Nazim Rashidi BBC

	Nuk ka patur ndonjë reagim për këtë ide të hedhur në Shkup

Ideja u përkrah edhe nga politikanë, por sidomos nga organizata civile shqiptare.

Por, Partia për Prosperitet Demokratik, një parti jashtë parlamentare, tha se ideja është "një patriotizëm i rrejshëm", madje sipas saj ideja shkon në dëm të vetë shqiptarëve.

Opinion të ngjashëm ka edhe juristi dhe opinionisti Artan Sadiku:

“Problemi i parë është paparashikueshmëria. Nuk e dimë se çfarë procesesh sociale dhe politike do të lindin nga ideja. Prandaj duhet menduar mirë. Çështja e dytë është se brenda Shqipërisë do të zvogëlohet fuqia votuese dhe vendosëse e qytetarëve, sepse kur je shtetas i një vendi, ke të drejtë të zgjedhësh dhe të zgjidhesh. Gjithashtu, prezenca dhe forca e shqiptarëve në shtetet e tjera jashtë Shqipërisë dobësohet, nëse ata marrin edhe shtetësinë shqiptare. Mund të ndodhë që Tirana të bëhet qendër frekuentuese dhe gravituese për shqiptarët në Ballkan, kurse të tjerët mund të mbesin një periferi. Në Maqedoni ka edhe një çështje tjetër politike, mijëra qytetarë shqiptarë që jetojnë në Maqedoni nuk kanë ende shtetësi, dhe nëse marrin atë shqiptare, do të jenë shtetas shqiptarë që jetojnë në Maqedoni. Një zgjidhje jo e duhur për ta”, thotë juristi Artan Sadiku.

Lëvizja 'Zgjohu' tha se përkujdesja institucionale e Tiranës zyrtare për shqiptarët jashtë kufijve administrativë të Shqipërisë duhet të formalizohet dhe ky hap mundëson lehtësimin e komunikimit ndërshqiptar në Ballkanin Veriperëndimor dhe diasporë.

Edhe organizata 'Realiteti', mbështeti idenë që të gjithë shqiptarët të marrin shtetësi shqiptare.

“Do të kishim raporte të ndryshuara mes shtetit shqiptar dhe shtetit maqedonas, sepse përkujdesi do të ishte ndryshe ndaj shqiptarëve të cilët do të ishin shtetas edhe të Shqipërisë. Diskriminimet janë të panumërta ndaj shqiptarëve në Maqedoni, atëhere do të mund të përdorej një trysni diplomatike pasi shteti shqiptar është anëtar i NATO-s. Në të drejtën ndërkombtare shtetet janë të kufizuar në ndërhyrjen e punëve të një shteti. Nëse Shqipëria ndërhyn tani në mbrojtje të shqiptarëve në mënyrë më direkte mund të shkaktohej një problem ndërkombëtar me konstatimin se po ndërhyn në punët e brendshme të një shteti”, thotë Valon Bela, kryetar i organizatës 'Realiteti'.

Ideja e shtetësisë për të gjithë shqiptarët kudo ku janë, nuk shihet si problematike nga disa ekspertë juridikë shqiptarë në Maqedoni.

Ata thonë se normat ndërkombëtare lejojnë dyshtetësinë dhe një gjë e tillë nuk kërcënon integritetin territorial apo sovranitetin e shteteve.

Por vëzhgues Maqedonas thonë se ideja mund të nxisë nacionalizmin.

Temelko Ristevski është profesor i të drejtës kushtetuese:

"Nëse shikohet përgjithësisht, është një gjë e mirë që njerëzit afrohen, por, nga ana tjetër, nga aspekti i realizimit të interesave kombëtare shqiptare bëhet fjalë për procese që nuk çojnë në rrugë të mirë, sa i përket interesave kombëtare maqedonase. Një gjë e tillë është e rrezikshme për Maqedoninë, nëse nëpërmjet idesë realizohen ambicjet e grupimeve në shoqëri që duan krijimin e shteteve të mëdha", tha profesor Ristevski.

Ideja për shtetësi shqiptare për të gjithë shqiptarët kudo ku janë, nuk ka marrë një përgjigje zyrtare nga Tirana.

Vëzhguesit e përmbajtur thonë se ajo duhet të shqyrtohet me kudjes, nëse do të konsiderohet.

Praktikat ndërkombëtare janë të ndryshme.

Gjermania p.sh., nuk pranon asnjë shtetësi tjetër, ndërsa Kroacia ua ka dhënë shtetësinë kroate të gjithë atyre që jetojnë jashtë kufijve të vendit.

Nëse keni ndonjë koment për këtë çështje, plotësoni formularin në të djathtë.

