Por kjo nuk është ngjarja e vetme. Ekzekutimet e kryera nga Al Kaida në Irak gjithashtu janë shfaqur në ekrane.

Po ashtu shpesh në ekrane shohim edhe kufoma apo fotografi të sapoarrestuarve dhe emrat e tyre?

Çfarë përgjegjësie ka media në mbulimin e ngjarjeve të tilla? A duhet që video të tilla apo akte të tilla të shfaqen?

A keni parë ju filmime që mendoni nuk janë të përshtatshme? Pse?

Ne do të donim edhe mendimin tuaj për këto çështje. Na shkruani!

Agroni nga Londra shkruan: "Unë jetoj në Londër. Mbaj mend që kur al-Kaida ekzekutoi një nga pengjet disa kohë më parë, asnjë televizion britanik nuk e transmetoi. Unë i pashë pamjet e ekzekutimit rastësisht në një televizion shqiptar. Unë mendoj se në Shqipëri nuk ka etikë nga media. Jo çdo gjë në një shoqëri rregullohet me ligj (megjithëse ne edhe ligjin e kemi të vështirë ta zbatojmë - e jo më t'u përmbahemi rregullave etike. Kjo lidhet edhe me nivelin e shoqërisë."

Arben Salihu nga Bremeni na shkruan: "E përkrah mendimin që mediat duhet të jenë shumë të kujdesshme në transmetimin e këtyre ngjarjeve. Efekti i tyre në audiencën e gjerë mund të jetë i jashtëzakonshëm, flas më shumë në aspektin psikologjik të këtij efekti. Dihet që ngjarje të tilla, si vrasja në fjalë sa vijnë e bëhen më të shpeshta në mbarë botën, dhe unë mendoj që është pikërisht influenca e transmetimit të tyre në media, dhe imitimi i tyre pastaj."

Gentjan Banaj nga Fieri thotë: "Duke qenë se brezi i ri është ende në stadin e zgjedhjes së modeleve, këto skena duhet të kufizohen."