Edhe sivjet pushuesit më të shumtë janë nga Kosova dhe Maqedonia.

Të parët favorizohen dhe nga lehtësirat e kalimit të kufirit dhe vënia në punë e autostradës Durrës - Kukës.

Autoritet thonë se sivjet pritet të shënohet numri më i madh i turistëve në Shqipëri.

Dëgjoni diskutimin mbi turizmin në Shqipëri me Jonuz Hallaçin e BBC-së

Çfarë mendoni për ofertën turistike? Pse do të zgjidhnit bregdetin shqiptar për të bërë pushimet tuaja? Çfarë ju pëlqen dhe çfarë nuk shkon?

Na dërgoni mendimet tuaja

Ja disa nga mendimet tuaja:

Avdi Krasniqi nga Prishtina shkruan:

"Udhëtimi për në Shqipëri tani të sjell një ndjenjë kënaqësie dhe lirie, nuk ke për të menduar më si ke me kalue kufirin, si do të sillen policët e doganierët, ku ti fshehim lekët etj. Janë shumë arsye për përzgjedhjen e bregdetit shqiptar për pushime, mirëpo çmimet më të favorshme në krahasim me vendet tjera, klima e përshtatëshme dhe ndoshta dhe arsye të tjera që diskutohen shumë në rrethe të shoqërisë se ku është më mirë të derdhen mjetet. Kultura e përgjthshme e pushuesve është shumë në nivel e shumë gjana tjera. Ka edhe gjana të papëlqyera mirëpo çdo vit e më tepër po përmisohen, niveli i shërbimeve duhet të ngrihet shteti, duhet të mbikqyrë objektet dhe lokalet ku ofrojnë ushqim dhe shërbime, tjetra është se duhet të përshtatet edhe kuzhina me elementë nga Kosova."

Enver Elezi nga Elbasani:

"Kultura, mirësjellja në përgjithësi dhe sidomos në hotele mungon."

Roz Kortni nga Salt Lake city shkruan:

"Unë jam amerikane, dhe kam kaluar 15 vite në Shqiperi, dhe 9 muaj isha në Durrës. Kur u ktheva në Amerikë doja ti sillja të gjithë shoqërinë time në Shqiperi. Unë besoj se është një thesar sekret. Nuk ka shumë vende që kanë dhe malet, edhe plazhin, Shqipëria i ka të dyja! Në një vend kaq të vogël! Edhe ngaqë gjërat janë më të lira në Shqipëri, dua të kthehem bashkë me familjen dhe shoqerinë time verën tjetër. Shqipërinë e kam në zemër. Kur të kem kurszer pak lekë, do jem prapë duke pushuar në Shqipëri!"

Ligor Luarasi nga Filadelfia shkruan:

"Gjëja numër një nga ato që s'durohet në turizmin alla shqiptarçe, janë pa pastërtia e WC-ve, kudo që janë. Pas tyre vjen ndotja brenda sipërfaqes së një biznesi turistik që ka bosin e saj. Eshtë ky bos që i mbyllet biznesi në se në sipërfaqen e tij gjendet edhe një gropëze me ujra të zeza.
Të mos jepet liçence pa verifikuar si i ka zgjidhur bosi ujrat e zeza, plehrat brenda territorit të tij. Këto i shoh këtu në Amerikë, si funksinojnë."

Valdet Hashani, mjeke në Afganistan shkruan:

"Jam një mjeke që punoj në një mision mjeksor në Bagram. Për 9 vjet rrjesht kam qenë çdo vit në bregdetin shqiptar, që nga Shëngjini deri në Sarandë, më së shumti në Dhërmi dhe Vlorë. Bukuritë e bregdetit shqiptar janë mahnitëse, rrallë kund i gjen, të virgjra dhe ende shumë të pa ndërtuara. Në fillim të verimeve me familjen time, ka qene nga kurreshtja për vendin e dajëve të gjyshit tim që nuk arriti dot ti shoh sa ishte gjallë (për rrethanat që të gjithë i dimë, 50 vjet komunizem i egër).

Në verimet e para shërbimi dhe akomodimi ishin nën nivel, me vite çdo gjë përmirësohej, shërbimi nga ana e kamarierëve lë ende shumë për të dëshiruar. Qëndrimi i kamarierëve aspak miqësor e shpesh herë si kërcënues, e largojnë mysafirin. Por më vjen shumë mirë se në Shqipëri po ndërtohet infrastruktura rrugore dhe fizike Hoteliere, çdo gjë rregullohet me kohë.
Sigurisht se për 10 vite Shqipëria do jetë vendi me atraktiv i rajonit. Duhet të ruhet ambienti, duhet të shkollohen kamarierët dhe duhet për çdo vit të rinovohen bujtinat e Hotelet... kështu sillet kapitali në vend dhe ngritet mirëqenia e qytetarit të Shqipërisë... Shqipëria këtë duhet ta shfrytezojë se këtë bukuri dhe mundesi ja ka dhene natyra... Shqipërise i nevoitet edhe politikë stabile pro perëndimore e palekundur... Përpara Shqipëri, se të duam shumë..."

