Stadium Arcadium dy orë muzikë nga Chilis

Pas gati një çerek shekulli bashkë, Red Hot Chili Peppers janë në majat e e karierës së tyre.

Kanë kaluar katër vjet që prej albumit të fundit, dhe Stadium Arcadium duket sikur dëshiron të ngopë të gjithë 'fansat' (adhuruesit) e uritur për krijmtari të re nga Chilis.

Albumi me numër 9 i kalifornianëve ka 28 këngë dhe gjithësej dy orë të plota muzikë.

Në Stadium Arcadium ka dy lloj këngësh;të mira dhe shumë të mira, disa këngë të ngjashme me krijmtarinë e mëparshme si edhe plot këngë dashurie.

Çfarë po ndodh me Chilis?

Pas rregjistrimit të albumit 'By the Way' në 2002 dhe koncerteve të suksesshme në Hyde Park në Londër, Red Hot Chili Peppers u tërhoqën në shtëpinë e producentit të tyre të vjetër dhe rregjistruan materiale sa për tre albume.

Në fillimet e tyre në 1985, u tha se asgjë e mirë nuk pritej të dilte nga ky grup që ishte i dominuar nga një anë e errët. Sot Chilis të mahnisin me kreativitetin e tyre.

Stadium Arcadium, nuk është një album me një koncept të caktuar. Ai është një reflektim i spiritualizmit imagjinar të periudhës pas daljes nga varësia prej drogës.

Anthony Kiedis, lideri dhe vokali i grupit, thotë se titulli i albumit ka të bëjë me euforinë gati religjioze që ka shoqëruar koncertet e tyre në stadiume.

Në këtë album të dyfishtë, ka gjithandej këngë dashurie, këngë ku shprehet keqardhje për të kaluarën.

Këto janë pjesërisht reflektime të eksperiencave që e identifikuan vokalistin Kiedis me drogën dhe gratë.

Jo seks, por dashuri

Stadium Arcadium lulëzon në krijmtari, dhe kjo sipas Kiedis ka të bëjë me ideologjinë dhe harmoninë që ekziston brenda grupit, por nga ana atjetër edhe me dashuritë që i ka prekur më të fund jetët e mesoburrave të grupit.

Basisti Flea ka një vajzë katër muajshe, pas të cilës është i çmendur fare, beteristi Chad Smith ka një djalë 10 muajsh, truri muzikor i albumit John Frusciante (dhe më i riu i grupit) ka rënë kokë e këmbë në dashuri me këngëtaren Emily Kokal, me të cilën ka bashkëpunuar edhe nga ana muzikore.

Për vetë 'zotin Kiedis' flitet se pret të bëhet baba nga lidhja me një modele 19- vjeçare e quajtur Jessica Stam.

Disa nga këngët e albumit:

'Charlie' është një këngë për një shpirt imagjinar që sillet në mendje. Ky shpirt mund të jetë kokaina ose një femër.

'C'mon girl' është një këngë që vlerëson dëmin që kanë shkaktuar mbi Kiedis marrëdhëniet (jo normale) me gratë.

'Wet sand' është për një djalë që beson në zot dhe një vajzë që beson në evolucion. Debati mes tyre nuk mund të dalë me një kokluzion.

'Hey' është kënga himn e albumit. Ajo të con në vendin përpara se të lindësh dhe në atë që shkon pasi vdes, thotë Kiedis. Kënga jep mesazhin lëre 'atë gjë që po të bën të vdesësh'.

'Dani California' është një vazhdim i jetës së personazhit në qendër të këngëve nga albumet 'Californication' dhe 'By the way'. Ajo është vajza e një polici e dhënë jashtë mase pas anarkisë, por në këtë këngë ajo takohet me Perëndinë.

'Tell me Baby' është në stilin e vjetër të Kiedis. Casanova duke kërkuar prenë e rradhës.

Në Stadium Arcadium, Chilis janë më të pjekur si burra dhe të dhënë pas një tjetër dependence, kësaj rradhe shpirtërore.

"Më mirë pak dritë, sesa fare", ka thënë Kiedis i pyetur përse ishte ndjekës i fesë Kabalah, sekt që rrjedh nga besimi hebraik, promovues i të cilit është bërë Madonna.

Për më shumë të reja nga muzika dërgjoni programin Ritëm&Pop që transmetohet çdo të djelë duke filluar nga ora 1430 dhe 1930 në valët e BBC-së në shqip.