Gjatë dy viteve të ardhshme BBC, në kuadër të projektit Ëndërrat Olimpike, do të përcjellë përparimin e 26 atletëve nga mbarë bota, përfshirë edhe kampionen botërore për të rinj në xhudo, Majlinda Kelmendit nga Kosova.

E butë dhe e sjellshme, Majlinda Kelmendi nuk tregon asnjë mburrje që mund të pritet nga një atlet kampion i ri botëror, por kampionia 19-vjeçare e xhudos nga Kosova bart ëndërrën sportive të kombit të saj.

Pas fitores së medales se artë në xhudo në Kampionatin Botëror të të rinjve ne Paris vitin e kaluar, ajo ka vendosur të përfaqësojë Kosovën në Olimpiadën e Londrës në vitin 2012.

Por politika ndërkombëtare është duke u bërë pengesë në këtë rrugë të saj.

Nëse Kosova nuk arrin të bëhet anëtare e Komitetit Olimpik Ndërkombëtar (KON) deri në vitin 2012, Majlinda Kelmendit do t'i duhet të shqyrtojë mundësitë e tjera, si konkurruese e pavarur për KON-in, një gjë që ka ndodhur në të kaluarën.

	Majlinda në ambient shkolle

Ajo merr pak pushim nga trajnimi intensiv për të treguar se si ndihet.

"E ndjej veten më së miri kur bëj xhudo, kur stërvitem, por veçanërisht e ndjej vehten mirë në gara kur fitoj," thotë Majlinda në një intervistë për BBC-në.

"Unë punoj shumë në stërvitje, kështu që kur fitoj jam shumë e lumtur," thotë ajo.

Ajo stërvitet në një sallë moderne të xhudos në qytetin e saj të Pejës.

Objekti është ndërtuar nga Driton Kuka, trajneri Majlindës, i cili thotë se ai zbuloi qe në fillim se ajo ishte sportiste e jashtëzakonshme.

Majlinda e kupton rëndësinë trajnerit të mirë në suksesin e një atleti.

Ajo thotë se i bën gjërat në mënyrën e vet dhe dëshiron që familja e saj dhe trajneri të krenohen me suksesin e saj.

"Xhudo është gjithçka në jetën time. Nuk është e lehtë që në kushtet e Kosovës të arrish të bëhesh kampion evrope apo i botës në çfarëdo sporti," tregon ajo.

"Unë jam shumë e lumtur që kam një trajner të mrekullueshëm. Dua t'a falënderoj atë jo vetëm për ndihmën që më ka dhënë mua, por edhe gjithë ekipit tonë," thotë Majlinda.

"Ne jemi një shtet i ri, kështu që do të jetë një shans i përkryer për t'i treguar botës se në Kosovë janë shumë të rinj të cilët me të vërtetë mund të bëjnë gjera të mira," thotë ajo.

Kosova në Lojërat Olimpike të Londrës?

Nëqoftëse Kosova nuk mundet të anëtarësohet në KON deri në vitin 2012, Majlindës do t'i duhet të shqyrtojë mundësi të tjera, si për shembull të garojë për Shqipërinë apo si atlete e pavarur.

Për të gjithë lojtarët e xhudos, Majlinda është një lloj heroine.

Sporti në Kosovë u ka dhënë mundësi të reja të rinjve ndërsa ata përpiqen të largohen nga koha e luftës shkatërruese e viteve 1990.

Ëndërra ime është të mbaj flamurin e Kosovës në stadiumin olimpik të Londrës   Majlinda Kelmendi

Kryetari i Komitetit Olimpik kosovar, Besim Hasani, thotë se ëndërra e tij është të shohë Kosovën në Lojërat Olimpike.

"Dhe pas kësaj, edhe nëse vdes, është në rregull për mua," thotë ai, ndërsa Majlinda thotë se prioritet i saj është të fitojë një medale në Londër.

"Ëndërra ime olimpike është që të fitoj medale në Londër. Kjo do të ishte medalja e parë për Kosovën ose për Shqipërinë," thotë Majlinda.

"Për mua nuk është me rëndësi për cilin vend, Kosovën apo Shqipërinë. Për mua me rëndësi është të arrijë këtë ëndërr," thotë ajo.

Majlinda Kelmendi është pa asnjë dyshim krenaria e Kosovës dhe
kjo atlete e vendosur do të vazhdojë të luftojë derisa të parakalojë në stadiumin olimpik të Londrës në vitin 2012 ku shpreson që në duar të mbajë flamurin e Kosovës.

Uroj që të realizohet dëshira e Majlindës. Është koha e fundit që Kosova të ketë të drejta të barabarta me Kombet e tjera në botë.
Besim Kastrati, Munchen, Gjermani