Në kohën kur në Maqedoni ende nuk është krijuar qeveria e re dhe ministria aktuale e Arsimit nuk mund të marrë vendime, Dojçin Cvetanovski, kryetar i sindikatës së Arsimit thotë se ministrin e ri, e pret një punë e madhe.

Z. Cvetanovski tha se arsimi në vend, ka nevojë për reforma dhe se pagesa e arsimtarëve është një çështje që duhet shqyrtuar.

Gjynere Nebiu ka një karrierë të gjatë si mësuese. Ajo jep mësim në shkollën Nikola Vapcarov në një lagje të Shkupit. Për të, rroga nuk është e mjaftueshme.

Punëtorët e arsimit, në muajin maj filluan një grevë. Ata kërkonin nga qeveria e atëhershme, rritjen e pagave. Greva detyroi qeverinë që t'ua rrisë rrogat e mësuesve, por me një shumë të vogël.

Prej disa vitesh, në vend është prezantuar metoda e re e mësidhënies që quhet interaktive, dhe ministria e Arsimit kërkon që kjo metodë të zbatohet nga mësuesit. Por për ta zbatuar atë, duhen mjete financiare.

"Më shumë ka pasur ndihma nga jashtë, si programi PHARE ose organizata dhe shtete të huaja, se sa Ministria e Arsimit ose shteti nërmjet ministrisë së Arsimit," thotë Cvetanovski.

Sipas Ligjit për Arsim të Maqedonisë, një klasë më së shumti duhet të ketë 35 nxënës, por mësuese Gjynere Nebiu thotë se një numër kaq i madh i nxënësve, kërkon një agazhim shumë më të madh.

"Është shumë vështirë, vitin e kaluar kam pasur 24 nxënës. Cilësia e mësimit edhe unë si mësuese kam pasur më shumë kushte për të gjitha ato që dua t'i aplikoj te fëmijët. Tani jam shumë e kufizuar, sepse kam 34 nxënës".