Roli kryesor në filmin Odisea e bëri Fehmiun të njohur në botë

Familjarë të aktorit të madh shqiptar, në një ceremoni private, kanë përmbushur amanetin e fundit të Bekim Fehmiut duke e shpërndarë hirin e trupit të tij në lumin e qytetit, prej nga e kishte prejardhjen.

Urna me hirin e trupit të Bekim Fehmiut, u soll në Kosovë, nga bashkëshortja dhe dy djemtë e tij, të shtunën në mbrëmje.

Dëgjoni Bekim Fehmiun në një intervistë për BBC-në para disa kohësh.

Aktori i njohur shqiptar i filmit dhe teatrit Bekim Fehmiu u gjet i vdekur, pasditen e të martës, në banesën vet, në lagjen Zvezdara të Beogradit.

Polica ka thënë se zoti Fehmiu ka kryer vetvrasje. Aktori 74-vjeçar Bekim Fehmiu ka qenë yll i madh i kinematografisë jugosllave e botërore.

Na shkruani përshtypjet tuaja për aktorin Bekim Fehmiu në formularin në të djathtë

Jeta e Fehmiut

Bekim Fehmiu ka lindur në Sarajevë më 1 qershor të vitit 1936, nga i ati Ibrahim Fehmiu patriot dhe punëtor i shquar i arsimit shqip, kurse fëmijërinë dhe rininë e ka kaluar në Prizren ku e ka mbaruar edhe gjimnazin.

Fakultetin e Arteve Dramatike e ka kryer në Beograd ku edhe e ka kaluar jetën me bashkëshorten Branka Petiq, po ashtu aktore, me të cilën ka djemtë Uliksin dhe Hedonin.

Bekimi u bë i famshëm me filmin "Mbledhësit e Puplave", në vitin 1966, kur në festivalin e Kanës mori Palmën e Artë.

Deri në atë kohë, ai kishte studiuar dhe ishte bërë i njohur nga shumë shtëpi filmi nëpër botë.

Ai është aktori i parë shqiptar i filmit dhe i teatrit, i cili ka luajtur me sukses në filmat dhe skenat e gjithë hapësirës së ish-Jugosllavisë.

BBC diskuton për jetën dhe veprën e Bekim Fehmiut

Bekim Fehmiu ka qenë një nga personalitetet që ka lënë gjurmë në kinematografinë ballkanike, por mbi të gjitha, ai është i njohur për kontributin artistik në kinematografinë botërore.

Rolet e tij në filmat "Edukata speciale", "Odiseja", apo "Aventurieri", përmenden si kryevepra të kinematografisë botërore.

Bekim Fehmiu ka bashkëpunuar me shumë aktorë të njohur botërore si John Huston, Olivia de Havilland, Ava Gardner, Robert Shoë, Dirk Bogart, Sharl Aznavur, Irene Papas, apo Claudia Cardinale.

Ka interpretuar në shqip, serbisht, maqedonisht, turqisht, në gjuhën
rome, në spanjisht, anglisht, frëngjisht dhe italisht.

Shkrimtari dhe producenti dhe italian, Françesko Skardamalja ka thënë se "Bekim Fehmiu është i vemti aktor ndërkombëtar nga vendet lindore, komuniste i cili ka filmuar në perëndim gati plot njëzet vjet, duke shpërthyer perden e hekurt gjithnjë deri në paraqitjen e Gorbaçovit dhe rënies së Murit të Berlinit".

Bekim Fehmiu është një nga artistët më të mëdhenj që kanë dalë prej këtyre anëve.

Nga viti 1987, kur në mënyrë demonstrative braktisi shfaqjen "Madame Kolontine" të Anete Playel, ku luante Leninin dhe Stalinin, në teatrin jugosllav të dramës, ai i dha lamtumirën aktivitetit artistik në Jugosllavi.

Pas disa kohësh mori dhe vendimin për t'i dhënë fund karrierës edhe në aktivitetet artistike botërore.

Në vitin 2002 në Beograd u botua libri autobiografik i Bekim Fehmiut, "Shkëlqimi dhe trishtimi", në të cilin përshkruhet periudha që nga lindja e tij në Sarajevë e deri në regjistrimin në Fakultetin e Arteve Dramatike në Beograd.

Mirëpo libri ende nuk është botuar në shqip. Këto ditë e ka përfunduar edhe pjesën e dytë të dorëshkrimit të librit në fjalë në serbisht, dhe kap periudhën prej vitit 1956 e deri më sot.

Lexoni më poshtë disa nga mesazhet tuaja.

