjen e tempullit të demokracisë? Përse u shpenzuan gjithë ato pare për rikonstruktimin rënjësor të kompleksit ekzistues duke patur parasush se ato para mund të përdoreshin për diçka tjetër? A është e vërtetë se ka patur një tender ndërkombëtar për ngritjen e Parlamentit aty ku ndodhet sot dhe a është e vërtetë se ky konkurs ka një fitues? A është e vërtetë se janë shpenzuar tashmë 5 milionë euro për projektin e teatrit kombëtar në ambientet e piramidës dhe se tani këto para i merr lumi? Pra, OK parlamentit, OK prishjes së piramidës, por dhe përgjigje për pyetjet e mësipërme, sepse ndryshe nuk shkon. Nuk është e thënë që për të ndërtuar duhet shkatërruar dhe shpërdoruar.
Genti Metaj, Bruksel, Belgjikë

Pa asnjë paragjykim për Berishën, mendoj se prishja e piramidës është gabim: 1 - Në të gjithë ndërtimin kaotik të shpëlarë e pa identitet të kryeqytetit, është ndoshta e vetmja godinë me vlera të qarta arkitektonike. 2 - Mbart historinë tonë pikërisht pse e ndërtuar për të përjetësuar kujtimin e diktatorit më të egër të Evropës së pasluftës; duke na kujtuar kush jemi, nga vijmë, e ç'kemi hequr....por në vetvete shumë funksional si objekt arkitektonik....le ta bëjnë po të duan qendër përkujtimore të viktimave të atij diktatori....nuk mund të dënohet ajo pak arkitekturë me vlera se i shërbeu diktaturës...Nuk prishen piramidat në Egjipt se i ndërtuan diktatorët. 3 - Ngatërrohet arkitektura me politikën pa pyetur për kostot dramatike edhe ekonomike....pa një diskutim në nivel profesional, por me arbitraritetin e atyre farë deputetëve që kemi.... 4 - Mendoj se është gabim dhe politikë e Berishës, sepse mund të ketë një rrjedhje votash të elektoratit asnjanjës....
Adrian Martini

Unë mendoj të ndërtohet, përse jo. Ndërtesa e parlamentit shqiptar do t'i shërbejë të gjithë popullit. Unë mendoj përse të diskutohet shumë. Sikur të ishte piramida jashtë Tiranës do të thosha të bëhej kopësht zoologjik se këto merita kishte ai njeri.
Nikoll Syku, Bronx, USA

Nuk duhet të prishet. Është njësoj sikur Egjyptianët të prishin piramidat e faraonëve, pse ata kanë qenë diktatorë. Ato janë pjesë e kulturës dhe historisë sonë. Nuk e kuptoj. Pse vetëm duhet të prishim. Kur do fillojmë të ndërtojmë?
Pajtim Zenaj, Fier

Personalisht jam kundër prishjes së piramidës. Politika nuk duhet të ngatërrohet me arkitekturën apo historinë. Në Berlin akoma ekzistojnë bunkerët e Hitlerit. Në Tiranë ndërtesat që të tërheqin pak syrin i kemi me pikatore dhe nuk duhet ti prishim. Për më tepër nëse do të ngrihej në vend të saj parlamenti, do të shtonte më shumë kaos në qendër të Tiranës.
Dritan Hima, Paris, Francë

Prishja e piramidës është e domosdoshme për mua, është një simbol që të kujton kohën e frikshme të tmerrit komunist. Do të dëshiroja që si piramida të zhdukeshin një herë e përgjithmonë neokomunistët e sotëm që mundohen me të gjitha mjetet të frenojnë zhvillimin e vendit tonë. Parlamenti ri me ndihmën e zotit nuk i pranon të rinjtë neokomuniste brenda dhe vendi i tyre është me piramidën.
Zamir Elezi, Tulln, Austri

Një nga faktorët e mjerimit allashqiptarçe është filozofia e fjalëve: Bëj e prish o Dervish, që pa punë të mos rrish. Faktet për ilustrim të saj janë të shumta (bunkerët, zgërdalla e Elbasanit, armatimet, apartamentet tip qymezi, o tip burgu, ndërtimet pa planimetri të studiuara,etj,etj.) Prishja e piramidës me shkak se është e diktatorit, për diktatorin, më shumë është pretekst se sa real dhe me vlerë. Diktatori s'harrohet duke rrënuar ndërtimet për të, o prej tij. Kështu duhej të digjeshin edhe gjithë librat që shkruajnë për të. Jo, ai duke u kujtuar na ndihmon të mos lejojmë diktatorë të rinj. Të rinjtë janë më të rrezikshëm se modifikojnë edhe maskimin. Po gjithë ato miliarda, me idiotizmin bëj e prish a nuk na kanë lënë në mjerim edhe sot? Piramida duhet lënë edhe për faktin që para se të ndërtosh duhen studime serioze, me përkushtim, jemi popull dhe qeveritarë fukarenj edhe nga idetë, jo vetem nga paratë.
Ligor Luarasi, Filadelfia, SHBA

