http://www.bbcalbanian.com

Botuar: E premte, 25 gusht 2006 - 17:33 CET

Auditorium i BBC-së në Durrës

BBC sjell debatin Auditorium në Shqipëri. Këtë herë Auditoriumi është në Durrës.

Qeveria, opozita dhe përfaqësuesë të shoqërisë civile u përballën me pyetjet tuaja për çështjet që ju shqetësojnë.

Të ftuar në panel ishin Z. Sokol Olldashi, Ministër i Brendshëm, deputet i Partisë Demokratike, Z. Marko Bello, deputet i PS, ish-Ministër për Koordinimin Qeveritar, Znj. Filloreta Kodra, nënkryetare e partisë Lëvizja Socialiste për Integrim, Z. Mirush Kabashi, aktor, Artist i Merituar dhe Znj. Briseida Mema, gazetare dhe autore.

Programi Auditorium realizohet në bashkëpunim më televizionin TopChannel.

Auditoriumi në Durrës

Aleksandër Furxhi: Përshendetje dhe mirë se keni ardhur në Durrës, në debatin e BBC, Auditorium. Përshëndetje dëgjuesve të BBC të cilët na ndjekin përmes radios dhe përmes internetit.

Zakonisht në debatet Auditorium marrin pjesë studentë të qyteteve ku auditoriumi udhëton, por sonte jemi në Durrës ku nuk ka universitet dhe me shumë gjasa do të kemi vitin e ri akadamik, megjithatë BBC ka ftuar studentë durrsakë të cilët studiojnë në qytete të ndryshme të Shqipërisë, kryesisht në Tiranë, nga fakulteti i filologjisë, studentë të gazetarisë.
Por një pjesë janë edhe gjimnazistë të gjimnazit të qytetit të Durrësit, Naim Frashëri. Dhe njëherë mirë se keni ardhur.

Përse gjendemi sot në Durrës? Durrësi është një nga qytetet më të mëdhenj, më kryesorë të Shqipërisë, këtu është porti më i madh i vendit.

Ai ka një popullsi mjaft të madhe që është katërfishuar gjatë 4 viteve të fundit dhe natyrisht është një qytet me potenciale të mëdha të zhvillimit ekonomik.

Por nga ana tjetër ka edhe me probleme të shumta si krimi i organizuar, korrupsioni, mungesa e shtetit ligjor, por edhe probleme të tjera që shqetësojne jetën e përditshme të të rinjve, por edhe të qytetarëve në përgjithësi.

Duke respektuar një prej rregullave bazë të auditoriumit të ftuarit tanë nuk i dinë pyetjet që do të marrin drejtpërsëdrejt në këtë moment nga salla.

Fillojme më pyetjen e parë, fjalën e ka Alsida Hasi.

Alsida Hasi: Sipas jush cilët janë të korruptuar, populli apo njerëzit që punojnë në institucionet tona?

Sokol Olldashi: Përpara se ti jap një përgjigje pyetjes tuaj, unë do doja të falenderoja për ftesën në studio dhe për mundësinë për të komunikuar me një auditor fantastik, por brenda këtij auditori do doja të veçoja një grup që është grupi i gjimnazistëve të Naim Frashërit. Një përshëndetje specifike për ta. Është gjimnazi im dhe më i miri në Shqipëri.

Kthehemi tek pyetja. Sigurisht që korrupsioni ndodhet në administartë dhe jo tek qytetarët. Ka patur zhvillime për fat të keq jashtëzakonisht të shpejta gjatë viteve të fundit.

Mjafton të themi që gjatë 2004-2005 Shqipëria humbi 14 vende më poshtë në klasifikimin e vendeve më të korruptuara dhe u klasifikua si vendi më i korruptuar në kontinentin tonë.

Jemi duke bërë përpjekje maksimale dhe jemi duke ndërmarrë nisma ligjore administrative, institucionale për të bërë përmirësime shumë të shpejta.

Në qoftë se ka një arsye që ne bësojmë përse shqiptarët votuan për PD është pikërisht lufta kundër krimit dhe kundër korrupsionit dhe këto janë dy fokuset kryesore ku ne do të përqëndrohemi.

Shpresojmë që brenda një kohe shumë të shkurtër do të kemi një situatë krej tjetër, por e përsëris faji qëndron gjithmonë ke zyrat e shtetit dhe jo tek qytetarët.

Aleksandër Furxhi: Zoti Marko Bello ju keni qenë ministër për luftën kundër korrupsionit. Këto që tha ministri aktual i brendshëm në një farë mënyre i takojnë qeverive të mëparshme për përcaktimin si vendi me i korruptuar në kontinentin tonë, çfarë përgjigje keni për pyetjen e studentes?

Marko Bello: Korrupsionin e bëjnë ata që kanë në dorë fondet publike ose shërbime të cilat i detyrojnë qytetarët për një arsye apo një tjetër të japin ryshfet dhe të realizohet raporti ryshfet – mitmarrje.

Përveç korrupsionit të madh kur me fonde publike mund të merren në dorë shuma të mëdha dhe me këto pastaj mund të realizohen përfitime personale duke vënë interesat personale mbi ato publike, pra nga shërbëtor që duhet të jetë një politikan kthehet në gjobvënës.

Ashtu si tangoja, dhe korrupsioni dhe ryshfeti presupozon një marrëdhënie dypalëshe që do të thotë nëse një doganier merr ryshfet nga një biznesmen kuptohet që fajin kryesor e ka doganieri, por kuptohet që pa faj nuk është dhe ai që mundohet të përfitojë nga dobësia e shtetit dhe ti nxisë e ti fryjë këto fenomene.

Me këtë nuk dua të justifikoj, por përkundrazi, në ka pas një fushë ku dhe qeveria socialiste me gjithë kuadrin ligjor të shkëlqyer, me gjithë strukturat e mira që ngriti rezulatat ishin shumë anemike dhe votat e 3 korrikut përveç të tjerave kishte dhe një pakënaqësi kundrejt shërbimeve të cilat janë bërë gangrenë dhe ne nuk i zgjidhëm dot në kohën e duhur.

Uroj që qeveria pasardhëse të vazhdoj me sukses luftën e nisur kundrejt këtyre fenomeneve me qëllim që ti kthehet besimi qytetarëve.

