Kryetari i Sindikatës së Bashkuar të Arsimit të Shkencës dhe Kulturës, Agim Hyseni, ka paralajmëruar se nëse deri me datën dhjetë tetor nuk do të marrin ndonjë përgjigje të qëndrueshme nga qeveria, atëherë ata do të kalojnë në manifestime publike.

	Ministria po bënë përpjekje për përmbushjen e kërkesave të mësimdhënësve.
	Ymer Avdiu, zëdhënës i ministrisë së arsimit

Ai ka thënë se megjithë përpjekjet e sindikatës për gjetjen e një zgjidhjeje në bashkëpunim me qeverinë, ajo deri më tani ka ofruar vetëm përkrahje verbale.

"Deri më tash ne kemi provuar që të ofrojmë bashkëpunim, por ... qeveria është përgjegjëse të tregojë se kur do të përfundojë greva," tha zoti Hyseni.

Ministria e Arsimit, Shkencës dhe Teknologjisë thotë se ajo është duke bërë të pamundurën që greva të përfundojë dhe nxënësit t'i kthehen mësimit.

"Greva është e drejtë e demokratike, por ministria apelon që gjendja të mos eskalojë dhe ky problem të zgjidhet përmes punës normale," tha për BBC-në zëdhënësi i ministrisë së arsimit, Ymer Avdiu.

Zyrtarët e ministrisë thonë se ata nuk janë për përgjegjës gjendjen jo të mirë të arsimit në Kosovë, duke thënë se të tillë e kanë trashëguar.

"Ministria po bënë përpjekje për përmbushjen e kërkesave të mësimdhënësve," tha zëdhënësi Avdiu.

Ai tha se qeveria shumë shpejt do të dalë me qëndrimin dhe vendimet e mundshme.

"Pagat e mësimdhënësve vërtet janë të vogla, por as pagat e punonjësve të ministrisë nuk dallojnë nga pagat e mësimdhënësve," tha ai.

Kryesindikalisti Hyseni thotë se nuk janë të qëndrueshme deklarimet e qeverisë se nuk ka mjete buxhetore për rritjen e pagave në arsim.

Zoti Hyseni ka thënë se faktikisht "ka sufiçit buxhetor", i cili, sipas tij, mund të përdoret për arsimin.

Ai sygjeron si një zgjidhje alternative zvoglimin e shpenzimeve të administratës publike, numrin e punonjësve si dhe rritjen e tatimeve.

"Mundësi ka por varet nëse do të ketë gatishmëri që ato të shfrytëzohen si duhet," tha zoti Hyseni.

Sindiakta e arsimit i është drejtuar përmes një letre edhe kreut të UNMIK-ut, Michael Steiner, duke kërkuar që ai të përdorë autoritetin e tij për të ndihmuar që negociatat të zhvillohen në formë intitucionale.

"Mospërmbushja e kërkesave të mësimdhënësve do të pamundësojë reformimin dhe përparimin e gjithë sistemit arsimor si dhe do të rrezikojë vetë ekzistencën e shkollimit publik në Kosovë," shkruhet në letrën drejtuar kreut të UNMIK-ut.

Në Kosovë ka rreth 22 mijë punonjës në shkollat fillore dhe të mesme.

Që nga përfundimi I luftës mësimdhënësit vazhdimisht kanë kërkuar rritje të pagave të tyre, por pa sukses.

Paga mesatare mujore e tyre është rreth 130 euro, shumë kjo e cila, sipas mësimdhënësve, krahasuar me koston e jetesës, nuk mjafton për të siguruar minimumin ekzistencial për familjet e tyre.

Greva e mësimdhënësve ka ngritur në sipërfaqe edhe çështjen e nivelizimit të pagave në sektorin publik.

Kryeministri Bajram Rexhepi ka thënë se kërkesa e mësimdhënësve për nivelizim të pagave të arsimit me sektorët tjerë publik është domosdoshmëri, sepse, sipas tij, nuk është e drejtë që një punëtor i pakualifikuar në disa ndërmarrje publike të paguhet më shumë se profesori në universitet.

Është paralajmëruar edhe krijimi i komisioneve përkatëse që duhet të gjejnë zgjidhjet e përshtatshme.