Unë mendoj se kryeministri ka të drejtë dhe pikërishët në këtë vend duhet të ndërtohet parlamenti i ri, ka shumë arsye, por unë si shqiptar kur e vizitoj Tiranën nuk dua të shoh shenja të diktaturës apo diktatorit, kujtohuni pak ç'ndjenjë përjetojnë familjarët e shumë shqiptarëve të vrarë nga ish diktatori sa herë që ju bie udha andej pari. Këtë munden ta kuptojnë vetëm ata persona që i kanë vuajtur maltrajtimet komuniste dhe jo komunistë shqiptarë si Ruçi.
Imer Memishi, Kopenhagë, Danimarkë

Piramida e komunizmit duhet shkatërruar gjithsesi se ajo na i kujton krimet e komunizmit. Vetëm socialistët e kundërshtojnë rrënimin e saj.
Fazli Musa, Linc, Austri

Unë nuk jam politikan. Po si mund të shkatërrosh historinë e shtetit tonë? Çdo godinë edhe çdo vend ka historinë e vet. Historia nuk ndryshohet.
Fred Duro, Durrës

Të ndërtosh është gjë e mrekullueshme, por të ndërtosh me sistem dhe paralel me një nivel jetese të lartë është një mrekulli. Diktatori, sa ishte gjallë kishte një fiksim, rrethimi i trefishtë dhe i katërfishtë (dhe gjithë djersën tonë e bëri bunkerë), e izoloi Shqipërinë nga e gjithë bota. Berisha ka nje fiksim me çdo gjë që i përket sistemit të kaluar, por harron se ato janë ndërtuar me djersën e atij populli dhe nuk të kujtojnë asgjë, nëse nuk do që ta kujtosh. Me paratë që janë harxhuar në Tiranë do të ishte ndërtuar një qytet me të vërtetë europian dhe jo një rrëmujë godinash luksoze pa sistem. Kjo nuk i shërben mirëqenies, por krijimit të një ideje të rreme.
Fatjon Kabashi, Athinë, Greqi

50 vjet na çuan nëpër gjurmët e diktatorit dhe do të na duhen dhe 50 vjet të tjera që të shkunden nga rrënjët gjëmat e asaj kohe mëkatare. Unë bashkohem me ata që shkruajnë për ndërtimin e tempullit të kuvendit (ose odës së kuvendit), duke shkatërruar piramidën. POR, të gjitha materialet duhen ruajtur që pas ca vitesh të kemi se çfarë t'u tregojmë nipërve dhe mbesave. "Na ishte një herë një përbindësh që quhej Enver Hoxha..." dhe ta vazhdojmë të tregojmë se çfarë i ka bërë ai zotit Arbnori e shumë të tjerëve si Arbnori.
Shyqyrie Sula, Burrel

Nuk u mjaftuam me shkatërrimet e ndërmarrjeve shtetërore? Pse duhet të shkatërrojmë një ndërtesë që ka kushtuar dhe do të kushtojë për ta shkatërruar? Le të gjejmë një vend tjetër për të ndërtuar Kuvendin.
Astriti, Verona, Itali

Qeveria do të ishte më mirë të shpenzonte energji dhe punë për të rregulluar jetesën e shqiptarëve, të paktën të mbante premtimet e shumta, që tani duken si gënjeshtra. Harxhimi i parave të njerëzve me prishje të objekteve historike, kur nevojat e vendit për momentin mendoj se janë të tjera, tregojn paqartësi në mënyrën se si qeverisemi. Unë mendoj se duhet debat i gjerë për Piramidën, siç ka ndodhur edhe në vende të tjera të Lindjes, kur ka patur çështje të tilla.
Eliona Kura, Tiranë

Për mendimin tim parlamenti është simboli i demokracisë andaj them se ai parlamenti i vjetër, aq i vogël, nuk i shkon përshtat një vendi që synon integrimin në BE.
Ersi, Vienë, Austri