Aleksandër Furxhi: Faleminderit zoti Bello, ju e pranuat që ka korrupsion dhe ndoshta me të drejtë është një ndër arsyet se pse PS doli në opozitë.

Zonja Briseida Mema ju keni ndjekur zhvillimet në Shqipëri prej 15 vjetësh për shtypin e huaj. çfarë përgjigje keni për studentët e gzetarisë?

Briseida Mema:Korrupsioni fillon aty ku mungon shteti dhe ne kemi një tranzicion të jetës shumë të zgjatur ku janë vënë re mungesa të theksuara të ekzistencës së shtetit dhe të një adminëstratë shumë të korruptuar.

E theksoj mjaft të korruptuar sepse dhe në mjaft vendje të lindjes dhe vendeve të rajonit Shqipëria zë një vend mjaft të rëndësishëm, por ajo që më shqetëson më shumë është se korrupsioni këtu në Shqipëri është bërë thuajse një mentalitet dhe në këtë mentalitet kemi kontribuar si populli, si qytetarët.

Zoti Kabashi ndoshta nuk do të bënte të korruptuar popullin sepse më shumë ka bërë të korruptuar pjesën e politikës.

Alsida Hasi: Përgjigja që dha zoti Marko Bello ishte më afër mendimit tim sepse mendoj që korrupsioni është një marrëdhënie dypalëshe si nga ana e popullit dhe nga ana e njerëzve që punojnë në institucione.

Isida Muço: Konfliktet midis pozitës dhe opozitës kanë ndikuar në luftën kundër korrupsionit dhe krimit të organizuar.

Mirush Kabashi: Nuk bëjmë mirë nëse do ta ndajmë administratën nga populli, politikën nga populli. Unë gjykoj që të gjithë këta sektorë janë përfaqësi të popullit, siç nuk do desha të veçoja dhe të mendojmë që korrupsioni është atribut vetëm i administratës.

Ne e kemi të shtrirë në fushën e drejtësisë, mjeksisë, arsimit dhe ky fenomen ka të bëjë me një mentalitet i cili pasqyrohet tek ne dhe tek ata që janë në poste drejtuese.

Kështu që nuk do të jemi efikas nëse ne do të sulmojmë vetëm në një front.

Aleksandër Furxhi: Zonja Kodra, a ndikon konflikti midis pozitës dhe opozitës në luftën kundër korrupsiont?

Filloreta Kodra: Unë desha të përcaktoj një përkufizim teorik të korrupsionit. Korrupsioni është abuzimi me pozicionin publik për përfitime private.

Pra me një fjalë të madhe korrupsion nuk mund të përfshish edhe atë që e përdor korrupsionin për interesat e veta edhe atë që e pëson korrupsionin që në këtë rast është publiku i gjërë janë qytetarët shqiptarë.

Si mund të luftohet korrupsioni? Vendosja e rregullave që duhet të zbatohen nga nëpunësit e administratës është një masë paraprake për evitimin e korrupsionit dhe së dyti lufta kundër korrupsionit është e vazhdueshme për ngritjen e institucioneve, për forcimin dhe funksionimin sa më të mirë dhe mos përdorimi i këtyre institucioneve duke e politizuar çështjen, duke e kthyer korrupsionin në një gjë pa formë e cila i mbledh të gjithë dhe nuk dallohet kush ështa fajtori dhe ai që e pëson.

Natyrisht dhe konfliketet midis pozitës dhe opozitës ndikojnë në ngritjen e një tymnaje rreth kësaj çëshjte për mos të gjetur më pastaj shkaktarët e vërtetë të cilët duhen dënuar e duhen bërë shembull që të mos këtë përsëritje dhe të mos ketë ato përmasa.

Kledi Dusha: A mund të themi se lufta ndaj korrupsionit ka sjellë më shumë dëme sesa të mira duke tërhequr vëmendjen e shoqërisë nga probleme më madhore. Një pyetje tjetër për zotin Kabashi, korrupsioni vjen nga deti apo nga mbreti?

Isida Lluka: A mendoni se qeveria aktuale kohët e fundit duke u dhënë më shumë ndaj luftës kundër korrupsionit ka anashkaluar pak zhvillimin ekonomik të vendit?

Sokol Olldashi: Nuk është lënë asgjë pas dore, por duke qenë se korrupsion përbën një nga sfidat kryesore jo vetëm të qeverisë, por të vendit në prespektivat për integrim unë besoj që ne kemi qenë më të fokusuar atje dhe kemi bërë mirë.

Pavarësisht kësaj kemi ecur paralelisht në analizën time shumë mirë në shumë drejtime. Kemi ecur mjaft mirë me financat, hyrjet në buxhetin e shtetit janë shumë më të larta se sa plani që ne kishim vendosur i cili është shumë më i lartë sesa realizimi që ka pasur qeveria një vit më parë, kemi ecur mjaft mirë me reformën në arsim, po ecim mjaft mirë me investime në punët publike, por punët publike nuk janë investime që mund të mbyllen për 3 ditë.

Problemi është sa fonde çelen dhe sivjet fondi që do të çelet për riparim rrugësh nacionale është mjaft i madh. Shenjat e para do të duken në verë dhe në vjeshtë sepse atëherë do të mbarojnë segmentet e para.

Po ecet mjaft mirë me ministrinë e bujqësisë. Ka patur ndërhyrje shumë të mirë qoftë për lehtësimin e prodhuesve, qoftë për subvencionimin e kostove të prodhimeve bujqësore.

Një korrektim të fundit, sigurisht që korrupsioni është marrëdhënie dy palëshe, por është një marrëdhënie ku njeri nxjerr para nga xhepi dhe tjetri fut para në xhep. Ky është ndryshimi.

Anisa Pëllumbi: Sapo përmendët që lufta kundër korrupsionit është një nga sfidat e qeverisë. Qeveria sapo ka firmosur marrëveshjen e sfidës së mijëvjeçarit me SHBA. Si do të përdoren këto 14 milionë dollarë në luftën kundër korrupsionit dhe krimit të organizuar?

Briseida Mema: Nuk duhet ta shohim luftën kundër korrupsionit si një sfidë ndaj qeverisë. Lufta kundër korrupsionit është një sfidë për të gjitha qeveritë, është sfidë e zhvillimit ekonomik.

