http://www.bbcalbanian.com

21 qershor, 2010 - Published 16:16 GMT

Çfarë po ndodh me 'të talentuarit' e Evropës

Anglia e pati të vështirë me Algjerinë, Italia nuk arriti të mposhte Zelandën e Re, Franca humbi me Meksikën, ndërsa Spanja u mund nga Zvicra.

Çfarë ka ndodhur me futbollistët që supozohet se janë "më të mirë e Evropës"?

Nëse i lexon gazetat në Londër, Paris, Romë apo Madrid kryetitujt e tyre ankohen për rezultatet e ndeshjeve të para në Afrikën e Jugut.

Ditën e djelë ekipi francez refuzoi të merrte pjesë në stërvitje, në shenjë proteste ndaj vendimit për të përjashtuar nga rradhët e ekipit një prej lojëtarëve që kishte bërë fjalë me trajnerin.

Për ish futbollistin francez, Zinadine Zidane përplasjet në fushë nuk janë gjë e re.

Ai u nxorr jashtë me karton të kuq gjatë kampionatit Evropian 2008, pasi goditi me kokë futbollistin italian, Marco Matterazzi.

Por tani Zidane është mjaft kritik lidhur me mënyrën se si është trajtuar përplasja e ekipit francez me menaxherin e tyre.

Deklarata e Zidane

"Problemi është kur kjo çështje bëhet publike dhe pastaj komplikohet dhe bëhet shumë serioze."

"Çfarëdo që të ketë ndodhur, ajo u bë tani. Ai (Anelka) u përjashtua nga ekipi dhe ky ishte vendimi i federatës."

"Vendimi i lojëtarëve për të mos pranuar të stërviten është një gjë, me të cilën unë nuk pajtohem."

Megjithëse nuk jam pjesë e ekipit dhe nuk e di se çfarë shkon në mendjet e lojëtarëve përsëri nuk pajtohem që ata nuk stërviten."

"Sikurse e tha edhe një gazetar, dy gjëra do të mbahen mend nga ky kampionat. Fituesi dhe ekipi francez që nuk pranon të stërvitet", tha Zidane.

Reagime në Francë

Tifozët nga ana e tyre nuk kanë qënë shumë të impresionuar me mënyrën se si është sjellë ekipi francez.

Disa e kanë quajtur të tmerrshme dhe të shëmtuar atë që po ndodh dhe turpëruese për Francën.

Gazetari francez Philippe Auclair tregon për BBC-në më në hollësi për shkaqet e kësaj situate dhe reagimet që ka sjellë në Francë.

Auclair: Kjo ngjarje ka bërë shumë bujë. Mbulimi i saj ishte i përmasave të mbulimit të një skandali politik në të gjitha mediat si edhe subjekt bisedash në shtepi, bare dhe kafene kudo.

Ky mbulim masiv bëhet për disa arsye. Kryesorja ka të bëjë me dimensionin që mori ekipi francez, kur fitoi në 1998, kur u bë kampion i botës.

Edhe më parë francezët ishin të interesuar, por në 1998 ndodhi diçka tjetër.

Një lidhje mes ekipit dhe vendit që u konfirmua në Euro 2000.

Ky bashkim shkoi përtej sportit. Ai shihej si simbol i Francës së re, apo i premtimit për një Francë të re me lojtarë me prejardhje të ndryshme etnike që ishin të bashkuar dhe ishin fitues.

Kësaj here ishte komplet e kundërta. Këtë herë është një histori jo dashurie që ka vite që po ndodh mes Francës dhe ekipit kombëtar.

Ditët e fundit kemi farsën tragji-komike që ka ndodhur në fushë dhe në mënyrë të veçantë jashtë saj dhe papritmas duket sikur të gjithë kanë diçka për të thënë lidhur me këtë.

BBC: Por cili është shkaku lidhur me atë që po ndodh brenda ekipit francez?

Auclair: Është fakti që ekipi francez ka një menaxher në krye që është i paaftë dhe që është ditur prej vitesh.

Ai u shpëtua kur lojtarët e morën vetë situatën në kontroll në 2006 duke imponuar taktikat e tyre, gjë që e çoi ekipin në finale.

Por që t'i kalosh të gjithë fajin zotit Domeneche do të ishte e gabuar.

Problemi qëndron në faktin që sistemi francez që ishte aq i suksesshëm në 1998 dhe 2000, është një sistem që është vjetëruar keq.

Ai sistem nuk është më nivel me atë që po ndodh me botën e futbollit, me personalitetin e lojtarëve sot dhe me atë që kërkohet nga një ekip kombëtar etj.

Organizata është shumë arkaike dhe ajo është në duar të njerëzve që ndoshta nuk kanë interes parësor futbollin.

BBC: Nga ana tjetër ka patur edhe kritika përsa i takon përbërjes së ekipit.

Auclair: Komente janë bërë prej kohësh nga Jean Marie le Penn dhe Fronti Kombëtar, në 1996 dhe 1998, komente që janë bërë për etninë e lojtarëve.

Këto komente kanë dalë përsëri në sipërfaqe.

Fitorja e vitit 1998 dhe 2000 ishte ndoshta reagimi më i fuqishëm ndaj Jean Marie le Penn.

Ndërsa tani kemi të kundërtën e asaj situate, ndaj them se është shumë e rëndësishme, sepse ka pasoja përtej futbollit.

Ka njerëz që thonë se çfarë mund të presësh nga një ekip që vjen nga periferitë.

BBC: E kanë fjalën për lojtarë që janë me origjinë jo evropiane?

Auclair: Lojëtarë që i përkasin një brezi që nuk e ka kulturën e punës, apo vlerave, përveç parave, femrave etj.

Është një situatë e shëmtuar.

Politikanët janë përfshirë në këtë debat duke thënë se është e turpshme, ky ekip nuk ka përfaqëson, ata duhet të kthehen në vend.

Kur lexon përmes rreshtave, shqetësohesh. Nuk them se komentet e tyre nuk kanë bazë.

Ajo që po them është, se ato po marrin një drejtim që është shumë i pakëndshëm.