Disa nga mendimet tuaja:

Çdo shqiptar kudo që jeton në Ballkan (në trojet e veta) duhet në mënyrë absolute të ketë shtetësinë shqiptare krahas shtetësisë së shtetit ku jeton (dyshtetësi). Si mundet që një shqiptar t'i mohojë një shqiptari tjetër atë që e kanë të përbashkët?!! Apo duhet të pyesim ata që na ndanë në trojet tona së çfarë duhet të bëjmë me njëri-tjetrin?!! Mjaft më, ju lutem.
Banush Muça, SHBA

Për mendimin tim, idea e marrjes së shtetësisë për të gjithë shqiptarët jashtë kufijëve politikë të Shqipërisë do ta kisha konsideruar jo produktive nga aspekti i interpretimit dhe lindshmërisë së problemeve nga fqinjët tanë sllavë. P.sh. në rastin e kosovarëve që do të merrnin edhe shtetësi shqiptare, Serbia për interesa të veta të njohura do të kishte thënë se kosovarët janë të ardhur nga Shqipëria dhe si argument kishte përdorur shtetësinë e fituar, ndërsa ndoshta njësoj kishin vepruar edhe maqedonasit ose grekët sikurse dhe malazezët. Megjithatë në prizmin e përgjithshëm sikurse serbët që kanë dyshtetësi të lejuar edhe me kushtetutën e Kosovës, edhe shqiptarët e Kosovës nëse do tua lejonte shteti shqiptar, s'do të ishte keq të kishin shtetësinë shqiptare. Sa i përket analistit Sadiku mbi fuqinë votuese, në të ardhmen mund të organizohen iniciativa me karakter kombëtar që do të kishin të drejtën e votës të gjithë shqiptarët, ndërsa për zgjedhjet politike, dihet tashmë që zgjedhja e qeverive në Tiranë po ndikon drejtpërdrejtë në jetën e çdo shqiptari, pavarësisht ku jeton.
Shpetim Jaha, Gjakovë, Kosovë

Po ide e qëlluar pse jo nëse ne nuk duhet të rrimë duar kryq për ti kënaqur maqedonët apo serbët ne duhet të ecim përpara.
Eset Emini, USA

Formimi i kombeve ka shekuj që ka mbaruar dhe ne nëse i japim të drejtën vetes që të quhemi shqiptarë patjeter duhet të kemi edhe shtetësi shqiptare apo më mirë të themi rikthim të shtetësisë që ne e kishim dhe do ta kemi edhe më tutje. Sa më shpejt, aq më mirë do ishte.
Feti Kadriu, Toronto, Kanada

Marrja e Shtetësisë shqiptare nuk paraqet pengesa sipas Kushtetutës së Shqipërisë dhe të Kosovës. Prandaj edhe duhet të marrin shtetësi shqiptare të gjithë ata që e ndjejnë veten se janë shqiptar.
Isuf Bajrami, Gjilan, Kosovë

Ide shumë e mirë do t'i ndihmojë shumë kombit shqiptar.
Nedzmi Ibraimi, Wayne, New Jersey

Mendoj se shtetësisë shqiptare do t`i duhej t`i paraprinte bashkimi i trojeve shqiptare në një shtet.
Hilmi Hajra, Vushtrri, Kosovë

E vlerësoj këtë nismë si themelore për të stabilizuar identitetin tonë kombëtar. Duke qenë se kemi një histori të gjatë që fqinjët na bien në qafë, vetë nuk dimë ç'farë jemi dhe nga vimë. Besoj se do të jetë një hap i duhur drejt të ardhmes së bashkuar. Si ç'do gjë që bëhet për identitet kombëtar edhe kjo do të ketë pasoj sociale dhe për shumë individë ndoshta jo zgjidhja më e mirë, por n.q.s nuk veprojmë sot nesër plagët do të jenë edhe më të mëdha. Besoj se kjo është koha e Shqiptarëve, me dy shtete, me mbështetjen e vëndeve perëndimore, me një Greqi të sakatuar, me një Maqedoni pa identitet, do të ishte koha më e mirë.
Eduard Rusi, Madison, SHBA

Shtetësi për shqiptarët kudo që janë.
Artur Gega, Boston, West Roxbury

E mbështes këtë ide për disa arsye: 1. Në një farë mënyre del numëri i saktë i shqiptarisë. 2. Çdo vend perëndimor pranone dy shtetesin. 3. Bashkombase ka ardhur të vështrojmë, ndjekim dhe të applikojmë çdo gjë në interese të Kombësisë. Unë kurrë nuk pajtohem me mendimin që është një patriotizëm i rreshëm. Sa për proqedurat kuvendi apo presidenti sipas ligjeve ta zbatojnë n.q.s existon ose fare thjeshtë të ngrenë një grup pune për këtë çështje madhore. Rroftë Kombi Shqiptar!
Shyqyrie Sulaj, Burrel, Shqipëri

Po pse jo ta dinë maqedonët se sa shqipëtar ka Maqedonia, janë 1 miljon jo çush thun këta.
Mahir Kaba, Strugë, Maqedoni