Pa një luftë reale kundër korrupsionit nuk mund të themi se një vend mund të zhvillohet ekonomikisht dhe gjithe historia e tranzicionit shqiptar që nga 1990 – 2006 e ka treguar realisht këtë gjë.

Marko Bello: Unë si përfaqësues i opozitës, por edhe si ish përfaqësues i mazhorancës mund t’ju them është shumë e rëndësishme dhe lufta e opozitës sepse e vëmë në lëvizje qeverisë, e kritikon, e godet për ta motivuar dhe luftuar këto fenomene, por kur e tepron për qëllime politike siç ka bërë opozita e deridjeshme ku ka nxjerrë çdo gjë sepse jo çdo gjë që ndrin është ar thotë populli dhe jo çdo gjë është e zezë, pra ne jemi bërë si delja e zezë e ballkanit sepse ky është një problem perceptimi.

Nuk jemi ne më pak apo më shumë të korruptuar se vende të tjera në rajon, madje ka vende më të korruptuara se Shqipëria, por në patëm guximin që këta ta hedhim në tryezë dhe të themi zotërinj të pozitës ky është një fenomen ku qeveria nuk mund të luftojë e vetme.

Së dyti lufta kundër korrupsionit është dhe çështje psikologjike. Nëse do ta luftosh korrupsionin vetëm me masa represive siç kërkon ta bëjë mazhoranca e sotme do të ishte një luftë e humbur.

Në një sistem demokratik kjo luftë duhet luftuar me mjete ligjore dhe institucionale që e bën më të vështirë, por më korrekt dhe më të ndershëm.

Filloreta Kodra: Natyrisht nuk mund të merret lufta kundër korrupsionit si çështja madhore dhe e vetme e një vendi, por duhet patur parasysh se opozita e djeshme ka ardhur në pozitë pikërisht me flamurin kundër korrupsionit.

Ka arritje sidomos në luftën kundër krimit, por nga ana tjetër ka probleme të cilat me këtë qeverisje janë shtuar dhe kanë ndikuar në mënyrë të drejtpërdrejtë në mënyrën e jetesës së popullit shqiptar.

Ndërsa qeverisja e mëparshme të cilën populli e votoi për të ndejtur në opozitë kishte probleme me kapjen e shtetit, kjo qeveri ka probleme me kapjen e institucioneve.

Pra ka një frymë autoritarizmi që të komandohen nga një dorë e vetme, parlamenti dhe kjo dallohet me përpjekjet për ndryshimin e rregullores, përpjekje për të vënë në kontroll politik gjyqësorin, ka përpjekje evidente për komandimin me një dorë të vetme të ekzekutivit dhe ne të gjithë jemi dëshmitar dhe unë do ta quaja “raprezalje” që ka ndodhur në administratën shtetërore.

Sokol Olldashi: Në konceptin e qeverisë së sotme ne ndryshojmë nga ajo që thotë zoti Bello në një gjë shumë thelbësore. Ne jemi të prirur që të gjitha problemet që kemi në dimensionin që ato realisht kanë ti njohim, ti pranojmë dhe pastaj tu japim zgjidhje.

Nuk është zgjidhje për problemet e Shqipërisë të thuash që ne kemi problemet më të vogla, ne kemi më pak korrupsion se vendet e tjera, zgjidhje për Shqipërinë është mos të ketë korrupsion Shqipëria.

Brukseli kërkon nga ne si për antarësimin në BE dhe NATO, që të pastrojmë korrupsionin, nuk na kërkohet që ne të pastrojmë Maqedoninë apo Serbinë. Ne na kërkohet të pastrojmë Shqipërinë.

Aleksandër Furxhi:Tani e keni ju në dorë të ndryshoni këtë imazh të Shqipërisë. Marrim koment nga salla.

Salla: Ndihet shumë mirë që kur pozita e tanishme ishte në opozitë thoshte që qeveria ishte e korruptuar. Meqë ne e njohim tashmë këtë fenomen si do e zgjidhë kjo qeveri?

Dorina Cama: Nuk kisha një pyetje, por një konstatim. Në radhë të parë që ekonomia nuk mund të zhvillohet duke patur korrupsion sepse tregtarët mund të falimentojnë duke dhënë rryshfete e duke paguar taksa.

Salla: Duke qenë se jemi në një sistem demokratik po shohim disa metoda që konstatuesi do të shpërblehet për konstatimin e një korrupsioni. A mund të themi që këto janë metoda jo demokratike?

Mirush Kabashi: Unë nuk mendoj se është e saktë që lufta kundër korrupsionit është atribut i politikës qoftë edhe i ekzekutivit, ai është atribut i gjithë shoqërisë.

Unë e duartrokita përgjigjen e zotit Bello, e cila ishte në sikron me përgjigjen e ministrit, që ishte verdikti i popullit që në luftën që po i bëhet korrupsionit për të ecur përpara ndryshoj dhe raportet politike.

Fatmirësisht ne kemi rezultate të mira sepse lufta kundër krimit është shumë më lartë sesa korrupsioni, duket më në minorancë korrupsioni si fenomen në krahasim me krimin.

Filloreta Kodra: Unë desha të përfundoj faktin që theksimi i luftës kundër korrupsionit a ka ndikuar në zhvillimin ekonomik të vendit? Ka ndikuar sidomos në programin e 100 ditëve të para të qeverisë aktuale ishte vënë si objektiv dënimi i personave të cilëve do tu vërtetoheshin akte korruptive.

Akoma dhe sot nuk ka asnjë informacion se çfarë ka ndodhur me këta njerëz. Informacionin publiku e ka që janë larguar në mënyrë masive njerëz nga administrata, por të vërtetuar me akte ligjore që këta njerëz kanë bërë korrupsion nuk di asnjë njeri.

Përveç kësaj është futur dhe një lloj frike në menaxhimin e aktiviteteve pasi është e natyrshme që gjithë populli të luftojë kundër korrupsionit, por ama e ka qeveria në radhë të parë mundësinë dhe detyrimin që të krijojë kushte që njerëzit të publikojnë aktet dhe ti dënojnë ato, të cilat pastaj organet kompetente duhet ti çojnë në vend.

