Seumas Caimbeul (Seumas Ailig Eòghainn)

Canar Seumas Ailig Eòghainn ri Seumas Caimbeul às an Ìochdair an Uibhist a Deas. Rugadh e san t-Samhain 1973 agus thogadh e le sheanair, Ailig Eòghainn, agus a sheanmhar, Eilidh.

An dèidh Sgoil an Ìochdair fhàgail thug e greis ag obair aig Co-Chomann an Ìochdair, greis eile as a' Ch-op an Creag Goraidh agus an uair sin, ann an 1995, thòisich e a' postaireachd, obair a tha e a' dèanamh chun an latha an-diugh. Tha e a' frithealadh Creag Goraidh, sgìre fharsaing an Ìochdair, agus deas gu Gèirinis.

Nuair a tha an obair latha seachad bidh e a' cuideachadh bràthair a mhàthar, Eòghainn Ailig Eòghainn air a' chroit.

Thòisich e a' seinn nuair a bha e air Clas 2 san sgoil. Tha cuimhne aige a bhith a' seinn aig Mòd Uibhist 's gun e ach air Clas 3. Gu mì-fhortanach thugadh dha an t-òran ceàrr agus b' e an aon ghille a bha ann am farpais nighean, a' seinn Bà Bà mo Leanabh Beag. Chan iongnadh nach do bhuinnig e!

Mus do dh'fhàg e a' bhun-sgoil bha aon thidsear gu h-àraidh ga bhrosnachadh agus ga mhisneachadh gu seinn agus gu òrain ùra ionnsachadh. B' ise Murdina Stiùbhart à Barraigh. Tha cuimhne aig Seumas air an obair mhòr a bha i a' dèanamh leis na sgoilearan, ag ionnsachadh òrain dhaibh agus a' dèanamh dealbhan-chluich leotha agus gan cuir air adhart gu Mòd Uibhist.

Fhuair Seumas cuideachd taic mhòr bho thè a mhuinntir an Ìochdair, Ena NicDhòmhnaill, Enag Dhodaidh. Bhiodh i ga bhrosnachadh agus ag ionnsachadh òrain ùr dha, ag innse sgeulachdan agus iomadh seòrsa beul-aithris dha. Bhiodh i fhèin cuideachd an sàs anns a' Mhòd.

Chaidh Seumas gu Mòd Nàiseanta airson a' chiad uair ann an 1985. Tha cuimhne aige air a' bhoil a bh' air a' dol a Loch Abar agus mar a sheinn e an t-òran ainmichte O Nach Àghmhor as an aon fharpais as na dh'fheuch e.

Choisinn Seumas am Bonn Òr airson seinn san t-Seann Nòs aig Mòd an Òbain ann an 1992 agus Bonn Òr Tìm an Òbain ann an 1996. Chuidich Catrìona Garbutt e a' deasachadh airson an dà fharpais.

Chan eil Seumas a' dèanamh mòran seinn air àrd-ùrlair an-diugh oir tha e a' fulang le nearbh nuair a tha aige ri seinn air beulaibh dhaoine.

Airson cur-seachad bidh e ag èisteachd ri BBC Radio nan Gàidheal nuair a tha e a' dràibheadh bhan a' phuist agus am measg sheinneadairean is fhìor thoil leis tha Màiri Nic Ille Mhaoil, Alasdair 'Mòr' Dòmhnallach, Catrìona Garbutt agus na seann chlàraidhean aig Ceit Phàdraig.

Stiùireadh a’ BhBC

BBC © 2014 Chan eil uallach air a' BhBC airson na th' air làraich-lìn eile.

Gheibhear sealladh nas fheàrr den duilleig seo le sealladair lìn nas ùire agus na duilleagan stoidhle (CSS) air. Ged a chithear susbaint na làraich leis an t-sealladair lìn a th' agaibh, tha sinn a' moladh an dreach as ùire den bhathar-bhog ur sealladair a thoirt a-nuas, no ur duilleagan-stoidhle a chur air ma ghabhas sin dèanamh.