18mh linn / Sìleas na Ceapaich

Bàrdachd - Laoidh na Maidne

Dàn 3

Tha am bàrd an toiseach a' cleachdadh na maidne mar chosamhlachd, a' bruidhinn air sguabadh a-mach "luath a' pheacaidh", mar a ghlanas duine mach an taigh sa mhadainn, a' dèanamh deiseil airson latha ùr.


Tha i an uair sin a' toirt iomradh air "biast nan seachd cinn", is e sin na seachd peacannan, agus mar is eudar a' bhiast a mharbhadh le seachd saigheadan - ùrnaigh, cumail nan àithntean agus mar sin air adhart. Tha seo stèidhte ann an creideamh traidiseanta Caitligeach an ama sin.


Tha an dàn seo a' toirt dhuinn fosgladh-sùla air staid-inntinn a' bhana-bhàird, a dh'fhiosraich iompachadh spioradail aig àm àraidh na beatha, a rèir aithris an dèidh dhi a bhith glè thinn.


Laoidh na Maidne

  • Taing dhuit, a Dhia, chionn do ghibhtean,
  • On a tha mi nis air dùsgadh;
  • Thug do ghràs dhomh tàmh is cadal,
  • 'S inntrig sa mhadainn às ùr orm.
  • Fadaidh teine do ghràidh am chridhe;
  • Sguabamaid a-rithis an fhàrdach:
  • 'S math bu chòir an taigh a rèiteach
  • Am bi Mac Dhè a' gabhail tàmha.
  • Fuadaicheamaid uainn a-mach
  • A' bhèist air a bheil na seachd cinn,
  • A shluigeas sinn uile na craos
  • Mas urra i dh'fhaotainn orra gill.
  • Uabhar, sannt, drùis is craos,
  • Leisg, farmad agus fearg -
  • Sin na cinn a th' air a' bhèist
  • Bhios gach aon là sa bheinn a' sealg.
  • Tàirnidh i faghaid mun cuairt duinn
  • Mur robh ar buachaillean glic;
  • 'S gun dèan sinn dan comhairlean feum,
  • Marbhaidh sinn i fhèin 's a sliochd.
  • Saighead a chur ann a cridhe
  • Ar cainnt a bhith dligheil dearbhtach;
  • Dh'aon nì gum faic no gun cluinn sinn,
  • Cuireamaid cùl ri bhith feargach.
  • Saighead a chur ann a beul
  • Ar cainnt a bhith cèillidh glic,
  • Ar deòir a bhith air ar sùilean,
  • 'S dol air ar n-ùrnaigh gu tric.
  • Saighead a chur ann a casan
  • A bhith leanailt nan ceart cheuman
  • Gu imeachd an dèidh ar Slànaigheir
  • Air a' bhàir a rinn E fhèin duinn.
  • Saighead a chur ann a gàirdein
  • Gun do làmh gu meàirl' a shìneadh;
  • Ma bhios uireasbhaidh no càs ort,
  • A shireadh air càch gu sìobhalt'.
  • Ma gheibh sinn air a' bhèist ud tadhal,
  • 'S ar saighdean a chaitheamh air chòir,
  • Caillidh i a saothair 's a sealg;
  • Bidh ise marbh 's bidh sinne beò.

Laoidh na Maidne

Tagh na facail a th' air an comharrachadh ann an dearg airson mìneachadh fhaighinn.


The Adobe Flash player and Javascript are required in order to view a video which appears on this page. You may wish to download the Adobe Flash player.

Teacsa

An teachdaireachd a tha a' ruith tron dàn

'S e an teachdaireachd a tha a' ruith tron dàn gun urrainn na peacaidhean seo a sheachnadh le bhith ag ùrnaigh agus a' sireadh cuideachadh bho Dhia agus a bhith mothachail air na h-àithntean agus air na riaghailtean a tha a' chreideamh a' toirt dhut.

Dàin Eile

Leugh dàin eile a sgrìobh Sìleas na Ceapaich

Air adhart gu

Beachdan

Copyright © 2015 BBC. Chan eil uallach air a' BhBC airson na th' air làraich-lìn eile.

Gheibhear sealladh nas fheàrr den duilleig seo le sealladair lìn nas ùire agus na duilleagan stoidhle (CSS) air. Ged a chithear susbaint na làraich leis an t-sealladair lìn a th' agaibh, tha sinn a' moladh an dreach as ùire den bhathar-bhog ur sealladair a thoirt a-nuas, no ur duilleagan-stoidhle a chur air ma ghabhas sin dèanamh.