Salla: Unë jam përfaqësuese e Këshillit rinor të qytetit të Durrësit. Deri tani kam vënë re se të gjithë në sallë po pyesin çfarë ka bërë qeveria e mëparshme dhe ç‘po bën qeveria e tanishme për të luftuar korrupsionin. Po ju përse nuk shihni anën e kundërt të monedhës, ç‘keni bërë ju për të luftuar korrupsionin?

Qyteti i Durrësit ka ndërmarrë një nismë të re dhe javës tjetër do zhvillojë një aktivitet 1 javor i cili quhet “Java e antikorrupsionit” një nisëm kjo që do të shërbejë jo vetëm për qytetet Tiranë apo Elbasan, por për gjithë Shqipërinë që të gjithë së bashku të luftojmë korrupsionin.

Salla: Marr shkas nga fjala e zotit ministër që tha që korrupsioni është një marrëdhënie dypalëshe përndryshe nuk do të ekzistonte.

Pikërisht mendoj që qeveria shqiptare më shumë se sa të fokusohet në dërgimin e këtyre rasteve korruptive nëpër gjykata, mendoj që duhet të fokusohet dhe në palën tjetër në atë që është sofistikimi i administratës shqiptare me anë të kompjuterizimit të shërbimeve.

Mungesa e këtij lloj shërbimi është një kyç që sjell korrupsionin sepse një person i cili kërkon një shërbim publik në administratë do të duhet të paguajë dikë që ta marrë më shpejt këtë shërbim, ndërkohë që duke bërë përpjekje për ta ndryshuar këtë shërbim për ta bërë dhe më të shpejtë, korrupsioni do të eliminohet.

Sokol Olldashi: Unë nuk thashë që korrupsioni është një marrëdhënie e dyanshme, unë jam i parimit që peshku qelbet nga koka, jo nga bishti.

Së dyti përsa i përket asaj që përmendi zonja Kodra që ka qenë angazhimi i PD-së të ndëshkojë njerëzit e korruptuar brenda administratës ju siguroj që ne e kemi bërë, por detyra jonë është të raportojmë në institucinet e prokurorisë dhe më pas prokuroria që çon dosjen në gjykatë.

Faza që na takon ne, ne e kemi kryer.

Së treti, njohja e problemit të korrupsionit nuk është një problem që duhet ta bëjë vetëm qeveria është një problem që duhet ta bëjmë globalisht.

Unë e përshëndes zotin Bello që tha që në 3 korrik, partia e tij më së shumti i humbi zgjedhjet për shkak të korrupsionit, por duhet të kemi parasysh që po të shikoni me kujdes zhvillimet në PS, do të shikoni që deklarata e zotit Bello është shumë sporadike, nuk ka një qëndrim institucional të partisë së zotit Bello kundër korrupsionit, nuk ka një pranim zyrtar të asaj që thotë zoti Bello nga PS si strukturë e tërë. Kjo është një deklaratë individuale për tu përshëndetur.

Së katërti, ne kemi marrë masa konkrete kundër korrupsionit. Janë bërë ndryshime në ligjin për konfliktin e interesit, ndryshime në vendimet e këshillit të ministrave për specifikimet e prokurorimeve publike, janë forcuar zyrat e kontrollit financiar në të gjitha institucionet shtetërore, po punohet për “one stop shop” për biznesin, që mos të jetë i detyruar të paguajnë në 48 sportele siç kemi sot, po të shkojë në një zyrë të vetme të marri gjitha letrat, të pagojë taksat që ka për të paguar dhe të mbarojë punë.

Pra një numër masash ligjore dhe administrative që po merren. Dhe e fundit u përmend çështja e bashkëpunimt të publikut në luftën kundër korrupsionit.

Në se ne kërkojmë që kjo luftë të jetë efikase sigurisht kjo nuk mund të bëhet vetëm me mjete represive dhe është argument i kundërt me atë që u përdor.

Ne po kërkojmë që në këtë luftë të marrin pjesë të gjithë dhe sikurse shpërblejmë njerëz që na tregojnë evidenca të rëndësishme për ngjarje kriminale, do të shpërblejmë edhe njerëzit që do na tregojnë evidenca të rëndësishme për afera korruptive sepse në fund të fundit janë paratë tuaja që humbasin atje.

Sonila Myftari: Unë e shikoj shumë të lidhur korrupsionin me ekonominë, pasi në qoftë se do të marrim rrogat duke filluar që nga nëpunësit e thjeshtë do të shikojmë që nuk janë të mjaftueshme për të ecur përpara, atëhere nuk mund të anashkalojmë ekonominë në këtë gjë.

Korrupsioni nuk mund të luftohet vetëm nga ana e politikës, por çdo individ ka detyrën e vet në këtë gjë.

Adriala Kasemi: Flitet shumë për korrupsionin që secili duhet të bëj detyrën e tij, megjithatë mua më krijohet përshtypja e një lëmshi të zjarrtë që asnjë nuk do ta mbajë nëpër duar.

Erion Neci: Kur ishit në opozitë zoti Olldashi keni akuzuar ministrat për korrupsion dhe kontrabandë, sot pothuajse pas një viti që jeni në pushtet dhe këto ish të akuzuar vazhdojnë të flenë qetë nëpër shpitë e tyre.

Mos vallë ata nesër mund t’ju akuzojnë juve për shpifje?

Marko Bello: Nuk është e vërtetë që unë jam zë i veçuar në PS. Jo më larg se dy javë më parë kryetari i PS-së, zoti Rama deklaroi që PS-ja nuk mund të jetë strehë dhe alibi për cilindo i cili ka abuzuar me mandatin që i dhanë socialistët, por ndërkohë ne nuk lejojmë që akuzat politike të kthehen në një gjueti shtrigash për të eleminuar kundërshtarët politikë, siç ka ndodhur jo rallë herë në këto vite.

Dhe me të drejtë këtu u ngrit dhe shqetësimi që ka qenë një retorikë e tepruar e eksponentëve të politikës së djeshme të cilët ndonjëherë harronin që nuk ishin as prokurorë as gjykatës, por thjesht kemi të drejtë të gjithë të denoncojmë cilindo që mund të ketë bërë një afer korruptive, por nuk jemi ne ata që i japim notën se kush është i korruptuar.

