BBC: Por cili është në të vërtetë biznesi i kësaj kompanie?
Zoti Gregory: Edhe tani Worldcom është kompania e dytë më e madhe që ofron shërbime të telefonisë të distancave të largëta në Amerikë dhe ka interesa të mëdha në transmetimin e të dhënave. Ajo e ngriti rrjetin e saj dhe u bë e madhe në ditët kur mendohej se telekomunikacioni do të ishte industria me rritjen më të shpejtë në botë për një kohë të gjatë. Dhe operatorët e mëdhenj si Britishtelecom në Britani, Deutschetelecom në Gjermani, ATT në SHBA u sfiduan nga një gjeneratë e re kompanish të reja, njëra prej të cilave ishte Wolrdcom-i, por, sigurisht që tregu nuk ishte po aq i madh dhe nuk po rritej me shpejtësinë që menduan të gjithë. Pra, në të gjithë botën u shtrinë qindra mijë kilomentra kabllo me fibër optike, u ngrit një infrastrukturë e re e stërmadhe, të cilat nuk e kanë paguar asnjëherë veten. Çmimi i bisedave telefonike dhe transmetimit të të dhënave ra shumë dhe kapacitetet ishin të stërmëdha. Pra, shumë prej këtyre kompanive të reja panë që modeli që kishin bazuar biznesin e tyre thjesht nuk punonte. Bota do të ndryshohet nga interneti, por kjo ende nuk ka ndodhur.

BBC: Cila ishte arsyeja që reagimi i administratës amerikane dhe presidentit Bush ishte kaq i shpejtë dhe i fuqishëm?

	U tha se themelet e kapitalizmit po çahen.
	Mark Gregory, analist i BBC-së

Zoti Gregory: Kjo ndodhi pjesërisht sepse duket se skandali në Worldcom duket se është më i madhi. Shuma e parave të humbura, 3,8 miliardë dollarë, është një shumë e madhe. Për më shumë kjo është më e fundit në serinë e skandaleve lidhur me kontabilitetet e korporatave. E para, siç mund ta mbani mend, ishte gjigandi i energjisë Enron që u rrëzua vitin e kaluar me miliarda dollarë borxhe. Ka pasur edhe disa kompani të tjera..., emra që njerëzit ndoshta nuk i kishin dëgjuar ndonjëherë, deri sa shpërthyen skandalet, dhe u tha se themelet e kapitalizmit po çahen.

Por pasoja e këtyre skandaleve me korporatat do të thotë që investitorët të mos besojnë më shifra e kontabiliteteve që japin kompanitë dhe kjo ka minuar tregjet financiare të botës, që kanë pasoja të mëdha potenciale për të gjithë ne, jo thjesht për investitorët milionerë. Kjo sepse nëse investitorët nuk kanë më besim dhe nuk fusin paratë e tyre në kompanitë, ato nuk do të kenë para për të shpenzuar, të gjithë ata njerëz pasuria e të cilëve varet pjesërisht nga vlera e lartë e aksioneve, nuk do të kenë para në xhepat e tyre, pensionet e pensionistëve do të jenë më të ulta sepse në shumë vende ato varen nga fondet e pensioneve që investohen në aksione. Pra, kjo mund të nxisë pasoja të mëdha që mund të ndikojnë edhe tej tregjeve financiare. Kjo është frika dhe kjo po ndodh.

BBC: Pati disa sugjerime në media se skandali i Enron-it dhe tani tronditja e Worldcom-it po vënë në pikpyetje themelet e kapitalizmit në SHBA?
Zoti Gregory: Kjo është e vërtetë deri në një farë mase. Sigurisht, kemi dëgjuar shumë vitet e fundit retorikën e kapitalizmit të tregut të lirë. Mënyra e jetesës të bazuar në tregjet, që mishërohet në të vërtetë nga Amerika, duket se është modeli më i suksesshëm, dhe ekonomia amerikane ka kaluar nëpër një periudhë rritjeje të madhe. Megjithatë ka disa vite që kjo është vënë në pikpyetje, dhe tani është ngritur frika nëse gjithë kjo rrije a sukses ndoshta ishte një farë iluzioni. Nuk është kaq e thjeshtë, dhe nuk duhet ekzagjeruar shkalla e problemeve. Pa dyshim që ka pasur një rritje të madhe, por tani ka një debat nëse do të duhen më shumë rregulla për tregjet e aksioneve, rregulla për kontabilitetet, për të siguruar që këto probleme të mos ndodhin përsëri. Sepse çështja e besimit është jetësore për kapitalizmin, në kuptimin se kapitalizmi është një konkurencë shumë e egër ku investitorët marrin vendime të vështira bazuar në informacionet e publikuara në të dhënat e kontabilitetit. Këto vendime janë si bixhozi dhe ju do të luani bixhoz nëse i besoni informacionit. Nëse informacioni është i gabuar ju nuk ndërmerrni rrezik dhe rreziku është në zemër të mënyrës se si vepron kapitalizmi.