Duket sikur realiteti i sotëm nuk është shumë larg parashikimit të tij me programe televizive të llojeve si Big Brother, Pop Idol, X Factor, ... ka talent dhe të tjera.

Pastaj faqet sociale ne internet si Facebook, Myspace, Twitter e të tjera të krijojnë mundësi të jetosh të përditshmen në sytë e të gjithëve.

Po përse kjo magjepsje, përse është kaq shumë në modë ky ekspozim, a është kjo një tendencë e rrezikshme? Çfarë vlerash promovon dhe si i shërben individit?

Një studim i bërë nga disa psikiatër amerikanë identifikoi një formë të re iluzioni të shekullit të 21, e pagëzuar me emrin 'sindromi Truman Show' marrë nga filmi me të njëjtin emër ku luan aktori Jim Carrey.

Ata që vuajnë nga ky sindrom janë të bindur se jetët e tyre luhen para një audience.

Pse duam të jemi të famshëm dhe a të sjell fama domosdoshmërisht lumturinë?

Në programin Forum të BBC-së, Faik Luta diskutoi këtë çështje me moderatoren Arbana Osmani, këngëtaren Vesa Luma , sociologun Ismail Hasani dhe këngëtarin e muzikës rok, Jeton Kulinxha.

Forum mbi famën

Komentet tuaja:

Eshtë fakt që tek ne në Kosovë edhe në Shqipëri emisionet kanë filluar te kopiohen, e dyta nëse flasim për Big Brother Albania 2, unë nuk shoh spektakël aty dhe absolutisht as vlera që mund të promovohen që i shërbejnë një të riu.
Aida Gashi, Prishtinë

Realitete të tilla zgjerojnë kufijtë e imagjinatës përtej kornizave të atij realiteti të përditshëm e të ngushtë që na mundësohet. Reality-show ndihmojnë individin që është pjesë e tij, të mësoj rëndësinë e të bashkëjetuarit e të përshtaturit në grup, në një grup ku ti nuk zgjedh, por të tjerët zgjedhin për ty. Por njëkohësisht edhe teleshikuesin e gjerë, i cili me gjakftohtësi e racionalitet (pasi është i jashtëm e jo i brendshëm në skenar) gjykon ç'është e duhur e ç'është e drejtë. Për një vend si vendi ynë, ku njerëzit janë të mbyllur skenare të tilla ndihmojnë në ndriçimin e mendjes dhe ndjenjave tona. Një shoqëri e hapur ku njerëzit janë më të sinqertë e më të drejtëpërdrejtë me njëri-tjetrin, ku askush nuk ka frikë nga ajo që mendon e dëshiron, është më shumë e suksesshme.
Blerta, Tiranë

Mendimi im është se këto reality show, duhet të jenë të kufizuara në emetimin e tyre që adoleshentët të mbrohen nga ndikimi që mund të kenë në zhvillimin e tyre. Sipas mendimit tim, sikur shkruan te duhani që e dëmton seriozisht shëndetin, gjatë emetimit të këtyre reality show të ketë një slogan gjatë gjithë kohës së emetimit si për shembull që rekomandohet për persona më të rinj se 21 vjeç.
Burim Piraj, Sharrë, Kosovë