Së dyti mund të them që u fol me të drejtë se cilat janë masat për të ndaluar korrupsionin. Një nga masat është parandalimi ashtu si masat profilaktike dhe ne duhet të jemi të kujdesshëm në parandalimin e këtij fenomeni.

Unë mendoj që një nga gjërat që ka bërë kjo qeveri dhe që unë e përshëndes është liberalizimi i liçensave ose lëvizjes së qytetarëve ose të autobuzave sepse vetëm shërbimi publik në qoftë se liberalizohet dhe krijohet konkurenca e lirë, transparenca dhe llogari dhënia, vetëm atëherë do luftohet korrupsioni dhe jo thjesht me goditje.

Sokol Olldashi: Dua ti përgjigjem komentit që korrupsioni është i lidhur dhe me pagat. Sigurisht që është i lidhur dhe për këtë dua të tërheq vëmendjen për një zhvillim që ka qenë në fillim të ardhjes tonë në qeveri.

Ne kërkuam në negociata me FMN-në të bënim një rritje të menjëhershme të pagave dhe për shkak të skepticizmit që kishte fondi në lidhje me të ardhurat në buxhetin e shtetit u shty për këtë periudhë të dytë.

Pse ndodhi kjo? A kemi qenë ne që në 4 vjet kemi thënë që në buxhetin e shtetit futen miliona euro të ardhura nga doganat dhe nga taksat.

Vetëm në 3 muajt e parë të këtij viti kemi 84 milionë dollarë më shumë, pra kemi vërtetuar akuzën tonë për zhdukjen e parave ne zyrat e taksave dhe doganave, kemi shtuar të ardhurat në buxhetin e shtetit dhe me këtë shtim të ardhurash do bëjmë rritjen e pagave dhe pensioneve.

Së dyti është e vërtetë që dhe unë dhe kolegë të mi në opozitë dhe sot në mazhorancë kemi akuzuar eksponentë të PS-së dhe me qetësinë më të madhe i akuzoj prap sot dhe mund t’ju them se brenda këtyre muajve dosja për Anastas Angjelin ka vajtur në prokurori, dosja për tentativë vjedhje dhe privatizimin e klubit Dinamo. Dosja për Arben Malajn, për Dhimitër Raftin, për Igli Toskën, për Spartak Poçin kanë vajtur në prokurori.

Nuk është detyra ime ti marr këta njerëz dhe ti dënoj është detyra e prokurorisë ti shkojë hetimit deri në fund dhe ti paraqisë provat gjykatës, e cila jep dhe verdiktin përfundimtar. Pra detyrën time si ekzekutiv unë e kam të kryer.

Aleksandër Furxhi:Zoti ministër më lejoni t’ju tërheq vëmendjen sepse përmendët disa emra të cilët nuk ishin të pranishëm në debat dhe etika dhe politika e BBC-së e do që ata të kenë mundësi që të mbrohen qoftë edhe ndaj një niveli të tillë akuze.

Ergys Jahollari: Dola pak më parë jashtë dhe pashë që deti ishte shumë i bukur dhe shumë i qetë, por nuk pashë asnjë skaf. Mos e ka ekzagjeruar pak Shqipëria këtë punën e monatoriumit për skafet?

Marko Bello: Mua më kujtohet që kur ishim të vegjël luanim me skafe letre dhe siç duket ka ardhur koha të luajmë përsëri. Problemi është se është një lëvizje e gabuar.

Shqipëria nuk është më një vend nga i cili trafikohen klandestinë siç ka qenë në vitet e mëparshme. Janë vetë vlerësimet e Italisë fqinje që pothujse trafiku vajti zero. Ka pas tentativa të trafikimit të drogës me skafe, por kjo nuk mund të jetë një alibi për qeverinë për të bllokuar për 3 vjet të drejtën qytetarëve.

Ajo që kemi dashur ne dhe kemi thënë ka qenë ulja e fuqisë motorike të skafeve me qëllim që ato të mos jenë të fuqishme për të transportuar njerëz në Itali sepse kjo është një gjë e gabuar e cila dënon me vdekje turizmin shqiptar.

Unë e di që qeveria ka shprehur që vetëm në këtë mënyrë do bëjmë të mundur liberalizimin e vizave, nuk është kjo arsyeja. Liberalizimi i vizave do të vijë nga kartat e identitetit, për pashaportat biometrike që një qytetar shqiptar të mos lëviz më 3 identitete të rreme ose të ndryshme.

Së dyti kontrolli i kufijve shqiptarë.

Mirush Kabashi: Deti Durrësit do ishte shumë i bukur nëse do shikonte më tepër tragete dhe qytetarët shqiptarë të shkonin e vinin si gjithë qytetarët e Europës me pasaporta të rregullta.

Aleksandër Furxhi: Dimë që Shqipëria nuk është rasti i vetëm në vendosjen e një monatoriumi për ndalimin e skafeve me shpejtësi të madhe.

Kemi rastin e Gjibraltarit, një territor fare i vogël në bregun jugperëndim të Europës, fare pranë Afrikës, një territor nën autoritetin britanik. Ky monatorium në Gjibraltar po zbatohet prej 11 vjetësh. Arben Manaj i BBC ka udhëtuar posaçërisht në Gjibraltar i cili na sjell këtë përvojë.

Arben Manaj: Ky këtu është aeroporti i Gjibraltarit dhe unë do të thoja që është tmerresisht unikal për faktin sepse këtu kalon edhe autostrada edhe makina, dhe ulen dhe avionë dhe kjo ndodh pikërisht sepse Gjibraltari ka një sipërfaqe prej 8 km katrorë dhe një popullsi prej 28 mijë vetësh.

Por për nga rëndësia strategjike, Gjibraltari është një nga vendet më strategjike në botë.

I pozicionuar në pikën më fundore të Europës, vetëm 14 milje larg Marokut në Afrikë, në ngushticën e Gjibraltarit kryhet një nga volumet më të mëdha të trafikut detar në botë. Gjibraltari në pjesën më të madhe përbëhet nga një kodër shkëmbore rreth 400 metra e lartë e cila nga vendasit njihet me emrin “The rock” ose “Shkembi”, emër me të cilin njihet dhe vet territori i Gjibraltarit.