Shtetësia për të githë shqiptarët kudo janë ata është ide shumë e mirë sepse bashkon kombin dhe i thyen të gjitha edhe ato ndarje të vogla që janë një komb, një shpirt.
Osman Qazimi, SHBA

Po kalojnë 100 vjet nga ndarja e gjysmës së kombit shqiptar nga trungu amë. Ishin po ato forca që për 100 vjet i mbajtën shqiptarët të privuar nga e drejta më natyrore për t`a ndjerë vehten pjesëtarë të të njëjtës bashkësi me të gjithë bashkëkombasit e vet. Do të ishte shumë perverse, në do gjëndeshe edhe një shqiptar i vetëm që do e kundërshtonte këtë ide sot kur më në fund, po zhbëhen "muret kineze" që ndanin shqiptarët!
Merxhan Kurtishi,Tetovë, Maqedoni

A nuk ka eksistuar kjo mundësi me vite tashmë? Për mendimin tim Presidenca dhe Ministria e Jashtëme duhet t'i përqëndrojnë mundësitë më shumë për t'i përparuar të drejtat e popullsisë shqiptare kudo që janë (përfshi këtu dhe çamët në Greqi). Gjithashtu t'i konsolidojnë përpjekjet për njohjen e Kosovës edhe nga shtete që s'kanë bërë kështu akoma. Akoma më shumë duhet bërë, për mendmin tim, për bashkimin ekonomik të shqiptarëve në rajon - për të investuar apo për të bërë tregëti të lirë.
Luan Asllani, Londër, UK

Duhet edhe Kosovës tja marrim shtetsin t'i kemi të dyja.
Jon Halbas, Chicago, ShBA

Të gjithë shqiptarëve, kudo që janë, u duhet dhënë nënshtetësia shqiptare se të gjithë janë shqiptarë.
Gazmir Gashi, Prishtinë

Shumë ide e mirë! Por nuk besoj se kjo mrekulli ndodh dot, sepse përfaqësuesit tanë politikë nuk e kanë mendjen të zgjidhin hallet e njerëzve.
Besniku, Shqipëri

Shtetësia shqiptare u takon shqiptarëve kudo që janë. Është një e drejtë Kombëtare.
Besim Kastrati, Mynih, Gjermani

Gjërat po lëvizin në drejtim të asaj që nështetësia nuk do të luaj ndonjë rol të madh në të ardhmen. Të jesh shtetas i cilitdo vend ballkanik (jashtë BE-së) edhe ashtu nuk paraqet ndonjë privilegj.
Arsimi, Frankfurt, Gjermani

Kjo është një ide fantastike. Pse jo!? Të gjithë shqiptarët kudo që janë duhet ta marrin shtetësinë shqiptare. Edhe ata në Çamëri, Kosovë, Maqedoni e në të gjithë botën.
Elton Ismaili, Ipswich, Britani e Madhe

Unë pajtohem me mendimin për shtetësinë shqiptare, pavarësisht se ku jetojnë shqiptarët. Shqiptarët në Mal të Zi, Maqedoni, Serbi dhe çamët në Greqi kanë nevojë për mbështetjen e institucioneve të shtetit shqiptar. Ne jemi shqiptarë pa dallim feje dhe duhet të mbështesim njëri-tjetrin.
Arben Astafa, Kaliforni, SHBA

Po të ishte se dhënia e shtetësisë shqiptare të gjithë shqiptarëve ka qëllim patriotik është një gjë e shkëlqyer, por kam frikë se politikanët post komunistë të Shqipërisë e kanë humbur kredibilitetin tek populli shqiptar brënda shtetit amë dhe kërkojnë të manipulojnë me qendra votimi nëpër komunitetet shqiptare në perëndim për tja zgjatur jetën pushtetit të ish komunistëve. Duke manipuluar dhe abuzuar gjoja me votat, qendrat e të cilave do të ndërtohen dhe drejtohen nga celulat komuniste nëpër vendet perëndimore të cilat u formuan nga drejtoria e jashtme e sigurimit të shtetit komunist shqiptar dhe fatkeqsisht këto mbeturina ekzistojnë edhe sot nëpër komunitetet shqiptare dhe janë të gatshme të riorganizohen për një mision të tillë.
Vasel Malaj, Farmington-Hills Michigan, ShBA

Unë mendoj se për momentin nuk është i nevojshëm një hap i tillë. Por sa i përket shqiptarve të Maqedonisë apo të Kosovës lindore si Presheva Medvegja, Bujanovci, kur dihet diskriminimi sllav që ju bëhet, pse mos t ju mundësohet përkohësisht? Ndoshta së shpejti edhe përjetësisht.
Feim Bajqinovci, Prishtinë, Kosovë

Është gjëja më minimale që një shtet mundet të bëjë për shtetasit e tij kudo që janë. Shprehja aty ku i thonë bukës buke në gjuhë të nënës, duhet të paktën nënshtetsia.
Ilir Vata, Tiranë, Shqipëri