Faik Geci nga Skënderaj shkruan:

"Më pelqen bregdeti shqiptar. Oferta turistike është e mirë.
Arsyeja pse do ta zgjidhnim bregdetin e Shqipërisë është se ka plazhe të bukura duke përfshirë këtu rërën, ujin si dhe disa hotele që janë ndërtuar në vijën bregdetare.

Ajo që nuk më pëlqen është papastërtia apo thënë më shkurt, derdhja e ujrave të zeza në det, afër bregut të detit dhe me këtë rast kundërmon erë e rëndë dhe me të vërtetë është edhe rrezik për shëndetin e njeriut. Po ashtu shitësit me qoftë ata me gomar e kuaj, po edhe ata që ngarkohen me gjësende të ndryshme të cilet në çdo moment e prishin rehatinë dhe qetësinë e pushuesve, të cilët me zë të lartë thërrasin për shitjen e gjësendeve të ndryshme. E kuptojmë gjendjen e vështirë të shumë familjeve dhe njerëzve atje, por megjithatë të gjithe tursistët shkojnë për të pushuar.

Një gjë tjetër që mendoj nuk është në rregull janë mbrëmjet e organizuara me këngëtarë të ndryshëm të cilët këndojnë deri në ora 2 e 3 të mëngjesit, dhe të gjithë pushuesit që banojnë afër e kanë të pamundur të flenë.

Problem për pushuesit paraqesin edhe mbikalimet apo nënkalimet, të cilat mungojnë dhe veturat paraqesin rrezik për jetën atyre që pushojnë, trotuaret janë të mbushura me shitësit në çdo skaj rruge, që vështirsojnë në masë të madhe shëtitjet e pushuesve gjatë mbrëmjeve. Në të gjitha këto raste mendoj se duhet të ndërhyjë shteti, në mënyrë që edhe Shqipëria me bregdetin e bukur qëe ka, të ofrojë shërbime të mira turistike jo vetëm për turistët kosovarë e shteteve përrreth por edhe për turistët nga shtetet perëndimore."

Bajram Hasani, nga Prishtina shkruan:

"Unë nuk kam më dilema se ku do ta kaloj pushimin veror: Në bregdetin shqiptar. Mbetet që qeveria të ndërmarrë masa për ndërtimin e infrastrukturës rrugore, (e cila është duke u realizuar me sukses), por edhe të ujësjellësit dhe kanalizimeve.

Ujrat e zeza që dalin në mënyrë të pakotrolluar në dete janë problem kryesor. Këtu duhet shtuar edhe pastrimi i detit dhe i plazhit nga hedhurinat e ndryshme".

Do të zgjidhja bregdetin Shqiptar për shkak se ka bukuri natyrore në plazhe, por ka shumë gjëra të tjera që nuk më pëlqejnë. Pra ato çka nuk janë në rregull ndër të tjera janë: zhurma e neveritshme e muzikës, pallate shumë afër njëra tjetrës, ushqimi kryesisht i dobët dhe pa cilësi, shërbimi dhe mirësjellja shumë nën nivel, etj.
Besim Shala, Prishtinë, Kosovë

Udhëtimi për në Shqipëri jo vetëm tani por edhe më herët për mua ka patur gjithmonë kënaqësi. Sa i përket kushteve si përshembull sjellja e policëve shumë korekte, pritja në kufi shumë normale, pastërtija pak brengosëse, por nuk është faji vetëm i vendasve por edhe i turistëve. Më shqetësuese janë çmimet shumë të larta të artikujve ushqimorë, sjellja jo korekte e dyqaneve që i ngren çmimet sipas njerëzve - një ditë shumë të larta, kurse ditën tjetër ka ulje. Prandaj shteti duhet ti ketë parasysh këto gjëra që duken të imta, por janë shumë domethënëse. Ne nuk kërkojmë që Shqipëria të jetë Hollivud, por të shkojë me kohën dhe standardin që kanë qytetarët. Por sidoqoftë ne duhet të japim sinjale pozitive sepse si ishte Shqipëria e çka është sot, fundi i fundit është shteti amë i joni.
Remzi Rrxhepui, Tetovë