“The Rock” njihet më shumë për dy gjëra, për radarët e fuqishëm të cilët kontrollojnë lëvizjen në ngushticë, si dhe majmunët në gjendje të egër të cilët ndodhen në këtë pjesë të botës që kur nuk mbahet mend.

Pikërisht pse ka një pozicion të tillë mes Europës dhe Afrikës në ujrat e Gjibraltarit deri përpara 11 vjetësh është zhvilluar një aktivitet i ethshëm trafiku të paligjshëm dhe kontrabande kryesisht të cigareve dhe drogës, me Spanjën dhe Afrikën.

Qeveria e atëhershme e Gjibraltarit nxori një ligj i cili bllokoj brenda natës afro 350 skafe tepër të shpejtë të përdorur nga trafikantët. Në zyrën e kryeministrit na thonë se heronjtë e heshtur janë në një zyrë tjetër.

Njeri prej tyre është ai që epitemizon zbatimin e moratoriumit të skafeve. Ai është superintendenti i policisë mbretërore të Gjibraltarit, zoti Richard Bolsano, i cili në atë kohë drejtonte operacionet kundër trafikantëve.

Në bazë të moratoriumit të vitit 1995 ndaloheshin të gjithë motoskafët të një fuqie prej 200 – 220 kuaj fuqi si dhe me një gjatësi prej afro 6 metrash. Në zyrën e tij zoti Bosano tregon fotografi nga ato operacione të cilat i ka vendosur në murin e zyrës së vet.

Zoti Bosano kanë kaluar 11 vjet që nga hyrja në fuqi e moratoriumit për ndalimin e skafeve këtu në Gjibraltar. Përse morët këtë vendim?

Richard Bosano: Fillimisht ishte qeveria ajo që miratoj legjislacionin e nevojshëm, për shkak se përmasat e kontrabandës në atë periudhë po ndikonin mbi ndërtimin moral të vetë shoqërisë së këtushme. Njerëzit e zakonshëm nuk donin që kontrabanda të vazhdonte në Gjibraltar.

Arben Manaj: Të gjithë i mbajnë mend ato kohë. Rrugës për nga hoteli në skajin më jugor të shkëmbit ku duket fare qartë Afrika, shoferi i taksisë Gonzalo Hurathjo, më thotë se moratoriumi i skafeve ishte një gjë e mirë. Momentalisht nuk ka asnjë lloj kontrabande në Gjibraltar më thotë Gonzale.

Në kohën kur u ndaluan skafet pati protesta si nga ata që ishin pro moratoriumit dhe nga vetë skafistët, madje dhe të dhunshme si të parat dhe të vetmet protesta në Gjibraltar më thotë gazetari vendas Jim Watt, të cilin e takova në marinën detare. Për shkak të moratoriumit kjo faqe e historisë së Gjibraltarit është e mbyllur një herë e përgjithmonë.

Jim Watt: Shumica e njerëzve mendojnë se moratoriumi ishte një gjë e mirë pasi situata ishte jashtë kontrollit. Moratoriumi ishte shumë efektiv në ndalimin e kontrabandës së cigareve.

Por pati dhe nga ata kundër këtij moratoriumi. Njeri prej tyre ishte Fred Darvisher, i cili më thotë se moratoriumi ndoshta u bë për qëllime të mira, por mund të ishin gjetur rrugë më të mira thotë ai. E vërteta është se trafiqet kryen nga njerëzit dhe jo nga skafet.

Fred Darvisher: Përveç biznesit të mbajtjeve të mjeteve detare, unë kam dhe një biznes të mjeteve të zhytjes në det. Tipi i skafeve që është ndaluar nga moratoriumi është pikërisht ai që preferohet nga turistët nga Europa veriore për të bërë zhytjet në det. Aktualisht ne po humbasim turist sepse nuk përmbushim dot kërkesat e tyre.

Arben Manaj: Në majë të shkëmbit të Gjibraltarit turistët janë të shumtë, ashtu sikurse dhe radarët dhe majmunët në gjendje të egër që luajnë me vizitorët e shumtë.

Stephany Wellstead është menaxhere komerciale jo vetëm për teleferikun, por edhe për agjencinë “Bota e delfinëve”. Ajo më thotë se reputacioni i Gjibraltarit është përmirësuar shumë pas zbatimit të moratoriumit të skafeve.

Në zyrën e tij superintendenti i policisë mbretërore, zoti Richard Bosano, “Katani” i gjallë i Gjibraltarit më tha se nuk kam bërë asgjë kompensim për skafet e konfiskuara.

Zoti Bosano, nëse ministri i brendshëm i Shqipërisë do të kërkontë një këshillë nga ju lidhur me këtë çështje, çfarë këshille do ti jepnit?

Richard Bosano: Së pari do ta kisha pyetur ministrin e brendshëm nëse komuniteti juaj e do një legjislacion të tillë. Veproni me rreptësi, tregojuni njerëzve se jeni të angazhuar në kryerjen e kësaj detyre, siguroni përkrahje. Pas kësaj do të bini në qetësi, trafikantët do ti përzini.

Arben Manaj: Me ndërhyrjen e zotit Bosano, na mundësohet të shkojmë në kantierin e marinës detare për të parë disa nga skafet relikë të kapur nga trafikantët në atë kohë. Ndonëse ishte një ditë e trazuar për daljen në det të hapur falë xhentilesës së mikpritësve vendosëm të ndjekim një patrullim të policisë mbretërore në ngushticën e Gjibraltarit me një trafik shumë të madh lundrimi ndërkombëtar.

Këtu jemi në ujrat e ngushticës së Gjibraltarit. Në të majtën timë është Maroku, mbrapa është Gjibraltari dhe më poshtë Spanja. Në këto ujra para 11 vjetësh vlonte kontrabanda, ndërsa sot pas moratoriumit të skafeve gjithë ata që ishin pro dhe kundër bien dakort vetëm në një pikë, që sot e kësaj dite Gjibraltari i ka vënë kapakun këtij fenomeni. Arben Manaj, BBC, ngushtica e Gjibraltarit në det të trazuar.

Aleksandër Furxhi: Zoti ministër ishte një pyetje në dokumentar që gazetari ynë e bëri në emër tuaj. çfarë keni për të thënë?

