Vendimi unanim befasoi vëzhguesit të cilët prisnin që Siria të abstenonte. Është triumf diplomatik për administratën e Bushit.

Presidenti Bush, duke folur nga Kopshti i Trëndafilave i Shtëpisë së Bardhë, tha se Iraku do të çarmatosej dhe e vetmja çështje ishte nëse kjo do të bëhej në paqe apo jo.

"Me rezolutën e sapomiratuar, Këshilli i Sigurimit i OKB-së ka përmbushur përgjegjësi të rëndësishme, i ka dhënë shtytje parimeve të tij, dhe ka dhënë njoftim të drejtë se Sadam Huseini duhet të zbulojë plotësisht dhe të asgjësojë armët e tija për shkatërrim në masë," tha presidenti Bush.

	Kjo rezolutë bazohet në ligj, angazhimin kolektiv dhe legjitimitetin unik të KB-së.
	Kofi Anan

Mesazhi nga Kombet e Bashkuara është se topi tani është në fushën e Irakut. Por ambasadori irakien në OKB, Mohamed Aldouri, tha se rezoluta u miratua vetëm sepse - siç u shpreh ai - SHBA i kishte imponuar vullnetin e saj pjesës tjetër të botës. Iraku ka një javë afat për të rënë dakord për respektimin e saj. Por zoti Aldouri tha se rezoluta ishte formuluar në atë mënyrë sa që Bagdadi do ta ketë vështirë të lejojë kthimin e inspektorëve. Në takimin e Këshillit të Sigurimit, sekretari i përgjithshëm i OKB-së, Kofi Anan, tha se këshilli do të plotësojë përgjegjësitë e veta - por ai theksoi poashtu se lufta nuk ishte e pashmangshme.

	Iraku ka shpërfillur KB-në dhe, së këndejmi bashkësinë ndërkombëtare, gjatë njëmbëdhjetë viteve të fundit.
	Toni Bler

"Kjo rezolutë bazohet në ligj, angazhimin kolektiv dhe legjitimitetin unik të Kombeve të Bashkuara. Ajo përfaqëson një shembull të diplomacisë multilaterale që i shërben kursit të paqës dhe sigurisë. Ajo reflekton një përkushtim të ri për parandalimin e zhvillimit dhe të përhapjes së armëve për shkatërrim në masë dhe dëshirën universale për të parë arritjen e këtij objektivi me mjete paqësore," tha sekretari i përgjithshëm i OKB-së, Kofi Anan.

Kryeministri britanik Toni Bler tha se ky ishte rasti i fundit i Irakut për të shmangur luftën:

"Siç e thekson rezoluta, Iraku ka shpërfillur Kombet e Bashkuara dhe së këndejmi gjithë bashkësinë ndërkombëtare gjatë njëmbëdhjetë viteve të fundit. Iraku ka shkelur dhe vazhdon të shkelë një varg të tërë rezolutash të OKB-së. Me miratimin e kësaj rezolute, Kombet e Bashkuara e kanë bërë të qartë se më nuk do ta tolerojnë këtë," tha kryeministri britanik Toni Bler.