Një emër i veçantë i kulturës, edukimit, qytetërimit dhe vlerave që i përkasin këtij fanari, një shëmbëlltyrë e pashoqe një pasqyrë e një populli të vuajtur ku shëndriti në kohën më të mirë të mundur. Pusho i qetë i madh do të mbetesh në mbarë hapsirat shqiptare.
Butrint Sylejmani, Gjilan

Vërtetë është një humbje e madhe për kombin tonë, ngase një shqiptar të depërtoj e ta njoh bota siç ishte Bekim Fehmiu nuk ishte edhe e lehtë, sidomos duke pas parasysh kohën dhe rrethanat në të cilat kanë jetuar shqiptarët . Ngushëllime të sinqerta për familjarët e tij. Ndërsa turp i madh për parlamentin tonë.
Florije Mala, Fushë - Kosovë

Bekim Fehmiu ka qenë aktor dhe për botën e artit nuk ka rëndësi se çfarë je. E ai ka qenë aktor i talentuar, çka edhe mbarë kinematografija e ka pohuar. Fakti që e ka ndërprerë aktrimin - profesionin e vetëm, tregon se i është bërë një padrejtësi e madhe për te cilën ai ka heshtur me vite. S'kemi nevojë ta gjykojmë, sepse asnjeri nuk ka qenë ne vendin e tij. Prandaj, tani që po vjen në Prizren duhet ta mirëpresim ashtu siç e meriton, me nder dhe respekt!
Miradija Eperme, Vushtrri, Kosovë

Një jetë me qiri. Bekim Fehmiu, protagonist i dramës "Vetvrasja"! U lind në skenë, vdiq në skenë, në prjetësi në skenë. Atentator që nuk iu friksua vdekjes, i cili vret protestën duke ndezur qiririn me plumb! Gjurmë e pashlyer për shkollat dhe lagjet e gjithë shqiptarisë. I lehtë qoftë dheu! Amen!
Florim Behluli, Breda, Holandë

Bekimi ishte dhe do të mbetet ylli i artit kinematografik. Mos të harrojmë se ishte edhe një patriot me vetëdije të plotë kombëtare. Por njerzit tanë në Kosovë e Shqipëri nuk duhet ta përbuzin sepse arti asnjëherë nuk politizohet.
Arber Çabej, Londër, UK

Legjendë e kinematografisë shqiptare, krenaria e kombit shqiptar.
Berisha, Ferizaj

B. Fehmiu ka qenë aktor i madh dhe i njohur në botë, mirëpo artistët tanë siç ka qenë Bekimi kanë gabuar që herët me organizimin dhe planifikimin e jetës së tyre, së paku artistët ka qenë dashur ta dijnë dhe ta kuptojnë se kush janë serbët dhe sa na dojn ata ne...
Butrint Shkëmbi, Therandë

Dhimbje, humbje e madhe pmr ne vdekja e aktorit tm madh BEKIM FEHMIUT.
Xhabir Zeqiri, Toronto, Kanada.

Aktori ma i madh shqiptar i shekullit 20 (ndoshta edhe i 21). Ngushëllime familjes.
Ekri Sopi, Bruksel, Belgjikë

Në vitin 1970, në kohën kur po xhironte filmin "Kurtha për Gjeneralin", në Sarajevë, Bekim Fehmiu erdhi në kazermën ku isha ushtar. Interesimi për ta parë, dëgjuar për së afërmi aktorin zgjoi interesim të madh. Në sallën plot e përplot me ushtarë e oficerë Bekimi për dy orë rresht foli, u përgjigj në pyetje të të pranishmëve. Ushtarët, sidomos ne shqiptarët, dëgjonim gojëhapur. Unë, tha artisti mes tjerash, jam shqiptar, i lindur rastësisht në Sarajevë. Emri im ka domethnie vetëm në gjuhën shqipe ashtu si kanë edhe emrat e vëllezërve e motrave të mia; Bashkim, Arsim, Fatmir, Shpresë ... Në fund u afruam gjithë qejf rreth kolosit të artit kinematografik, bëmë fotografi dhe morëm autografe.
Sabit Abdyli, Auckland, Zelandë e Re

Aktor gjigand me përmasa botërore qe ne shqiptaret ja dimë vlerën veç kur vdes.
Sami Topalli, Mitrovicë

Qysh ka qenë edhe ka shku shqiptarët kurr hajrin s'ja kanë pa. As që meriton të flitet për të. Për të le të flet Serbija se atje e ka kalu jetën edhe atje ka mbet. Emrin e ka shqiptar se vet nuk është.
Leon Gollaku, Mitrovicë