Sokol Olldashi: E njoh praktikën e Gjibraltarit sepse ka qenë një nga praktikat që ministria e ka studiar më me kujdes kur ka hartuar draftin e moratoriumit. Nuk është e vetmja, por me moratoriumin që ne kemi vendosur dhe me kushtet tona është më e përafërta.

Moratoriumi është një hap që merret për të njëjtat qëllime për të bllokuar trafiqet. Mirushi me të drejtë tha se unë nuk disponoj shifra për të thënë se sa, por ja them unë shifrat. Vetëm në vitin 2004 ne kemi eksportuar vetëm drejt Italisë 1 ton heroinë e kapur sipas statistikave të policisë italiane. Ne pretendojmë që italianët dhe qytetarët e tjerë të BE-së të na japin viston që ne të bashkohemi me ta.

Atëherë, a duam ta frenojmë këtë trafik dhe të bëhemi të barabartë me ta dhe mos të na shikojnë si delet e zeza të Europës që transportojmë vetëm kriminalitet, drogë, banda që vjedhin shtëpitë e përdhunojnë njerëz? Nëse duam ta ndryshojmë këtë imazh duhet të ndërmarrim disa lëvizje që herë herë janë edhe drastike në koncept, sepse drastike në realitet këto nuk janë. Moratoriumi prek vetëm 140 njerëz, nuk prek as turizmin, as transportin dhe as mjetet e lundrimit.

Filloreta Kodra: Unë pajtohem me ministrin që ne duhet të ndërpresim trafikun e drogave, por nuk pajtohem me format që janë zgjedhur për ta ndërprerë dhe nuk jam e bindur nëse do të ndërpritet apo jo.

Unë nuk mund të flas me shifra se sa janë personat që kanë skafe, por unë di që në bregdet ka shumë ankesa se po u preket buka e përditshme.

Sokol Olldashi: Mund të bëhen komente mbi bazën e një informacioni të pavërtetë. Asnjë anije peshkimi nuk preket, edhe peshkatarët që përdorin varka apo motoskaf të vegjël mund ti regjistrojnë këto pajisje pranë kapitenerisë së portit dhe të regjistrohen vetë si të vetpunësuar dhe i vetmi kontribut që do paguajnë janë sigurimet shoqërore për vete.

Entela Bajramaj: Ne kemi xhiruar me kamer të fshehtë blerjen e një sasie droge, kokainë, në Tiranë dhe me këtë sasi droge jemi paraqitur tek zyrtarët e lartë të policisë dhe kemi kërkuar që të dorëzojmë drogën e të marrim një reagim të tyre në këtë kronikë.

Unë vazhdoj ta kem ende drogën sepse asnjë nga zyrtarët e lartë të policisë nuk më ka pritur. Sipas jush media dhe policia duhet të jenë partnerë apo duhet të jenë armiq në këtë luftë të këtij fenomeni degradues.

Salla: Vendimi i mazhorancës për të bllokuar për 3 vjet skafet ka një kosto goxha të madhe politike. Po të vëmë re 10 deputetë të mazhorancës vijnë nga zona elektorale pranë bregdetit. Nëse do jetë ajo që thotë kryeministri Berisha se pas këtij vendimi do ketë liberalizim të vizave atëherë unë mendoj se ja vlenë të sakrifikosh 140 familje, që pas 2 – 3 vjetësh të lëvizin disa grupe të caktuara të shoqërisë lirshëm në Europë.

Entiol Laço: Zoti Bosano, në Gjibraltar tha që në radhë të parë ministri duhet të pyesë popullin komunitetin se cila është më e mira, a e ka bërë ministri këtë?

Luciano Qafoku: Nuk është çështja a e ka pyetur apo jo ministri dhe nuk kalojnë gjërat me një “na falni” të kryeministrit për ata që preken nga ky moratorium. çështja qëndron që dhe kur ky trafik ekzistonte nuk dilte njeri dhe i përdorte skafet në mes të ditës dhe ju polica rrini e na shikoni.

Natën bëheshin këto punë. A është e sigurtë policia që nuk vazhdojnë dhe bëhen po prap tani natën sepse natën besoj dalin dhe tani? Ma merr medja që trafiku vazhdon përsëri të bëhet.

Briseida Mema: Unë jam shumë dakort me komentin që bëri parafolësi. Pikërisht një moratorium duhet shoqëruar gjithmonë dhe me masa të tjera, me një forcim shumë të madh të shtetit ligjor.

Meqë pati dhe një polemik për shifrat do desha të shtoja një nga kushtet kryesore që i është vënë Shqipërisë për integrimin në BE dhe në NATO ka qenë lufta kundër korrupsionit dhe krimit të organizuar, duhet të kemi parasysh që sasia e drogës që ka kaluar nga Shqipëria në vitin 2004 – 2005 është vlerësuar nga policitë ndërkombëtare me shifrën 2 miliardë USD.

Kjo shifër e konvertuar në 30% e drogës së Ballkanit ka kaluar nga Shqipëria e cila ka shërbyer pak a shumë si Gjibraltari një urë lidhëse midis lindjes dhe perëndimit. Por unë jam me atë që moratoriumi i skafeve që shpresoj mos të zgjasë 11 vjet sa Gjibraltari është shumë i lidhur me korrupsionin, me shtetit ligjor, me masat të tjera ku kontribojmë të gjithë.

Filloreta Kodra: Trafiku i lëndëve narkotike nuk bëhet vetëm nëpërmjet detit dhe dyshojmë se nesër qeveria do të ndërpresë edhe gjithë trafikun e kamionave sepse dhe në to janë gjetur lëndë narkotike.

Do të thosha që kjo është një masë drastike e cila në vetvete fsheh atë paaftësinë e qeverisë për të kontrolluar kufijtë dhe gjithashtu është edhe ai shqetësim që ne si opozitë kemi është një tendencë për të qeverisur me masa represive.

Kjo po ndihet dhe në administratë, mosrealizimi i investimeve publike, mos bërja e tenderave është frikë e punonjësve të administratës ndaj masave që mund të merren pikërisht prej ligjit të spiunëve të ashtuqujtur se mos denoncojnë njeri tjetrin.

Manjola Stafa: A mendoni se Durrësi në fillim të këtij sezoni turistik ofron kushte maximale për ardhjen e turistëve?

