Porosia është nënshkruar nga kryeministri britanik, Tony Blair, nga Jose Maria Aznar i Spanjës dhe Silvio Berluskoni i Italisë, si dhe nga homologët e tyre në Portugali, Republikën Çeke, Danimarkë, Poloni dhe Hungari.

Ata thonë se Evropa ka një lidhje me Shtetet e Bashkuara, që i ka qëndruar testimit të kohës dhe nuk duhet të bëhet viktimë e përpjekjeve të vazhdueshme të Irakut për të kërcënuar sigurinë e botës.

Ata i bënë thirrje Këshillit të Sigurimit të Kombeve të Bashkuara që të mbajë kredibilitetin e tij përmes sigurimit se Iraku i është përmbajtur plotësisht rezolutave për çaramatim.

Porosia nuk është nënshkruar nga Franca dhe Gjermania, të cilat ishin më të zëshmet në shfaqjen e dyshimeve për mençurinë e luftës me Irakun. Ambasadori francez në Kombet e Bashkuara, Jean Marc de la Sabliere tha:

"Shumica në Këshillin e Sigurimit të Kombeve të Bashkuara mendojnë se duhet të vazhdojmë me inspektime. Inspektorët duhet të kenë më shumë kohë. Ky është mendimi i shumicës në Këshillin e Sigurimit dhe unë mendoj se kjo duhet respektuar, tha ambasadori francez në OKB, Jean Marc de la Sabliere.

Blair dhe Berluskoni udhëtojnë në Uashington

Blair përpiqet të sigurojë mbështetje të reja

Ndërkohë, një raund i ri i diplomacisë evropiane mbi Irakun ka filluar me kryeministrin britanik Tony Blair, i cili zhvilloi takime në Londër me homologun e tij italian, Silvio Berluskoni.

Të dy udhëheqësit pritet të takohen me presidentin Bush në Uashington, zoti Berluskoni sot gjatë ditës ndërkaq kryeministri britanik Blair ditën e premte.

Zoti Blair do të udhëtojë në Shtetet e Bashkuara përmes Madridit, ku do të zhvillojë takime sot me kryeministrin spanjol, Jose Maria Aznar.

Iraku akuzon kryeinspektorin Blix

Ndërkaq, Iraku ka akuzuar shefin e inspektorëve të armëve të Kombeve të Bahskuara, Hans Bliks, për keqinterpretim të shënimeve irakiane për përmbushje të obligimeve për çarmatim.

Një letër që iu shpërnda anëtarëve të Këshillit të Sigurimit të Kombeve të Bashkuara përshkruan si fatkeqe vlerësimet e zotit Bliks se pas dymbëdhjetë vjetësh, Iraku ende duhet të pranojë me sinqeritet obligimet për eliminimin e armëve të shkatërrimeve masive.

Irakianët zotohen të vazhdojnë bashkëpunimin dhe thonë se kjo do të përcillet edhe në rastin e zbulimeve të disa mbushjeve kimike gjatë muajit të kaluar.