Irlandezët votuan kundër traktatit në referendum

Traktati u hodh poshtë nga votuesit irlandezë në referendum në 12 qershor 2008 dhe sipas rregullave të BE nuk mund të hyjë në fuqi deri sa të 27 shtetet anëtare ta ratifikojnë atë.

Që nga ajo kohë, çekët kanë pezulluar ratifikimin e traktatit në parlament dhe presidenti i Polonisë, Lech Kaczynski ka refuzuar të ratifikojë traktatin për momentin duke e quajtur atë pa kuptim.

Kjo ka bërë që presidenti Sarkozy me të marrë presidencën e BE-së midis të tjerave të thotë se edhe zgjerimi i mëtejshëm i BE-së nuk do të vazhdojë për momentin, nëse nuk ka reformim të institucioneve.

Po çfarë do të thotë kjo për perspektivën e vendeve si Shqipëria, Maqedonia, Kroacia, Kosova etj?

Sa afër apo larg është e ardhmja e tyre në BE?

A do të ketë të ardhme tani traktati? Ç'mendoni ju për reagimin e këtyre vendeve kundër traktatit?

Ne do të donim mendimin tuaj për këtë çështje! Na shkruani!

Pjesë nga komentet

Bekim Toani nga Podujeva na shkruan: "Nëse Kosova u bë pjesë e unionit monetar të Be-së, kurse Rumania është pjesë e BE-së, cili mund të jetë serioziteti praktik i BE-së karshi politikës së dyfishtë të standarteve për anëtarësim. Pse Britania si themeluese ende nuk është pjesë e monedhës evropiane, kurse Kosova po. Si dhe Pse? Uroj që BE të kristalizojë synimet dhe vizionin."

Halit Miroci nga Liezhi, Belgjikë, shkruan: "Ballkani është zemra e Evropës e si i tillë nuk duhet të zhgënjejë popujt pavarësisht nga "vrimat" në reforma diku nga një tranzicion i tejzgjatur e diku nga era e barutit të fundluftës se nacionalizmit tipik ballkanik. Dihet qartazi se nacionalizmi i sëmurë serb orientohet nga Moska, si kundërpërgjigje e ndërhyrjes së NATO-s kundër gjenocidit millosheviçjan.

"Nëse Evropa pret deri sa të rregullojë problemet e brendshme popujt do të zhgënjehen e raportet si dhe arritjet e paqes në Ballkan do të rrezikohen. Ballkani është pjesë e Evropës e s'ka pse bëhet viktimë e mosmiratimit të Traktatit të Lisbonës."

Mentor Morina nga Malisheva shkruan "Sa i përket traktatit të Lisbonës, kjo është edhe një arsye shtesë e dështimit të BE dhe tregon qartë se sa është e gatshme të ndërmarrë veprime të mëtutjeshme për çështje kaq madhore, duke e marrë për bazë edhe zgjerimin e saj me shtetet e Ballkanit të cilët nëse i krahasojmë me ato shtete që kanë hyrë shumë më herët, atëherë do të arrijmë në konkludim se shumë më shumë i plotësojnë standardet këto se sa shtetet e më hërshme të integruara."