Mirush Kabashi: Unë do të flas për anën shpirtërore të durrsakëve, nuk mund të flas nga pikëpamja administrative sepse nuk i kam dhe të dhënat. Unë them që durrsakët janë njerëz që gjithë jetën i kanë patur shumë përzemër të ardhurit.

Tashmë bashkatdhetarët tanë nga Kosova, Maqedonia, Mal i zi, po vijnë rëndom në qytetin e Durrësit dhe po gjejnë me të vërtetë gjithmonë kushte dhe më të mira.

Premtimet që sivjet do të ketë edhe drita edhe ujë, si dhe premtimet e bashkisë nga pikëpamja e higjenës janë garancia e madhe që edhe ky sektor i ekonomisë do të jetë gjithmonë dhe më efikas. Nuk mund të mendosh që ndryshimet do të jenë drastike pasi nuk mund të mendosh që nga zero të shkosh në fund.

Ka një evolim në këtë aspekt dhe nga gjithë mentaliteti i qytetarëve të Durrësit, ata gjithmonë e më tepër dhe me biznesin e vogël e të madh, po krijohet ideja që sa më tepër ata të jenë në shërbim të turizmit, aq më shumë produktivitet do të kenë.

Sokol Olldashi: Unë besoj që një pjesë të punës së ministrisë time në Durrës i kam mbyllur, megjithatë kthehemi tek pyetja. Granti që i është dhënë bashkisë së Durrësit këtë vit nga qeveria është trefish më i lartë.

Në vitin 2005 ka patur një grant relativisht më të ulët, pavarësisht se bashkia e Durrësit drejtohet nga një kryetar që është i PS-së. Në mënyrë që të ketë mundësi të investohet në prag të sezonit ne kemi trefishuar këtë grant.

Së dyti, po proçedohet me urgjencën më të madhe për fillimin e punimeve në unazën e Shkozetit dhe ne shpresojmë ta mbyllim përpara pikut të sezonit.

Së treti, po përpiqemi të stimulojmë investimet në Ujësjellësin, megjithëse Ujësjellësi Durrësit ka një kontratë pak specifike dhe ndërkohë ky rrjet është rrjeti më i vjetër dhe më problematik në Shqipëri.

Së katërti, do të bëhet me urgjencë një riveshje e rrugës Milot – Kukës prej nga vjen dhe një pjesë e mirë e fluksit të pushuesve për hotelet e plazhit të Durrësit në mënyrë që të jetë më atraktiv Durrësi sesa Ulqini sepse ai fluks turistësh diku do të shkojë.

I vetmi kush optimal që përmbushet deri tani 100%, por që nuk varet nga qeveria këta janë durrsakët.

Aleksandër Furxhi: Ishte një list premtimesh te gjitha në kohën e ardhme dhe mu duk jo fort optimiste.

Aleksandër Allamani: U fol për Durrësin dhe dëgjova shumë premtime. Realisht për mua, pavarësisht se nuk jam durrsak them që është në gjendje të mjerueshme sepse është një papastërti e madhe, nuk ekzistojnë as koshat për të hedhur plehrat apo për nevoja personale, mos të flasim dhe për ndërtimet që po bëhen pa leje.

Sokol Olldashi:
Përpara se të bëni konstatime të tilla duhet që të jeni të qartë për ndarjen e përgjegjësive në një sistem qeverisje. Koshat e hedhjes së mbeturinave nuk janë detyrë e ministrive, por e bashkisë së Durrësit, pra duhet të jeni më të kujdesshëm kur drejtoni pyetje dhe kur konstatoni gjëra.

Ilir Memko: Jam nga Durrësi dhe konstatoj meqë jam dhe qytetar dhe banor i plazhit me përjashtim shumë të rallë të gjithë hotelet që i ofrohen pushuesve janë me ujë pusi.

Klementina Cenkollari:Unë nuk jam nga Durrësi, por gjithsesi zoti ministër numëroj një varg projektesh që kishte nisur për qytetin e Durrësit dhe gjatë gjithë kohës përdori kohën e ardhme. Mos mendoni se këto duhet ti kishit nisur, ne jemi në muajin maj dhe në korrik fillon piku i sezonit?

Marko Bello: Marr shkas nga komentet dhe shqetësimi është i saktë, e kam konstatuar dhe vetë pasi jam një dashamirës i Durrësit dhe vet e pëlqej shumë këtë qytet. Për fat të keq nuk ka lëvizur as edhe një lopët dhe në këto 9 muaj. Iku koha kur këta vetëm kritikonin dhe duhet të japin llogari tani.

Ka thënë zoti Berisha në Kavajë që brenda vitit të gjithë qytetet bregdetare të Shqipërisë do të kenë ujë 24 orë në ditë, një premtim ky që nuk do të mbahet dot.

Dhe nuk është e vërtetë qe ka patur trefishim të grantit të bashkisë së Durrësit, përkundrazi të gjithë bashkitë që drejtohen nga përfaqësues të PS-së dhe këtu flas dhe për bashkinë e Beratit ku jam vet deputet ka një akordim fondesh qesharake. Në komunat e Beratit është sa rroga ime mujore fondi për investime.

Sokol Olldashi: Grantin ju e keni patur 270 milion ne e kemi 520 milion lekë. Për investimet në rrugën e Shkozetit nuk kemi gjetur projekt. Kemi ndërmarrë gjatë gjithë kësaj kohe punë voluminoze për të mbaruar brenda një kohe mjaft të shkurtër projektin e rrugës sepse nuk mund të hedhim miliona lekë siç bëhej dikur pa një studim, pa një projekt, pa volume pune, pa preventiva. Problemi i sistemit të ujësjellësit të Durrësit është një marrëveshje konçesioni që e kanë nënshkruar këta zotërinj që akoma nuk e di njeri se si do zgjidhet.

Përsa i përket investimeve që janë bërë brenda bashkisë së Durrësit nëse ju kujtohej në 3 korrik, treçereku i rrugëve të Durrësit kanë qenë të hapura dhe të lëna në mes sepse ishin punë të papaguara.

Aleksandër Furxhi:Më duhet ta mbyll këtu debatin e sotëm në Durrës. Falenderoj të gjithëve për pjesmarrjen.