Në një konferencë organizuar nga qeveria britanike me pjesëmarrjen e rreth 60 delegacioneve, ministra të brendshëm dhe zyrtarë të lartë të sigurisë nga Bashkimi Evropian dhe Evropa juglindore, u vu në dukje se krimi është kthyer në një biznes mjaft fitimprurës për tregtinë e drogës, armëve e cigareve, trafikun e emigrantëve të paligjshëm si dhe prostitucionit.

	Krimi i organizuar është një përçudnim i drejtësisë, një pengesë për progresin e vendeve të rajonit dhe një rrezik për sigurinë e të gjithëve ne këtu, thjeshtë, ai duhet të ndalohet.
	Havier Solana, përfaqësuesi evropian për sigurinë

Qëllimi i konferencës, sipas organizatorëve, është galvanizimi i përkrahjes politike të qeverive të ballkanike për të luftuar krimin e organizuar të cilin sekretari i Jashtëm britanik Jack Straw e quajti "një pengesë serioze për integrimin evropian të Ballkanit".

Ai tha se në konferencë do të hulumtohen me imtësi shkaqet dhe problemet e krimit të organizuar dhe diskutohet për mënyrat e reja të luftimit të këtij fenomeni.

Por zoti Straw shtoi: "Fakti që kjo konferencë përqëndrohet në Evropën Juglindore nuk do të thotë se krimi i organizuar është problem vetëm në këtë rajon."

Jo fjalë, por vepra

Sekretari i brendshëm britanik, David Blunkett, tha se Britania dhe vendet të tjera të BE-së po bashkëpunojnë me vendet Ballkanike si Shqipëria, Bosnja, Kroacia dhe Jugosllavia në luftën kundër trafikut të emigratëve ilegalë, trafiku të armëve dhe të prostitucionit.

Blunkett: Fjalët të shndërrohen në vepra

Zoti Blunkett bëri thirrje që "fjalët të shoqërohen me vepra".

"Në dhjetë vitet e ardhshme ne do të gjykohemi për punën dhe jo fjalët," tha ai.

Përfaqësuesi i BE-së për politikat e sigurisë, Havier Solana, u tha se zyrtarëve të lartë nga Evropa juglindore që të mos lejojnë që krimi i organizuar "të rrezikojë të ardhmen e integrimit tuaj në Evropë."

"Dua të them se Ballkani është Evropë dhe ne kemi një të ardhme të përbashkët," tha zoti Solana në konferencë.

"Por edhe për ne vendet e BE-së është e padurueshme që krimi i organizuar të pengojë vendosjen e shtetit ligjor në rajonin pranë nesh.

"Ky është mesazhi i qartë që japim ne sot," tha zoti Solana.

Komisioneri i Jashtëm Evropian Chris Patten tha se nuk është e mjaftueshme që vetëm të miratohen ligje.

"Një nga dobësitë e vendeve Ballkanike është mungesa e normave dytësore, ligjet duhet të zbatohen," tha zoti Patten.

"Aprovimi i ligjeve dhe konventave ndërkombëtare nuk ka dobi nëse ato nuk zbatohen në terren," tha ai.